ESAYI 56 - Tupuri Bible

BAA RUU JAR ƁEN WO, KAY RA DE WÃÃRE PA Baa men jobo go faale gà

¹ Manwur wãã ga : Hoo we sug ti mo ma de deele no, joŋ we mo ma keɗed no. Werga pẽẽge ɓin go mbaŋ ma age, keɗed ɓin go maŋ ma age lay.

² Woore ti je maga joŋ doosen no mono, ti je táabay maga oo ti sen ngiŋ, hoo sug ti wur Saba no day ɓoʼ foo ɓe go gà ɗaw see ɓe see joŋre ma de ɓlaggen mono!

³ Daga waare maga de saʼ see ɓe see Manwurn mo riŋ ga : Manwur caa ge nen ɓi go sar de jar ɓen wo wa! Je ma de ndar ɓayn mo wãã ga : Ndi diŋ koo ma de heeg koɗ nà wa!

⁴ Werga, Manwur wãã ga : Jar ma de ndar ɓay maga hoo ge wo sug we ti wur Saba ɓin wo, maŋ wo we diŋ fen ma de cõõre jag ɓi no day lag wo we ngiŋ ti tayge jag ɓin no,

⁵ ndi boo ge ngel ra ɗúu ɓaara yaŋ wo ne hara ɓil tiŋ ɓin wo de kor ɓin wo. Ndi leʼ riŋ ɓaara yaŋ go de daŋ weeren wo de mayre biŋnin wo. Ndi kaŋ ge ɗúu ma tum maga taw go gà yaŋ ne hara.

⁶ Waare maga saʼ ge wo see ɓaara we see Manwur ma joŋ peele ne hẽne, ma da ɗúu Manwuri, ma joŋ ge diŋ weere jõõre ɓe jar maga hoo ge wo sug we ti wur Saba ɓi no day ɓoʼ wo foo ɓe go gà day lag ge wo we ngiŋ ti tayge jag ɓin no,

⁷ ndi hoo ge ra yaŋ le go ti húulì ɓi ma bay ɗag no, ndi hãge fruygi yaŋ ne hara ɓil tiŋ tosge ɓi no. Ndi yãã ge doo ɓaara yaŋ de siɗgi jag ɓaara maga à roɗ mo ɓen go ɓuyn wo de siɗgi jag ɓaaran wo yaŋ werga à ɗe ge tiŋ mani ɓin yaŋ ga tiŋ tosge ma wer jar wo ɓuy.

⁸ Wããre ma jag Waŋkluu, Manwur maga tay jar Israyel ma de welgen wo le ga : Ndi tay ge jar tigriŋ wo yaŋ le see jar ɓi maga wo go de tayge mo pa.

Baa ruu jar ma peln wo

⁹ A we le rege, nday ɓuy, nday nàyre ma yoofíin wo, nday ɓuy, nday nàyre ma yoowayn wo no!

¹⁰ Jar gor ngel go ne hẽn tin wo go rẽwre, á bay wo de ko mopo wa. Á wo ɓuy diŋ wayre ma jag baʼbaʼ wo, kãã wo ma biggi ti mopo gà. Á lwaʼ wo lwaʼge sag sag tuu, wo mbaara de suuli tiɗ tiɗi, da wo leɗge diŋ naa.

¹¹ Á wo diŋ wayre ma de koŋne ɓil ga wuɗ wo gà wo diŋ jar koɗge maga bay wo de ko laa wer fẽẽre wo wa. Á wo ɓuy see wo de ti ngel see ɓaara, wosela ɓuy de kaŋ ti nà diŋ ti daʼge ma ɓe de see ɓe boŋ tuu.

¹² Á wãɗ wo ga : Á we le ndi kiɗ yii ne nday, naa taɗ go de fẽẽre joge ma de hããn wo! Naa joŋ ge toŋ doosen no pa werga á gwaʼ wo ni debaŋ debaŋ ɗa mono.