ESAYI 61 - Tupuri Bible

Wããre ma de cõõre no

¹ Nenterse Waŋkluu Manwur ti ɓi, werga Manwur de kaa noo ne ndi ti. Á hay ɓoʼ ndi ma wo ge sii wããre ma de cõõren wo ne jar maga wo nen sõõre mono, ma woo jiili jar maga wo go de caa jiili mono, ma riŋ jar ma ti paglam wo ga re bay ti ɓaara wa so, ma riŋ jar ma ti daŋgay wo ga a wo go de naa saale ti,

² ma riŋ jar de kal ma de woore maga Manwur a de ɓe mono, ma riŋ rage ti wur saʼge hee mani Baa wùr no, ma teŋ nen jar maga wo nen lawge mono,

³ ma hoo jar Siyoŋ maga hay wo nen lawge de lagge nen sããge wo go ciŋ, ma tag noo fruygi ne hara see ti ngel lawge no, ma hee õõbe togoɗge ne hara ti ti ngel carge jiili no nen maga à mo ɗe ra ga koore terebente ma keɗedn wo, koore ma de peɗge mani Manwurn wo, day á mo hã wo togoɗge ne hẽne.

⁴ Á fer ge wo yaŋ bor ngel tabul ma ɓaaɓaan wo, fer wo yaŋ go horge tiŋ jar ɓaara ma ɓaan wo go ciŋ. Á fer ge wo yaŋ go ndar nen ɓi leege maga à hay tob ra go, à hay ɓlag ra le go kiŋgi pur wo yaŋ go defay tigriŋ.

⁵ Jar waare joŋ ge wo ɓil sir ni ma koɗ fǐiri ɓayn wo, weere mani waaren joŋ ge wo yaŋ diŋ jar jeɗ payre ɓayn wo de jar gor tlalum ɓayn wo.

⁶ Ama nday ma ɓayn à ɗe ge nday yaŋ ga jar siɗ jag ne Manwurn wo. À wãã ge yaŋ ga nday de ma joŋ peele ne Baa naa no. Nday re ge nen fẽẽre mani jar dehãyn wo yaŋ go day nday grag ge see ɓay yaŋ go de togoɗge ɓaara no.

⁷ Goɗge ti kol ge yaŋ go ti ngel sõõre ɓay de daŋge ɓe ɓaale ɓoge. Á hay ham wo jag ɓaara go gesiŋ day saara fer ge yaŋ go fug ɓil ɓaara. Á daʼge wo fẽẽre yaŋ de daŋ rage ɓaale ɓog wo ɓil sir ɓaara no day fruygi ɓaara joŋ ge wo tum sagsage.

⁸ Werga ndi Manwuri, ndi da diŋ fen ma ti ngel ɓe no, ndi de caa hee de frumgi fẽẽre jarn wo de hãyhãy no. Ndi hã ge nen mo ɓaaran yaŋ go ne hara ti ngel ɓe keɗed ɓuy day ndi tayge jag yaŋ de ɓaara ma tum.

⁹ Weere ɓaara joŋ ge wo yaŋ go tinoo tiʼ yoo jar dehãy wo, wer jar ko ge wo jar ni ɓaaran wo yaŋ go. Jar maga ko ge wo ra daʼ ge wo wer ɓaara yaŋ go ga á wo diŋ wer maga Manwur de kaŋ bosaʼ ne hara ti.

Siŋ suseʼ no

¹⁰ Ɓil ɓi joŋ ge yaŋ go de fruygi ɓuy wer Manwuri, see ɓi joŋ ge yaŋ go feh feh wer Baa ɓi no. Werga, á hee õõbe pẽẽgen ne ndi ti, á klew õõbe keɗed ma kluun ne ndi ti doo je maga de da wãy her fẽẽre jõõ see de maŋ je siɗ jag no mono, doo may maga go de yããge biŋ fẽẽre jõõ ɓen wo see nono.

¹¹ Kidolgi, doo maga tamsir tĩĩ mbeere mo ɓen le go nono, doo pay sugnee tĩĩ fẽẽre ma de joʼ ge ɓil ɓen wo le go nono, Waŋkluu Manwur tĩĩ gi keɗedn wo de togoɗgen wo yaŋ le go pel wer jar wo ɓuy lay.