ESAYI 5 - Tupuri Bible

Pay tlalum mani Manwur no

¹ Mo so no ndi ʼwaa ge siŋ mani je ma dage ɓin yaŋ Ne bar ɓin ti pay tlalum ɓe no. Bar ɓin hay de kaŋ pay ɓe ti ɗiŋriŋ ma de rumgi.

² Se kal parge ɓe go, bag ti húulìn wo go, Day raw peɗ koo tlalum ma de ɗúu ni. Se kal boo tiŋ ma de gẽẽre ti gisiɗgi ɓe, Tee tuu ma yuu yii ni lay. Se raw kaŋ ɗiggi taʼ ga á leʼ tlalum ma de woore yaŋ, Ama se raw leʼge diŋ leʼge ma de gofoʼge wo.

³ Doo kay no mo so, nday jar ma de tiŋ Jerusalem no, Nday jar ma ti sir Juda no, patala cag we mbay re Ma ti holaŋ wùr de pay tlalum ɓin so!

⁴ Mayse gwaʼ go ga ndi joŋn see pay tlalum ɓin gà pa la? Wer mayse ga ndi hay kaŋ ɗiggi ɓi taʼ ga á leʼ tlalum yaŋ me, Day se leʼ diŋ leʼge ma de gofoʼge wo la?

⁵ Doo kay no so, ndi kaŋ ge nen ɓay yaŋ ti fen maga Ndi da joŋ pay tlalum ɓin de ɓe mono. Ndi hog ge laɓ ma ti ɓen go nen maga horog mo reen wo go. Ndi car ge jag ywaale wo yaŋ ti kor ma ti ɓe no nen maga Jar mo laa wo go dagge ɓe.

⁶ Ndi koln ge yaŋ go diŋ bas ɓe. Jobo leɗ ge doo ɓe gà lay, Jobo jee ge wer ɓe gà lay. Ɗewseŋ wo de hõõre tĩĩ wo yaŋ go ni, Day ndi hã ge jag ɓi yaŋ go ne swaare wo nen maga A mo men wo baa le rage ti ɓe wa lay.

⁷ Kidolgi pay tlalum mani Manwur Pantway nà diŋ tiŋ mani Israyel no, Day jar Juda wo nà diŋ koo ma de peɗge maga se hay senaʼge ɓe mono. Á hay de kaŋ ɗiggi ga á joŋ wo fen ma ti faage ɓe yaŋ, Kola diŋ fen ma bay blam no. Á hay kaŋ ɗiggi ti fen ma keɗed no, Kola diŋ war ti joŋge nen jar no.

Re ti jar Juda wo

⁸ Re ti jar maga jwag wo tiŋ jar wo go de payre jar wo, Go ti kããra hãã ngel gwaʼ go doo ɓaara yweg taʼ gà mono. Ngel tiŋ mbe ɓil sir nà diŋ ma ɓay tawa so!

⁹ Mokay diŋ fen maga Manwur Pantway hay naa nen ɓe go me mono : Kidolgi tiŋ se ngaɓan ɓlag ge wo go, Tiŋ se ma kluuri de wooren gwaʼge wo go bay jar ɓili.

¹⁰ Saale pay tlalum swaʼ daʼ ge diŋ lidir yii doo dwee tuu, Jobo joʼ ge mbe coore gesiŋ klew kisi, se wo ge weege klew hwale tuu.

¹¹ Re ti jar maga hoo wo go ciŋ de jag toŋ mbuh ma kiɗ, Fẽẽre joge ma taɗ jarn wo, ti jar maga mbaara de kiigi de suŋ tiʼ i, Werga yii go de taa rage mono.

¹² Dilna wo de mandilna, tembale, síilí wo de yii, Wo diŋ fẽẽre ma hã fruygi ne hara ti few ɓaaran wo. Ama nen ɓaara bay baa joŋre mani Manwurn wa, Saara bay ko joŋre ma doo ɓen wa lay.

¹³ Diŋ wersen à hoo ge jar mani ɓin wo yaŋ wo go Ti daŋgay diŋ wer debay koge. Biŋni ɓaaran laɓ ge wo go doo koŋne day jar sir ma ɓuy, Laɓ ge wo go doo jwaale lay.

¹⁴ Diŋ wersen so ga tuu húulí go de buŋ jag ɓe hwiŋ kaʼa, Hãʼ jag ɓe go twore hãʼ mono. Biŋnin wo de jar sirn cwaa wo ni de ngarge jag no, de wose la ɓuy maga hay joŋ Hragge ɓi leegen ni mono.

¹⁵ Diŋ wersen je tabayn fer see ɓe go gesiŋ ɓegdeʼ, Á kaŋ ge sõõre go ne see ɓe ti. À fer ge jar maga far wo ti see ɓaara ciŋ yaŋ go gesiŋ.

¹⁶ Manwur Pantway go de daŋ jar ciŋ diŋ wer joŋ ge fen ma ti faage ɓe no. Baa ma bay ɗagn go ti nen diŋ wer keɗed no.

¹⁷ Mansããre koɗ ge wo yaŋ go ti ngel rege ɓaara no, Waare re ge wo horog maga jar egren men ra wo go wo yaŋ go.

¹⁸ Re ti jar maga wo de hã see ɓaara diŋ ne joŋge ɓlagge, Ga kog wo ɓlaggen le wer ɓaara doo pus durgi nono,

¹⁹ Á wãɗ wo gana : Daga Baa mo joŋ de parday, Mo yaʼ wùu ne joŋre ɓen wer nen maga wùr mo kon ɗa so! Daga fen maga je ma bay ɗag ma Israyel ɗign joŋge Mo kos go day mo baa jag go ni wùr daʼ wer go ne hẽn so!

²⁰ Re ti jar maga ɗe wo ɓlaggen ga de ele day ɗe wo de eln ga ɓlagge mono! Ti jar maga kol wo suŋgun go poɗage, Kol wo poɗagn go diŋ suŋgu, Kol wo reen go diŋ foo day kol foon go diŋ reen mono!

²¹ Re ti jar maga ko wo see ɓaara de ɗeŋ mbe de see, Ɓaara tuu day ko wo see ɓaara diŋ jar ma de ti ngel mono.

²² Re ti jar maga wo diŋ blumri ti joge yii, Ga daŋ wo go ti kaŋge fẽẽre joge ma taɗ jarn wo mono!

²³ Re ti jar maga kuɓ wo nen go ti je maga re de bagge Ɓe wer maga á hã mandekoɗ ne hara day joŋ wo nen Je ma keɗedn ti keɗed ɓen mono!

²⁴ Diŋ wersen so, doo trum wùu maga cegaw dramgi nono, Doo fíi maga á laan tuu roɗ go hemes no mono, Kããge ɓaara joŋ ge yaŋ go doo mo ma de sõʼge no lay, Day fuɗgi ɓaaran dwas ge yaŋ go doo ɓurgi no lay. Werga, á hay tob wo jag liŋgi mani Manwur Pantwayn go, Hay ɓoʼ wo foo wããre mani je ma bay ɗag ma Israyeln go.

Manwur wii doo ne jar ɓen wo

²⁵ Diŋ wersen jiili Manwur roɗn go ti jar ɓen wo, Á maŋ doo ɓe ciŋ see ɓaara mbar rage. Húulì crag wo go day húulí jar mbe wo go sulul deŋ doo jããre ma blam faage wo nono. Bà mbe de sen ɓuy bagge põõ ɓen bay de ham jag wa, Doo ɓe mbe de maŋge ciŋ kay ɗa pa.

²⁶ Á maŋ drapo ciŋ ne jar ma hãã hãã wo day ʼwaa flew Le ne jar maapo wo le hãã ti jag sir tawge. Saara le de seege deparday yaw, See ɓaara go see ɓaara gofaʼ gofaʼa.

²⁷ Je ma de gayre noga leŋ bay ni ɓaara wa, nen ɓaara joŋ naa gà lay, Saara leɗ naa gà lay. Jobo yoo ɓaara bay go de ngloʼ jag mblaaga ma sag ɓen wa lay, bay go de pog jag saale taarag ɓen wa lay.

²⁸ Waa ɓaaran wo go de baa nee ti, toŋwa ɓaaran wo go de ɓoʼ ti. Ndo daʼ ɓaale piiri ɓaaran wo ndo ga húulì, Ɓaale pus durgi ɓaara wo doo swìl nono.

²⁹ Samge ɓaara doo roo man mingir nono. Á bũɗ wo doo weere mingir wo nono, car wo põõ. Á baa wo này ɓaara no, raw wo de ɓe day je ma age yãã ge ɓe go doo ɓe bay wa.

³⁰ Ti wur sen mono, à sam ge yaŋ le ne hẽn ti doo carge põõ maarog nono. Á ko ge sirn yaŋ, se ɓoʼ ge suŋgu go ti, Coocoo baan go day poɗag kol ge go suŋgu doo leege Baa maga fid gi mono.