ESAYI 64 - Tupuri Bible

¹ Doo wùu maga roɗ koore wo go day ur ti bii go nono, ndo de kaŋ nen jar hee ɓon wo yaŋ go ti ɗúu ɓo no, day wer jar de daɗ wo yaŋ doo ɓo.

² Ti wur maga ndo hay joŋ fẽẽre ma joŋ hẽẽne maga naa wo wùr doo mono, ndo cwaa le day húulì raw wo daɗge doo ɓo.

³ À laa ti boŋ noga jobo wãã noga nen ko we ga baa po ma tigriŋ go sar bay diŋ ndo wa hay joŋ we doo kay nono see je maga hay gor doo ɓe gà hase.

⁴ Ndo hay caa pel je maga joŋ fen ma ti ngel ɓen go de fruygi mono, caa pel jar maga fer wo ɗig ti ti faage ɓo maga wùr hay daʼ see wùr le go ti wur ma honla ɓuy ti ɓaara mono. Ama ɓil ɓo raw cee moge ti wùr werga wùr hay joŋ ɓlagge.

⁵ Wùr kol go ɓuy doo fen yeɗe nono, day joŋre wùr ma ti ngel ɓen wo ɓuy kol wo go doo õõbe ma de ɗag nono. Wùr lwaɗ go ɓuy doo sug koo nono day ɓlagge wùrn raw wo de wùr wer doo leege nono.

⁶ Je ma ɗe ɗúu ɓo noga pũy go maga se mo saʼ see ɓe see ɓo bay wa hase. Sen nà werga ndo yoŋ see ɓo go ne wùri day ndo men wùr mbo wo go leɗge tiɗ tiɗ wer ɓlagge wùrn wo mono.

⁷ Bà mbe mo ɓuy ndo Manwur ndo diŋ Pan wùri. Wùr diŋ pãy, ndo diŋ je booge no wùr ɓuy wùr diŋ joŋre maga ndo joŋn de doo ɓo.

⁸ O Manwuri, sõõ ɓil go debaŋ ne wùr ti has tuu wa, fer ɗig ti tum tum ti debaycõõre wùrn wa. Ko mbo nen ɓo, wùr mbe nà diŋ jar mani ɓo no.

⁹ Ɓi leege ɓo ma bay ɗagn kol wo go diŋ tabuli, Siyoŋ gwaʼ go ti koɗe, Jerusalem kol go nen coocoo.

¹⁰ Tiŋ Baa wùr ma bay ɗag de woore ga pããre wùr hay wo far ti ɓo ciŋ ɓil ɓe kol go diŋ har wùu, fen wùr maga hay de el mo ɓuy ɓlag go.

¹¹ Pel fẽẽre sen wo mo deŋ ɓuy ndo joŋ ge mbo yaŋ baʼ yawla Manwuri? Ndo wãã ge mbo mopo gà so yaw noga ndo mbuɗ gi mbo sõõre wùr wo go ni no has so yawla?