ESAYI 47 - Tupuri Bible

Sir Babilon mbuɗ gi fuy go

¹ Ɗii go gesiŋ, hay go nen siri, maytigli, may ma Babilon no! Hay go nen siri, bay paale waŋ, ndo may mani jar Kalden wo! À ɗe ge ndo ga may ma de woore noga may ma fruy jarn gà so hase.

² Hoo niini ma ɓogn wo, yaʼ naŋ coo. Hoo õõbe ma nen ɓon go, hoo jag rob ɓon go ciŋ, men ɓaale ɓo go de koɗe ma caa maarog ma de pããregen wo!

³ À daʼ ge wer yaŋ go ne glog koɗ ɓo no, à ko ge ngel sõõre ɓon yaŋ go. Ndi saʼ ge heen yaŋ go, ndi wii gi kayge doo je táabay gà.

⁴ Je yãã wùrn à ɗen ga Manwur Pantway no, je ma bay ɗag ma Israyel no.

⁵ Hay go gesiŋ bay jage, see wo nen suŋgu no, ndo may mani jar Kalden wo! À ɗe ge ndo ga may ma wãã wããre sir waŋre wo gà so hase.

⁶ Ndi hay caa jiili go ne jar ɓin wo ti, ndi hay mbuɗ fuy tway mani ɓin go day ndi raw hã rage go ne ndo ɓi coo doo, ama ndo ko decoo ɓaara gà. Ndo raw ɓoʼ jug ɓo ma põõge debaŋ ne je tããben soole.

⁷ Ndo hay wããge ga : Ndi joŋ ge mbi tum diŋ je wãã wããre jare! Ndo kaŋ ɗiggi ɓo ti fẽẽre sen wo gà ti ɓo laa ferge ɗiggi ga fẽẽre sen maŋ ge wo jag yaŋ go gà.

⁸ Coʼ sug mo ma kay patala so ndo may ma de fruygi maga go de hayle de yõõ ti, day ɓil ɓo riŋ mo le ga : Diŋ ndi, diŋ ndi mbi boŋ tuu, ndi gwaʼ ge go dewur gà lay, bay weere gà lay mono!

⁹ Re se ɓogn la caa ge wo ndo yaŋ go jag taʼ boŋ nen wurpo boŋ, diŋ de bay weeren wo de dewur no. Á cwaa ge wo yaŋ mo ti doo ga ɓil da nono, halge ɓo ma ngaɓan wo de egre joŋge sogway ɓon kãã ge wo see ɓaara gà.

¹⁰ Ndo hay de hã see ɓo diŋ ne debaycõõre no. Ndo hay wããge ga : Jobo bay ko mege wa. Ɗeŋ ɓon wo de koge re ɓon fĩɗ wo ti ɓo go. Ɓil ɓo hay le riŋ moge ga : Diŋ ndi, diŋ ndi mbi boŋ tuu!

¹¹ Re caa ge ndo yaŋ, diŋ re maga naa wer doo ɓo gà. Re leʼ ge yaŋ mo ti, diŋ re maga ndo ɗig ga á hay tĩĩ la tĩĩgi la gà. Fen ɓlag jarn cwaa ge mbe ne ndo ti tuu, naa ge mbe ndo doo tuu.

¹² Hay mbo yeʼ joŋge diŋ halge ɓon wo de sogway ɓo ma ngaɓa maga ndo hã see ɓo le go ne hara hãã ti jõõ ɓo mono. Tiga ndo daʼ bà see ɓo yaŋ ni yaw noga ndo kol ge bà yaŋ joŋ hẽẽne ne jar so blaʼ no!

¹³ Ndo gay see ɓo go de kaŋ halge no. Daga á mo hoo wo go ciŋ day mo yãã wo ndo go so, jar se maga riŋ wo ga mopo bay de ẽg saara nen ngel ma ciŋ wa, jar se maga kaŋ wo nen ti gér wo day wãɗ wo fen maga joŋ ge yaŋ wo pel see kolge few ciŋ mono!

¹⁴ Koɗa, á wo doo fíi maga yãã wùu go fãd nono. Á yãã ge wo see ɓaara go jag wùun gà werga á bay doo jaŋre wùu ma ɓoɗ hoole ɓaaran no wa, bay doo wùu ma de ngalge maga saara lag jag ɓe no wa.

¹⁵ Jar maga ndo hay gay see ɓo wer ɓaara kol ge wo go nà doo kay no so no. Jar maga ndo hay joŋ trere de ɓaara hãã le ti jõõ ɓo wel ge wo yaŋ go, wosela maŋ ge faage ɓe, je ma yãã ndo go joŋ ge gà hase.