ESAYI 55 - Tupuri Bible

Pẽẽgen go de koɗ ma jar ɓuy

¹ Nday ɓuy maga nday jwaale mono, a we le jag bii, hayba je maga bay de solay doo wa draʼa! Á we le, yee we ni nday re. Á we le, yee we yii wo de pãã bay solay lay, bay ti yoo wa lay!

² Wer mayse ga nday ngaɓ solay ti klew ngaɓge ma yee mo maga bay diŋ hoole wa yaw la? Wer mayse ga nday gay coo see ɓay diŋ wer mo maga wùu nday gà yaw la? Laa we jag ɓi ni nday re fen ma de el no, day nday soɓ ge mo ma de noon yaŋ.

³ Coʼ we sug ɓi day a we le see ɓi. Laa we sugi, day ni nday yãã ge maysee ɓay yaŋ go. Ndi tay ge jag yaŋ de ɓay ma tum, diŋ tayge jag ma joŋ ɓil de el see Dafidi, diŋ tayge jag ma de deele see ɓe.

⁴ Ko we, ndi hay kaŋn diŋ je sedewa see wer jar wo, diŋ je koɗ rage, je ɓod faage wããre ne hara.

⁵ Ko ga ndo ɗe ge wer jar maga ndo bay de ko rage wa wo yaŋ le, day wer jar maga bay wo de ko ndo wa ɗee ge wo yaŋ le see ɓo wer Manwuri, Baa ɓo no, je ma bay ɗag ma Israyel maga hã twore ne ndo mono.

Wããre Baa taw de koɗ gà

⁶ Kiɗ we Manwur de maga á yaŋ nen daʼge ɗa mono. Ɗen we de maga á yaŋ la maŋ ɗa mono.

⁷ Daga je ɓlaggen mo men faage ɓen go, je ma bay ngarn mo men ɗiggi ɓen wo go. Á mo fer le see Manwur ni se ko de coo ɓe yaŋ, á mo fer le see Baa naa maga bay gayge doo fug ɓil ne jar ti wa mono.

⁸ Werga ɗiggi ɓi bay wo doo ɗiggi ɓay wo no wa, faage ɓin bay wo doo faage ɓayn wo no wa. Kay diŋ jag Manwuri.

⁹ Doo maga ngel ma ciŋ go ciŋ ti tamsir hãã nono, faage ɓin wo go ciŋ ti faage ɓayn wo no lay, ɗiggi ɓi wo go ciŋ ti ɗiggi ɓay wo pa.

¹⁰ Doo maga bii Baa cwaa wo le ciŋ de gedembare day fer wo go ciŋ bay taŋ tamsir gà lay, bay rumgi ɓe gà lay, bay tĩĩ fẽẽre ti ɓe gà lay, bay hã mbèere ma joʼgen gà lay, bay hã hoole ma rege ne jar gà lay mono,

¹¹ wããre ɓi maga kal go jag ɓi nà doosen no lay : Á fer le see ɓi bay joŋ mopo gà bay joŋ dage ma ɓil ɓin gà lay. Á bag jag fen maga ndi hay wãã ti ɓe go ti ngel ɓe ɗa.

¹² Kidolgi, nday laa ge yaŋ le go de fruygi day ndi see ge yaŋ de ɓay nen jam. Húulì wo de ngel ma de farge ciŋ ʼwad ge wo war yaŋ pel ɓay, koore ma yooway mbar ge wo doo yaŋ ne nday ti.

¹³ Koo sipres kol ge yaŋ go ti ngel gusuŋ-gusuŋn wo, koo mirte gẽẽge yaŋ go ti ngel ɗewseŋ no. Sen joŋ ge diŋ fen ma ra ɗúu Manwuri, fen kaŋ nen jar ma tum sagsage.