ESAYI 52 - Tupuri Bible

Jerusalem fer ge yaŋ go ʼwũygi

¹ Pũy go! Pũy go! Siyoŋ, grag see ɓo go de egre ɓo no! Her õõbe ɓo ma de wooren wo ti so, Jerusalem, ɓi leege ma bay ɗag no. Werga, je ma bay caa ɓĩĩni noga fen ma de meyeɗe kal ge le ɓil ɓo gà hase.

² Poʼ ɓurgi ma see ɓon go, ur go ciŋ, hay go dlah so Jerusalem! Pog saale ma soole ɓon wo go, ndo may ma Siyoŋ ma ti paglam no!

³ Werga Manwur wãã ga : À hay yee nday wo go de koɗe, day à fer ge le coo nday de solay gà lay.

⁴ Werga Waŋkluu, Manwur wãã ga : Taŋgu, jar ɓin hay joŋ wo tiŋ le Ejipte, blam ɓe je Asirin raw mbe joŋ bon ɓaara ti reʼ tuu.

⁵ Day patala ndi joŋ bà nà may pa la? Kay diŋ jag Manwuri. De maga à hay hoo jar ɓin wo mbaara de koɗ tuu mono, jar joŋ bon ɓaaran hay wo ʼwad war de fruygi. Kay diŋ jag Manwuri. Day tum nen naw maga à hay mbuɗ foo ɗúu ɓi.

⁶ Diŋ wersen jar ɓin ko ge wo ɗúu ɓi yaŋ, á ko ge wo yaŋ ti wur sen so ga diŋ ndi, ndi wãã wããre, day ndi la so.

Manwur fer ge yaŋ hayge Jerusalem

⁷ Ɓaale je maga wo de soole wããre ma de cõõren wo, day wo sii re jam go jag ciŋ kloŋ wo de woore ti húulì wo ɗala! Ɓaale je soole wããre ma de cõõre debaŋ ga sii re pẽẽgen go jag ciŋ kloŋ, day riŋ Siyoŋ ga Baa ɓon yaŋ diŋ waŋ, wo de woore ɗala!

⁸ Á mo nà diŋ gẽẽge jar gor ngel ɓon wo! Á maŋ wo gẽẽge ɓaara ciŋ, ʼwaa wo war blumn jag taʼ boŋ ɓuy werga á wo de ko Manwur le de ferge Siyoŋ de nen ɓaara.

⁹ ʼWaa we war blum go jag taʼ boŋ ɓuy nday tabul ma Jerusalem no! Werga Manwur de teŋ nen jar ɓen wo, a le de ferge coo Jerusalem le.

¹⁰ Manwur naa nen doo ɓe ma bay ɗagn go ne wer jarn wo ɓuy day jar ma ti jag sir tawge wo ɓuy ko ge wo pẽẽge mani Baa naan yaŋ.

Men we Babilon go

¹¹ Raw we, raw we so, à we le go! Baa we doo ti fen ɗag wa hase! Laa we go, menn we go! Fãã we see ɓay go, nday maga nday laa le go de gesããge mani Manwurn wo ti mono!

¹² Laa we le go deparday wa, raw we de ɗeere wa, werga Manwur de seege pel ɓay, Baa ma Israyeln joŋ ge yaŋ diŋ je koɗ glog ɓay no.

Bon mani wejõõ Manwur no

¹³ Ko we ga wejõõ ɓin joŋ ge joŋre ɓen yaŋ de ɗeŋ. Á gẽẽ ge yaŋ ciŋ, seɗ ge yaŋ de pele, day kol ge yaŋ go ciŋ ti jar hãã.

¹⁴ Doo maga jar debaŋ hay ngil wo ti ɓe wer maga nen ɓe hay bay doo ma je táabay no wa so, see ɓe hay bay doo mani jar ni Adam wo wa mono,

¹⁵ jar ngil gi wo yaŋ debaŋ pa werga á joŋ ge fen sii jag ma fãã wer jar wo go debaŋ yaŋ. Waŋre kuɓ wo doo yaŋ go jag ɓaara werga á ko ge wo fen maga à sii ti boŋ gà wo yaŋ de nen ɓaara, á laa ge wo wer fen maga á hay laan wo de sug ɓaara gà wo yaŋ.