ESAYI 57 - Tupuri Bible

¹ À taw je ma keɗedn go, ama je maga mo ɗig re sen le jiili ɓe meʼ bay wa. À car ti jar ma de deelen wo go, ama je maga mo daʼ wer ɓe ga à naa je ma keɗedn go nà wer maga debaycõõre yãã ngel go debaŋ bay wa hase.

² Je maga de maŋ faage ma de deele wo ge yaŋ daʼ see ɓe, á wo ge go suugi ti ngel suuli ɓe no.

Baa ruu jar goŋ sõõren wo

³ Yaʼ we le la so, nday jar ni wãy sogway no, nday wer ma figliw ma joŋ figliw no!

⁴ Nday feg nà diŋ ti wose mo la? Nday hãɗ jag go kluuri day nday ɓoɗ trum nà ti wose mo la? Nday bay diŋ weere ma ti graŋ wo noga diŋ mbèere geteʼn wa yawla?

⁵ Nday giŋ go yeʼyeʼ wer koore terebenten, wer koo ma de sug ti ma honla ɓuy, nday ngaɗ weere bay wo go ɓil log wo, jag rum húulì wo.

⁶ Daʼge ɓon wo nà yoo húulì ma see koleɗ koleɗ ma ɓil logn wo, á wo nà diŋ nen fen ɓo no. Ndo kag yii ma siɗ jag ɓon wo nà ni, ndo wo hã hãge ɓon wo nà ni! Sen mo deŋ ɓuy so no ndi mbi nen ko decoo jobo pa yawla?

⁷ Ndo ʼwũy ngel suuli ma joŋ figliw ɓon wo go nà ti húulì ma de gẽẽre ciŋ hãã no, ndo ɗii wo ma joŋ siɗgi jag ɓon wo nà ni lay.

⁸ Go nen faale jag tiŋ ɓon wo de gefay ɓen mono, ndo yer mo ma ra ɗúu ɓon go ni. Werga ndo raw wo go hãã see ɓi ma men see ɓo go de koɗe, ndo raw ɗiigi day ndo yaʼ fen suuli ɓon go de diy. Ndo raw tay jag de jar maga ndo da suɗgi de ɓaara mono day ndo kaŋ nen ne fẽẽre sõõre ɓaaran wo ti.

⁹ Ndo raw wo daʼ Meleg de noo doo, ndo bag jag trusa ɓon wo go doo ɓo day ndo raw lag jar soole ɓon wo wo go hãã hãã. Ndo fer see ɓo go gesiŋ hase, hãã ndo kaŋ wer see ɓo wo go ni jar húulí nà doo kay no so no.

¹⁰ Ndo see debaŋ debaŋ kol go ma gayge, ama ndo laa mbo riŋgi ga ndo men seele sen mbo so gà. Ndo raw mbo ko see ɓo de egre ɗa, diŋ wersen ga ndo la gayge gà mono.

¹¹ Ndo hay san go doo wose noga ndo hay joŋ hẽẽne doo wose nen maga ndo jãɗ me, day ndo bay ferge ɗig ti ti ɓi wa so hase, day ndo bay de re ɓi meʼ wa so mo la? Á nà diŋ wer maga ndi mbi le ɓaa tuu baʼa, day ndo bay hẽẽ ndi wa so has nà diŋ wersen so yawla?

¹² Ndi ʼwaa ge ɓay yaŋ go ti keɗed ɓo seno, ti joŋre ɓon wo ga á bay wo diŋ fen kay ndo wa.

¹³ De maga ndo ngar ge jag ga fẽẽre yeɗe ɓo ma ngaɓan mo yãã wo ndo go mono, leege raw ge de ɓaara wer jag taʼ boŋ, à fug gi ra yaŋ wo go. Ane je maga yoŋ we see ɓi no, sirn joŋ ge diŋ ɓe day húulì ɓi ma bay ɗagn joŋ ge diŋ ma ɓe.

Daʼge jar ma de deelen wo

¹⁴ À wãã ge yaŋ ga : Muŋ we faage, mun we faage, ʼwũy we ne go, far we hõõre ma ti faage jar ɓin wo go!

¹⁵ Werga, je ma ciŋ hãã maga tiŋ mani ɓen diŋ ma tum day ɗúu ɓen bay ɗag wãã ga : Ndi de hayle ti ngel ma ciŋ hãã no, nen bay ɗag no. Ama ndi see je maga à joŋ bon ɓe mo lay, see je maga fer ti see ɓe gesiŋ nen ɗiggi ɓe mo lay. Sen nà ma teŋ nen je ma fer ti see ɓe gesiŋ no, ma coɓ nen jar maga à joŋ bon ɓaara mono.

¹⁶ Ndi bay de sãy sõõ ɓil ti tum wa, ndi bay de sãy caa jiili go ne jar ti ma tum de maga jar leɗ go gesiŋ day egre ɓaara horge go pel ɓi mo wa.

¹⁷ Ndi hay caa jiili go nà diŋ wer maga á mbe tum kaŋ re ne see ɓe ti de liggi koŋne ɓe no day ndi raw baa doo ne hẽn see. Nen sõõge ɓil ɓin ndi raw yoŋ see ɓi. De sen mbe ɓuy se raw mbe maŋ faage ɓen doo ga ɓil ɓe da nono wer ti graŋ ɓe no.

¹⁸ Ndi mbi de ko faage ɓen wo ama ndi pẽẽn ge mbi go. Ndi see ge yaŋ pel ɓe day ndi teŋ ge nen ɓe yaŋ go twore teŋ, saara de jar maga á wo de lawge de kããra mono.

¹⁹ Ndi hã ge siŋ togoɗge yaŋ ne jar jage. Jam, jam see je maga wo go hãã mo lay, see je maga la mbaŋ mo lay, wããn diŋ Manwuri. Ndi pẽẽ ge ra yaŋ go.

²⁰ Ama jar ɓlaggen wo doo maarog maga pud ciŋ day ham jag gà day bii ɓen ndar pããge wo le de blalaw ciŋ nono.

²¹ Jam jar ɓlaggen bay wo wa hase, wããn diŋ Baa ɓi no.