ESAYI 63 - Tupuri Bible

Wur saʼge hee no

¹ Sen diŋ wose sen ga a le Edom wo de Bosra de õõbe ma de pũy wo ti, de hee õõbe ma sagge ti day oo go de gragge, go de bag jag see ɓe de egre ɓe ɓuy mo la? Á diŋ ndi maga wãã wããre ti ngel ɓe, day de kããge ma yãã jar go lay mono.

² Wer mayse ga õõbe ɓon wo go de sẽẽ day wo go doo õõbe ma ti je maga de ma joŋ joŋre ti ngel hãã yii tlalum no la?

³ Hay jag cããge hãã yii nà diŋ ndi boŋ tuu day jobo yoo wer jar po hay bay see ɓi ni wa. Ndi hay hãã ra go de bagge põõ ɓi no, ndi hay ndreɗ ra go de sõõge ɓil ɓi no. Cíi ɓaara hay pur go ti õõbe ɓin wo day kaa go ti õõbe ma de heege ti ɓin wo ɓuy.

⁴ Werga, ndi hay le go de baa wur saʼge heen ɓil ɓi, wur jar ɓi maga ndi hay coo ra le a go.

⁵ Ndi hay kaŋ nen ɓi taʼa, ama je ma age kay ndi bay wa hase. Ndi hay car jiili go ama je maga mo coɓ ndi bay wa hase. Doo kay nono, doo ɓi raw mbe kay ndi so, sõõge ɓil ɓin raw joŋge diŋ fen coɓ ndi no.

⁶ Ndi hay hãã wer jar wo go nen bagge põõ ɓi no, ndi taa ra go de sõõge ɓil ɓi no, day ndi raw kaa cíi ɓaara go gesiŋ.

De el mani Manwurn wo

⁷ Ndi fer ge yaŋ ɗig ti ti ɓil de el mani Manwurn wo, ti fẽẽre maga à nen kee Manwur ti ɓaara, ti de el maga á joŋn mo ɓuy see wùr mono. Ndi wãã ge yaŋ go ti ɓil de el ɓe maga á joŋn debaŋ ti tiŋ mani Israyeln mono, ti de el maga á hay joŋn see ɓaara de koge decoo ɓaara mono, ti joŋre ɓe ma de eln wo ɓuy.

⁸ Á hay wãã go ga : Kidolgi á wo diŋ jar mani ɓin wo, wo diŋ weere ma bay cerge wo see no! Á diŋ je maga hay yãɗ ra go mono.

⁹ Ti re maga hay caa ra mo ɓuy no, se de see ɓe hay lawge wer ɓaara, je peele Baa ma pel ɓen hay yãã ra go. Wer dage ɓen wo de koge decoo jar ɓen wo, se de see ɓe tuu hay coo ra le go, hay coɓ rage, hay soɗ rage le ti naw tum nen wur ma ɓaan wo le.

¹⁰ Ama saara raw joŋ ti graŋ go see ɓe, car wo jiili Nenterse ɓe ma bay ɗagn go. Se raw kolge go diŋ je hee ɓaara, kol go dur rage nà diŋ se.

¹¹ Doo kay no so no, jar mani ɓen raw wo ferge ɗig ti ti wur ma ti wurpon wo de Moyis ga : Je maga hay cegaɗ maarogn le go de ɓaara, de jar koɗ horog mani ɓen wo nà genla? Je maga hay ɓoʼ Nenterse ɓe ma bay ɗagn ti holaŋ ɓaara nà genla?

¹² Hay ti joŋre de Moyis nà diŋ doo ɓe ma sagge no. Á raw car nen bii wo go ne hara pele nen maga ɗúu se mo ra ma tum.

¹³ Hay sol biin wo go ɓil tuu ma kuɗumn wo doo piir maga ɗee ti puuli nà diŋ se, day bii sen mun wo go ti ngel po gà ɓuy.

¹⁴ Nenterse Manwur hay kaŋ ra ti ngel iggi ɓaara doo này maga cwaa ɓil log nono. Ndo hay koɗ jar mani ɓon wo maga riŋ ɗúu ɓo ma de togoɗgen mo leʼ ge go ti ngel ɓuy nà doo kay no so no.

Tosge ma joŋ kamkam

¹⁵ Le ciŋ hãã, jel nen ɓo ni ndo ko tiŋ ɓo ma bay ɗag ma de wooren ɗa la, hun ɓon wo de egre ɓon wo nà gen yawla? Dage maga ndo da me, koge decoo maga ndo ko decoo ɓi bay wo wa so.

¹⁶ Bà mbe mo ɓuy pan wùrn nà diŋ ndo. Hay leʼ ti wùr nà bay diŋ nen Abraham wa, hay lag wùr go sara ti nen nà bay diŋ Israyel wa lay. Diŋ ndo, ndo diŋ pan wur maga le ɓaa tum tuu ndo ɗe see ɓo diŋ je coo wur le no.

¹⁷ Wer mayse ga Manwur ndo men wùr go maŋ ɓil go hãã see faage ɓon wo la? Wer mayse ga ndo hig jiili wùr go maga wùr mo joŋ hẽẽne doo ɓo wa so le la? Fer mbo le see wùr wer weere jõõre ɓon wo, wer ɓĩĩni maga wo diŋ tway ɓon mono.

¹⁸ Jar ɓo ma bay ɗagn hay joŋ wo ti sirn nen naw po no mbag koɗ no, jar hee wùrn dag wo ngel ɓo ma bay ɗagn go ti.

¹⁹ Naw yaŋ wara pur debaŋ wùr doo jar po maga bay wãã re ɓaara diŋ ndo wa so nono, doo jar po maga à bay ɗe ɗúu ɓon ne hara ti wa so nono. O! Hayga ndo de ngar jag ngel ma ciŋ we le go day ndo de hay cwaa we le no, húulì de mbug wo go pel ɓo!