ESAYI 58 - Tupuri Bible

Hẽẽge bii ma ti ngel ɓe no

¹ Ngar jag go de egre ɓo ɓuy, menn ti faage wa. Maŋ gẽẽge ɓo go ciŋ doo roo cõõ nono, ma sii debaycõõre mani jar ɓin wo ne hara, ma sii ɓlagge jar ni Jakob wo ne hara.

² Á kiɗ wo ndi tum nen naw, da wo tum ga saara mo hay ko faage ɓin wo. Á wiɗ wo ndi ga ndi mo ɓod faage wããre ma ti ngel ɓen wo ne saara. Á da wo ga saara mo yaʼ see saara see Baa doo wer jar po maga wo de sãy joŋ mo ma keɗed nono, doo wer jar po maga men wo mo ma ti ngel ɓe maga Baa ɓaara hay kaŋ ne hara pel go gà nono.

³ Á wãɗ wo ga : Daʼge wùr bà ti hẽẽge biin ni nà diŋ mayse ga ndo bay ko wùr wa lay la? Daʼge wùr bà ti ferge ti see wùr gesiŋ nà diŋ mayse ga se bay maŋ mopo nen ɓo wa mo la? Diŋ ga ti wur hẽẽge bii ɓayn mono, nday hã see ɓay diŋ ne fen maga ɗiggi ɓay da sen mono, nday joŋ bon jar joŋ joŋre ne ndayn wo debaŋ.

⁴ Nday hẽẽ bii nà ma joŋ dekwãy de kããra, ma leɗ kããra, ma mbar jar doo hun ɓay no. Nday bay hẽẽ biin doo maga à joŋ ti wur ɓen nono day à laa jag ɓay le ciŋ lay nà wa.

⁵ Á mbe mo nà diŋ hẽẽge bii maga ndi da seno noga mbe mo nà diŋ wur maga je táabay fer ti see ɓe mbe gesiŋ mo yawla? Á nà diŋ ga à mo jel ti gesiŋ tawa doo gusuri noga à mo suɗ ti tãy õõbe, go nen sããge mbe tawa tuu yawla? Á mbe mo nà diŋ maga ndo ɗe ga hẽẽge bii noga wur ma de cõõre jag Manwur mbe mo yawla?

⁶ Mokay diŋ hẽẽge bii maga sen coo jag ɓi mono : Pog see ɓo go jag hun no, naa jag jug go ne jar ma ti bon wo ti, men jar maga à de kaŋ cee ne hara ti wo go ti see ɓaara day daga à mo caa wer joŋge gebee jar ma honla ɓuy go.

⁷ Ɓes hoole ɓon de je maga koŋne mono day yãã jar coo maga bay wo de duuli wa wo liŋ. Hayga ndo ko jobo we go glog koɗ no, ni ndo hee õõbe ne hẽn see day tob je maga diŋ kaw ɓo go wa.

⁸ Mo so no ni poɗag ɓon naa ge nen yaŋ go doo waa ma de jag toŋ nono, ni wããge ɓon rug yaŋ go deparday. Keɗedn see ge yaŋ pel ɓo, togoɗge mani Manwurn joŋ ge yaŋ le nen blam ɓo koɗ moge.

⁹ Mo so no ndo ɗe ge ɗúu yaŋ day Manwur yiŋ gi jag yaŋ ne ndo. Ndo ngar ge jag yaŋ day se wãã yaŋ ga : Ndi la! Hayga ndo caa wer joŋge gebee jarn we go ni ɓo, ndo caa wer mbarge jarn wo we go de wããre ma de koɗ koɗn wo,

¹⁰ hayga ndo hã mo maga ndo dan de see ɓo we go ne je ma koŋne no, hayga ndo wùu je coon we go de rege no, poɗag ɓon naa ge yaŋ le go nen suŋgu no, suŋgu ma ti ɓon kol ge yaŋ go doo ngel ma ti wur ɗeger nono.

¹¹ Manwur kaŋ ge nen ɓo yaŋ ti faagen tumtum, á wùu gi ndo yaŋ go tum ti ngel ma bay regen wo day hã ge egre yaŋ ne ndo ti hõõgese ɓo. Ndo joŋ ge yaŋ doo pay sugnee maga à kag bii wer ɓe nono, doo gutugri maga wo tum de bii ɓil nono.

¹² À fer ge yaŋ bor tabul ma ɓaaɓaan wo, à fer ge bor tiŋ wo ti ngel maga jar ma ti wurpon hay ɓoɗ wo wer ɓaara ni nà nen doo ɓo. À ɗe ge ndo yaŋ ga je reb ywaalen wo, je ferge ɓod faagen wo, je ferge lag jar ti sir no.

Hẽẽge wur Saba ma ti ngel ɓen no

¹³ Hayga ndo ɗaw see ɓo we wur Saba ɓi no, ndo joŋ fen ɓo maga coo jag ɓo we ti wur ɓi ma bay ɗagn gà hayga ndo ko wur Saban we doo fen ma de woore, doo wur ma bay ɗag mani Manwur no, doo wur ma de togoɗge, day hayga ndo hoo sug we ti ɓe, ndo maŋ we diŋ blam faage ɓon gà ndo hã see ɓo we ne fen maga de cõõre jag ɓo gà lay, ne wããre ma de koɗ koɗn wo gà lay no,

¹⁴ mo so no, Manwur joŋ ge yaŋ diŋ fen ma de cõõre jag ɓo no day ndi hoo ge ndo yaŋ wo go ti ngel ma de farge ciŋ ma ɓil sirn wo. Ndi hã mo ma rege yaŋ ne ndo diŋ fen maga pan ɓo Jakob hay menn mono werga jag Manwur hay wããn go.