ESAYI 6 - Tupuri Bible

Baa ɗe Esay

¹ Ti kiŋgi maga waŋ Osiyas huu mono, ndi raw ko Waŋkluu de hayle ti paale waŋ ma de gẽẽre ciŋ day jag õõbe ma ti ɓen hay baa wo ɓil tiŋ Baan go.

² Serafẽẽ hay wo de lagge ti ɓe. Graŋ wosela ɓuy yoo ɓaara hay hiiraʼ hiiraʼa : Ɓog diŋ ma yoŋ nen ɓaara, ɓog diŋ ma yoŋ ɓaale ɓaara, ɓog diŋ maga saara pud de ɓaara.

³ Á hay wo riŋ kããra go jag ciŋ kloŋ kloŋ ga : Bay ɗage, bay ɗage, bay ɗage diŋ Manwur Pantway no! Tamsir ɓuy go de bagge de togoɗge ɓe no!

⁴ Diŋdiŋ jag tiŋn daɗ wo doo gẽẽge je maga hay ngar jag mono day tiŋn raw bagge go de cugi.

⁵ Doo kay nono ndi day so gana : Maga, ndi taw we go! Ndi go de yeege werga ndi diŋ je maga jag ɓi de ɓlagge, ndi de tiŋ nà yoo jar maga jag ɓaara de ɓlagge day nen ɓi ko Waŋ, Manwur Pantway mono.

⁶ Ama Serafẽẽ po boŋ raw pudgi le nen see ɓi de jaŋre wùu maga se maŋn le de ɓogam ti ngel siɗ jagn doo kay.

⁷ Se raw cog jag ɓi de ɓe day ga : Á cog mo go jag mono, debaycõõre ɓon go de maŋge, ɓlagge ɓon go de porge so.

⁸ Ndi kal laa gẽẽge Waŋkluu de wããge ga : Ndi ɓoʼ ge nà diŋ wosela? Wose wo yaŋ ne naa la? Ndi kal yiŋ jag ga : Ndi la, ɓoʼ ndi!

⁹ Se day so ga : See, wo wii jar sen wo ga : Nday coʼ mbay sug tum, ama nday laa wer ne mopo gà hase! Nday kaŋ mbay nen ɓay taʼ taʼa, Ama nday daʼ wer ne mopo gà hase!

¹⁰ Hig jiili jar sen wo go, Dweɗ sug ɓaara go, Rãã nen ɓaara go nen maga nen ɓaara ko, Sug ɓaara laa, saara daʼ wer mopo le go jiili ɓaara, raw coo wo seele day à pẽẽ ra go nà wa.

¹¹ Ndi kal ga : Sen nà hãã hunla Waŋkluu? Day se raw ferge ga : Hãã wo go ti wur maga fen ɓlag jarn caa wer jar Ma ɓi leegen wo go, Tiŋn gwaʼ wo go bay jar téebeere ɓili Day sirn la ɓlag go hãã gwaʼ go diŋ tabuli.

¹² Á wo go ti wur maga Manwur dus jar téebeeren wo wo go Day sirn gwaʼ go ɓil koɗ mono.

¹³ Day hayga yoo jar hwal jobo gwaʼ we ni boŋ ɗa no, Jar sen wo la wùu haɓ ge faale ɓaara yaŋ. Ane, doo maga gùr koo terebente wo de koo cen gwaʼ mbaara de maga À car ra go mono, Kããge jar sen la jaw ge wo wer ma bay ɗag wo yaŋ.