ESAYI 60 - Tupuri Bible

Woore Jerusalem maga fer ge go ʼwũygi mono

¹ Ur go ciŋ, see mbo sag so werga poɗag ɓon naa nen we go, day togoɗge mani Manwurn go de naage ne ndo ti doo wur nono.

² Koɗa suŋgu go de ɓoʼge ne tamsir ti ɓuy, wer jar ɓuy wo go nen suŋgu, ama ma ɓo Manwur naan le go ti ɓo doo wur nono, togoɗge ɓen tee ngel go mo ti.

³ Wer jar see ge wo yaŋ nen poɗag ɓo, mayre see ge wo yaŋ nen ngel maga ndo lern go doo waa no mono.

⁴ Raŋ nen go ti ɓo kara day ni ndo ko nen ɗala : Á wo go ɓuy de tayge see kããra, wo le de age see ɓo. Weere ɓon wo le de seege hãã tiʼ i, à le de hlag mayre ɓon wo yoo.

⁵ De maga ndo ko ge ra mono, ɓil ɓo fug gi yaŋ go day suu gi yaŋ go wer maga à koʼ ge horog ma ciŋ ti maarogn wo yaŋ le go ne ndo mono, nen fẽẽre mani wer jarn kol ge wo yaŋ le go ni ɓo.

⁶ Yoŋyoŋ yãã wo ɓil ɓo yaŋ go, manyoŋyoŋ ma ti sir Madiyaŋ wo de ma Efan wo lay. Jar ma ti sir Saba a ge wo yaŋ le ɓuy, horge ge wo boo biŋni wo de trusa wo yaŋ le ti ɓaara day togoɗge wo Manwur yaŋ go jag ciŋ kloŋ.

⁷ Kaw horog ma Kedarn tay ge wo yaŋ le go ɓuy ni ɓo, gamlaare ma Nebayodn kol ge wo yaŋ go nen doo ɓo. À joŋ siigi jag maga à roɗ mo ɓen go ɓuy wo yaŋ go de ɓaara ti ngel siɗ jag ɓi no, day saara joŋ ge yaŋ de cõõre jag ɓi. Ndi ler ge togoɗge ɓin yaŋ go ne tiŋn ti.

⁸ Sen diŋ jar mayse wo ga ɗee wo doo swaare wo nono, doo kurgudu maga pud wo le ma age laage ti tiŋ ɓaara wo no mo la?

⁹ Á nà werga jar ma ti kaalin wo de gor doo ɓi, daage ma Tarsisn wo pel kããra taw ma fer weere ɓo ma hãã hããn wo le de solay ɓaaran wo de boo biŋni ɓaaran wo. Sen nà wer ɗúu Manwuri, Baa ɓo no wer je ma bay ɗag ma Israyel maga ler ngel go mo ti mono.

¹⁰ Weere waare fer ge wo yaŋ bor kor ɓon wo, waŋre ɓaaran joŋ ge wo yaŋ go diŋ weere jõõre ɓo wo. Werga, ndi hay mbar ndo de maga ɓil ɓi hay cee me ne ndo ti mono, ama ndi fer ko decoo ɓo wer ɓil de el ɓin lay.

¹¹ Jag faage ɓon joŋ ge wo yaŋ go de bulgi kaʼ kaʼ tum, à tẽg ge ra de ceg gà lay, de suŋ gà lay nen maga nen fẽẽre mani jar dehãyn mo laa wo le ni ɓo de waŋre ɓaaran wo wer ɓaara ɓuy.

¹² Wer jar po noga sir waŋ maga sen joŋ ge wo peele we ne ndo gà no, sen taw ge wo go à ɓlag ge wer jar sen wo go ɓuy tuu.

¹³ Togoɗge ma ti Libaŋ yaʼ ge yaŋ le go ni ɓo, koo Siprese, koo orme wo de koo buwisn kol ge wo yaŋ go ɓuy ni ɓo ma woo ngel ɓi ma bay ɗag no, day ndi hã ge togoɗge yaŋ ne ngel maga ndi laa ɓaale ɓi wo ni mono.

¹⁴ Weere mani jar joŋ bon ɓon a ge wo yaŋ fer ti see ɓaara gesiŋ pel ɓo day jar maga hay wo las ndo mo ɓuy leɗ ge wo monɗra yaŋ ɓaale ɓo. Á ɗe ge wo ndo yaŋ ga : Ɓi leege mani Manwur no, ga Siyoŋ mani je ma bay ɗag ma Israyel no.

¹⁵ À hay tob ndo go, jobo hay bay de sãy ɓo ti wa. Jobo hay bay heege ɓil ɓo wa ama ndi kol ge ndo yaŋ go diŋ ngel twore ma tum, diŋ ngel fruygi de kiŋgi de kiŋgi.

¹⁶ Ndo soɓ ge pãã jar dehãy wo yaŋ go, ndo jo ge jag wãã ree waŋre wo yaŋ go day ndo ko ge yaŋ ga ndi diŋ Manwuri, je yãã ndo no, je coo ndo le no, je egre mani Jakob no.

¹⁷ Ndi kol ge boo biŋni yaŋ go ti ngel boo dob no, ndi kol ge boo solay yaŋ go ti ngel boo no, kol ge boo dob go ti ngel koo no, boo go ti ngel húulìn wo. Ndi a ge yaŋ de jamn ma ɗaw moge doo, de keɗedn ma wãã wããre ɓo.

¹⁸ À laa ge wããre yãɗge fẽẽre kããra de waŋ ɓil sir ɓon gà so hase. À laa ge ga à hay frum fẽẽre noga à ɓlag fẽẽre wo gà go ti jag haagu ɓon wo ɓuy. Ndo kaŋ ge ɗúu ne kor ɓon wo ga : Pẽẽge! Ne jag tiŋ ɓon wo ga : Togoɗge!

¹⁹ Ler ge ngel go ne ndo ti nen ngel ma de cegn bay diŋ wur wa so lay, tee ge ngel go de suŋ bay diŋ few wa so lay. Ama Manwur joŋ diŋ poɗag ɓo ma tum no, Baa ɓon joŋ ge diŋ je ler ngel mo ti no.

²⁰ Wur ɓon leʼ ge go gesiŋ gà hase, few ɓon huu gi go gà lay werga Manwur joŋ ge diŋ poɗag ɓon ma tum day wur lawgen maŋ ge wo jag go.

²¹ Jar sir ɓon joŋ ge wo diŋ jar ma keɗed wo ɓuy tuu, day saara yãã ge sirn yaŋ ma tum. Sen nà diŋ wer jar maga hay jaw wo day ndi hay lag ra go de el mono, diŋ joŋre maga ndi hay joŋn de doo ɓi ma hã togoɗge ne see ɓi mono.

²² Jar ma mbag ma yoo ɓaaran tes ge wo yaŋ ndare, maga sen go blam taw kol ge yaŋ diŋ wer jar ma de egren wo. Ndi Manwuri, ndi joŋ ge fẽẽre sen wo yaŋ go deparday ti wur ɓaara.