ESAYI 54 - Tupuri Bible

Jerusalem fer yaŋ daʼ see ɓe go has so

¹ ʼWad mbo war de fruygi, ndo Jerusalem, wãy ma bay weere no, ndo maga ndo biŋ gà mono! ʼWad war blum no, joŋ few, ndo maga ɓil ma biŋgi leʼ mo ti boŋ gà mono! Werga weere mani wãy maga à hay men go joŋ ge wo ngaɓa de daŋ mani wãy maga hay de war mono, wããn diŋ Manwuri.

² Yaʼ diy tiŋ naw ɓon ni, yaʼn go kluu day wii gayre ɓen wa! Mbeɗ jag saale ɓen wo go, fer ter wer gefay ɓen go de ele!

³ Werga, ndo ɗee doo yaŋ go nen ti ɓaŋ war lay, nen ti ɓaŋ gùr lay. Jar ni ɓo yãɗ ge wo sir mani wer jar wo yaŋ go, day lag ge wo yaŋ go ɓi leege ma bay jar ɓiln wo.

⁴ Joŋ hẽẽne wa werga ndo joŋ ge nen sõõre gà so. Cog ti go gesiŋ wa so werga à mbuɗ gi foo ɓo gà so. Ndo yõõ ge ti sõõre maga hay joŋ ndo le ti tigli ɓo yaŋ go day ndo fer ge ɗig ti ti mbuɗgi foo maga à mbuɗ foo dewur ɓon mo gà so hase.

⁵ Werga je maga hay joŋ ndo mono, diŋ war ɓo no ɗúu ɓe ga Manwur Pantway no, day je coo ndon diŋ je ma bay ɗag ma Israyel no. Á ɗen ga Baa ma ti tamsir ɓuy no.

⁶ Manwur fer yaŋ le baa ndo liŋ doo wãy maga à hay tobn go day se kol go nen lawge nono. À bus mbe wãy maga ndo hay dan le ti jõõ ɓo go yawla? Wããn diŋ Baa ɓo no.

⁷ Ndi hay tob ndo go ma naw mbag koɗe ama ndi fer ge ndo yaŋ le liŋ de dage jiili debaŋ.

⁸ Wer maga jiili ɓi hay caa go debaŋ ndi hay yoŋ see ɓi go ne ndo ma naw mbage, ama diŋ de dage ma tum no, ndi fer ge yaŋ ko decoo ɓo. Wããn diŋ Manwuri, je coo ndo le no.

⁹ Ndi joŋn ge yaŋ doo ma ti wur mani Nowen nono : Ndi hay hãʼ go ga te bii ma nen Nowen maŋ ge go ne tamsir ti gà so hase. Doosen no lay, ndi hãʼ go pa ga ndi caa ge jiili go mo ti gà so, ndi kaŋ re ne ndo ti gà so has lay.

¹⁰ De maga húulì mo mbug bà wo go noga húulì ma lublub mo leɗ bà wo go gesiŋ layblaʼ no, ɓil de el ɓin maŋ ge wer wo go see ɓo gà tayge jag ɓi ma jam gleŋ ge gà lay. Wããn diŋ Manwur ma ko decoo ɓo no.

Woore Jerusalem ma wurpo no

¹¹ Ndo ɓi leege ma nen coocoo no, ndo maga leege gay ndo go day je coɓ moge bay wa no, ko so, ndi her ge húulì jaspe yaŋ yoo húulì ma de boo ndon wo, ndi ɓoʼ ge wer ɓo yaŋ de húulì Safiri.

¹² Ndi bor ge ngel gor ngel ɓo ma de gẽẽre ciŋ wo ge de húulì rubisi, joŋ ge faage ɓon wo de húulì eskarbukle wo. Ndi ʼwũy gi ɓil ɓo yaŋ go de húulì ma de woore wo.

¹³ Weere ɓon wo ɓuy joŋ ge wo yaŋ diŋ weere lakol Manwuri day jar ni ɓon nges wo yaŋ go ngesge de horoge.

¹⁴ Ndo joŋ ge yaŋ de coɓge wer joŋge fẽẽre ti ngel ɓe no. Jobo joŋ ge doole ɓo gà so, fen maga ndo joŋ ge hẽẽne ɓe bay ge wa so, mo ma ndar jiili ɓo joŋ ge gà lay werga mopo duʼ ge ndo meʼ gà hase.

¹⁵ À mo leʼ bà ndo durgi layblaʼ no, sen a ge le bay ti jag ɓi wa. Wosela ɓuy maga leʼ ge ndo we durgi mono, je sen leʼ ge yaŋ go gesiŋ pel ɓo.

¹⁶ Koɗa, joŋ je torge maga fid wùu ti hegre day tor fẽẽre durgi ma ti ɗiggi ɓen wo nà diŋ ndi, ama ndi de ma joŋ je ɓlag jarn le go maga á mo a go ndreɗge ɓe lay.

¹⁷ Fen durgi maga à toon see ɓo mo ɓuy joŋ ge diŋ mopo gà. Je maga bulgi jag ma caa kiida ne ndo ti mo ɓuy, ndo bawn ge de wããre hun ɓe no. Mo nà diŋ nen mo mani weere jõõre Manwurn wo, mono diŋ koge ngar maga ndi koge ngar ɓaara mono. Kay diŋ jag Manwuri.