ESAYI 59 - Tupuri Bible

Ɓlagge diŋ dam pel tosge

¹ Cwãy, doo Manwur bay go de kolge de godogray ga yãã jobo go gà so has nà wa, sug ɓe bay go de ndiŋgi has ga laa tosge gà so wa lay.

² Ama caa nen ɓay go de Baa ɓayn diŋ debaycõõre ɓayn wo, yoŋ nen ɓe go ne nday diŋ ɓlagge ɓayn wo, day saara maŋ jag ɓe go ga á mo coʼ sug ɓay wa.

³ Werga doo ɓay wo de id húulí, weere doo ɓay wo go de demge doo debaycõõre. Jag ɓay car wo diŋ geteʼ sagsage, trum ɓay wãɗ diŋ fẽẽre ma bay blamn wo.

⁴ Jobo bay ʼwaa war pel kiida ti ngel ɓe wa so, jobo bay yiŋ kiida de deele wa so lay. Á wo de kaŋ ɗiggi ɓaara diŋ ti mo ma nen leege no, ti mo ma bay blam no. Joŋge bon jar maŋ ɓiili le ɓil ɓaara day saara biŋ diŋ joŋge nen jar no.

⁵ Á ceʼ wo pããre bondron go, ɓod wo õõbe ne jar de bay goboŋgoboŋgi. Je maga re pããre ɓaara we no, je sen huu go day hayga à mbug we go boŋ no, se ceʼ diŋ mucúmcùm.

⁶ Bay goboŋgoboŋgi ɓaaran kãã ma joŋ õõbe gà saara kãã ma saɗ õõbe ɓaara sen see gà lay. Joŋre ɓaara wo diŋ joŋre hram wo, doo ɓaara diŋ joŋre yãɗge fẽẽre jar de waŋ no.

⁷ Á ɗee wo ti ɓlagge ɗeege, see ɓaara go ne fehfeh ti kaage cíi jobo mbe de koɗ tuu no. Ɗiggi ɓaara diŋ ɗiggi hram no, á hee wo mokay go de frum jare, go de ɓlag rage doo tuu.

⁸ Á bay wo de ko faage jamn wa, mo ma de deelen bay ti blam ɓaara wa lay. Á seɗ wo diŋ ti faage ma de ndar gogn wo day je maga see we ni no, yiŋ de jam gà.

Jar mani Baa ko wo ɓlagge ɓaara

⁹ Diŋ wersen so ga mo ma de deelen le go hãã see wùr mono, mo ma keɗed bay daʼ wùr wa mono. Wùr hay gorge diŋ poɗag no, kola diŋ suŋgu no. Wùr hay gorge diŋ ngel teege no, kola wùr go de seege nen suŋgu no.

¹⁰ Wùr kiɗ ngel kiɗgi doo jar rẽwre wo nono, wùr kiɗ ngel kiɗgi doo jar maga bay wo de nen ti wa nono. Wùr leɗ go gesiŋ de ceg doo ga ngel go daymola yaw nono. De maga wùr mbe go jam tiʼ ɗa, kola wùr kol mbe go de maŋ jar ma de húulí wo tuu.

¹¹ Wùr hrag war doo này urse wo nono, wùr ngrum mbe jag ceɓ tuu doo kurgudu wo nono. Wùr hay gorge diŋ mo ma ti faage ɓe no ama sen meʼ gà ɓuy. Wùr hay gor pẽẽge no ama se maŋ ɓil wo go see wùr hãã.

¹² Werga debaycõõre wùrn raw wo debaŋ pel ɓo day ɓlagge wùr ʼwaa wo war ne wùr ti. Debaycõõre wùrn wo ti wùri, day wùr de ko re ma ti wùrn wo.

¹³ Á wo diŋ debaycõõre wo de jãɗge Manwuri, maŋ ge wer wo go see Baa wùr no, wo diŋ wãɗge wããre ma de ɓlagge wo de ti ngel graŋ, diŋ wããre geteʼ ma reʼ reʼn wo de ngrumgi jag ma jiilin wo.

¹⁴ Re sen kol go nen maga à nii mo ma ti faage ɓen wo go, mo ma keɗedn kol go ti jeŋ keŋkeŋ. Werga ti ngel tayge tin wo mono, cwãy bay ni wa so mo ma ti faage ɓen bay daʼ ngel ni wa lay.

Waŋkluu caa ge kiida jar wo

¹⁵ Cwãyn yee nen go, à frum je maga maŋ ɓil go see ɓlaggen hãã go. Manwur wo koge ɓe mokay wo daʼge ga mo ma de deele bay wa, gwaʼ diŋ ɓlagge tawa.

¹⁶ Á ko go ga jobo bay boŋ wa. Á go de car jiili ti maga je ma tosge ti kããran bay boŋ wa mono. Doo kay no so no, doo ɓe raw mbe caa war ɓe so, se raw mbe deŋ see ɓe ti keɗed ɓen so.

¹⁷ Á de hee keɗedn see ɓe doo ngoŋ nono, á hee gobogray pẽẽgen ti ɓe. Á hee õõbe saʼge heen ti ɓe doo õõbe ma kluu nono.

¹⁸ Á hã ge fen sag ma wosela yaŋ ne hẽn doo maga á hay nen daʼge ɓe nono : Kaŋ bagge põõ yaŋ ne jar giŋgi ɓen wo ti, hã ne jar hee ɓen wo diŋ fen maga á wo nen daʼge ɓe mo lay, ne jar ma ti kaalin wo diŋ fen maga á wo nen daʼge ɓe mo lay no.

¹⁹ À hẽẽ ge ɗúu Manwur yaŋ le nen wur bolaw hãã, à hẽẽ ge togoɗge ɓe yaŋ le nen wur botoŋ hãã lay. De maga je heen a ge we doo maarog ma de pããgen no, Nenterse Manwur haw ge nen ɓe yaŋ wo go.

²⁰ Je coo jar yaŋ le de age wer Siyoŋ wo de jar ni Jakob maga men wo joŋ debaycõõre ɓaaran wo go mono. Kay diŋ jag Manwuri.

²¹ Manwur wãã ga : Mokay diŋ tayge jag ɓi de ɓaara no : Nenterse ɓi maga de hayle ti ɓo mo lay, wããre ɓi maga ndi hã ra mo jag mo lay, sen taw ge wo go jag ɓo gà lay, go jag weere ɓo wo gà lay, go jag jar ni weere ɓon wo gà lay. Wããn diŋ Manwuri, patala tuu day go ma tum tuu lay.