ESAYI 62 - Tupuri Bible

Baa fer ge yaŋ ooge ti Jerusalem

¹ Ndi fer ge go baʼ gà nà wer Siyoŋ, ndi hay ge eŋ gà nà diŋ wer Jerusalem. Daga keɗed ɓen mo naa nen go doo waa ma de jag toŋn ɗa, pẽẽge ɓen mo naa nen go doo wùu ma de doʼge ti dol de yããge no ɗa lay.

² De sen ge mo so no, jar dehãy ko ge wo keɗed ɓon yaŋ day waŋre koge wo togoɗge ɓon yaŋ. À ɗe ge ndo yaŋ de ɗúu ma defay maga Manwur kaŋn ge ne ndo de jag ɓe mono.

³ Ndo joŋ ge yaŋ diŋ tilgi ma sagge doo Manwuri, diŋ gawraŋ ma ti waŋre wo ɓi coo doo Baa ɓo no.

⁴ À ɗe ge ndo ga wãy maga á hay menn go gà so hase. À ɗe ge sir ɓon ga ma de ɓlaggen gà so hase. Ama à ɗe ge ndo yaŋ ga : Á de cõõre jag ɓi. À ɗen ge yaŋ ga wãy war no werga ɓil Manwur go feh ti ɓo day sir ɓon daʼ ge war yaŋ.

⁵ Doo maga wel ma jõõ kol go diŋ war may tigli nono, weere ɓon kol ge wo doo werpiiri ɓo wo nono. Doo maga may ma de yããge gon fruy ɓil je ma de yããge ɓen nono, ndo fruy gi ɓil Baa ɓon yaŋ go lay.

⁶ Jerusalem, ndi go de lag jar gor ngel wo ciŋ ti kor ɓon wo. Á bay wo maga saara fer go baʼ de ceg noga de suŋ wa so hase. Nday maga nday de ɗig ti Manwur tum ti Jerusalem mono, iggi ɓay bay wa hase!

⁷ Menn we iggi wa hase say á mo fer go ʼwũy Jerusalem ti ngel ɓe day mo koln go diŋ fen maga à keen ti tamsir la ɗa.

⁸ Manwur hay hãʼ go de egre ɓe no, de doo ɓe ma de egren ga : Ndi hã ge coore ble ɓon go ma rege ne jar hee ɓon wo gà so hase. Jar ni waaren jo ge wo yii ɓo ma defay maga ndo daʼn de joŋre ɓo go gà so hase.

⁹ Jar maga hay lag wo coore ble ɓaaran ciŋ reen ge wo yaŋ day joŋ ge wo suseʼ yaŋ ne Manwuri. Jar maga hay hãã wo tlalum jo ge wo yii yaŋ ti feele ma ti ngel ɓi ma bay ɗag no.

¹⁰ Lag we le go, lag we le go jag tiŋ! ʼWũy we faage go ne jar no! Ɓoʼ we, ɓoʼ we faage, far we húulìn wo go! Maŋ we drapo go ciŋ ti wer jarn wo!

¹¹ Manwur yaŋ le. Á de riŋ jag sir tawge wo go ɓuy de re ma kay ga : Wii we may ma Siyoŋ ga : Ko je yãã ndon le de age, ko ga á age de poɗge ɓen doo, leʼge joŋre ɓen wo de seege pel ɓe.

¹² À ɗe ge ra yaŋ ga jar maga wo go ti nene, jar maga Manwur fer le coo rage mono day ma ɓo à ɗe ge ndo ga : Maga à kiɗn le kiɗgi mono, ga : Ɓi leege maga à bay go de tobge ɓe wa mono.