ESAYI 43 - Tupuri Bible

Manwur boŋ diŋ je yãã Israyel no

¹ Patala Manwur maga hay joŋ ndo Jakobe, maga hay ʼwũy ndo Israyel wãã so ga : Joŋ hẽẽne wa werga ndi fer we le coo ndo, ndi hay ɗe ndo de ɗúu ɓo. Ndo diŋ ma ɓi.

² Ndo mo caa bà bii, ndi joŋ ge yaŋ de ɓo, ndo mo car bà maarog ma de pããrege wo, saara maŋ ge go mo ti gà. Ndo mo see bà nen wùu, ndo roɗ ge go gà day trum wùu saw ge ndo gà.

³ Werga ndi diŋ Manwuri, Baa ɓo no, je yãã moge no. Ndi hã Ejipte go coo ti ɓo, hã Etiyopi wo de Seba go ti ngel ɓo.

⁴ Sen nà werga ndo diŋ fen ma de ɗúu nen ɓi, werga ndo diŋ mo ma de togoɗge, ndi da ndo. Diŋ wersen ndi hã jar téebeere wo go ti ngel ɓo, hã wer jar wo go maga ndo mo gwaʼ tenene.

⁵ Joŋ hẽẽne wa werga ndi yaŋ de ɓo. Ndi fer ge jar ni ɓo ma nen wur botoŋ wo yaŋ le day ndi tay nday yaŋ le nen nen wur bolaw.

⁶ Ndi wii gi ɓaŋ gloŋhwede yaŋ ga : Hã ra le go! Ndi wii gi ɓaŋ wãyban yaŋ ga : Caa waŋ ti ɓaara wa. Fer weere ɓi ma hãã hãã wo le, fer mayre ɓi maga wo wo go ti jag sir tawgen wo le,

⁷ fer wosela ɓuy maga de ɗúu ɓin jage day ndi hay joŋ ne, ʼwũy ne, day kneʼn ma naa nen togoɗge ɓin go mono le.

Jar Israyel wo diŋ jar sedewa Baa

⁸ Daga á mo laa jar ma rẽwre maga mbaara de nen ti wo le go, jar ndigriŋ maga mbaara de sug ti wo le go lay.

⁹ Daga wer jar wo ɓuy mo tay wo le go, jar wo ɓuy mo joŋ wo togle le ne kããra. Wose yoo ɓaara hay wãã we go ti fẽẽre sen wo la? Ma hon hay had wo naa we de fẽẽre maga hay joŋ wo le go taŋgu mo la? Á mo naa wo nen sedewa ɓaaran wo go day á mo wãã wo fen ma ti ngel ɓen go so! Á mo wããn wo nen maga à mo laa jag ɓaara go ga á cwãy ɗa so la?

¹⁰ Jar sedewa ɓin wo diŋ nday. Kay diŋ jag Manwuri, diŋ nday de we jõõ ɓi maga ndi hay hoo nday mono, nen maga nday mo ko ne, nday mo hã ɓil ne ndi day nday mo laa wer ɓe so ga á diŋ ndi. Go taŋgu ɓi baa po hay bay de joŋge wa, go blam ɓi baa ma tigriŋ joŋ ge gà lay.

¹¹ Diŋ ndi, ndi diŋ Manwur no, go faale ɓi je yãã jar ma tigriŋ bay wa so.

¹² Diŋ ndi, ndi hay wãã, ndi hay yãã jar go, ndi hay wãã go ti fẽẽre wo pel bole. Ndi bay yoo ɓay diŋ baa ma waare wa, nday diŋ jar sedewa ɓi. Kay diŋ jag ɓi Manwuri, Baan nà diŋ ndi.

¹³ Ndi diŋ Baa le go taŋgu maga à tĩĩ wer kee naw mono, jobo maga yãã kẽẽ go doo ɓi bay wa. Ndi joŋ ge mopo yaŋ, wose day dig gi ndi yaŋ la?

Ndi ɓoʼ jobo yaŋ wo ne nday

¹⁴ Manwuri, je maga fer le coo nday, je ma bay ɗag ma Israyeln wãã ga : Ndi hay ɓoʼ jobo wo ne Babilon ti nà wer ɓay. Ndi ɓoʼ ge bii ɓaara, jar se ma ɗeegen wo mo tiʼ no, ɓoʼ ge bii jar Kalde sen wo yaŋ de daage ɓaara ma joŋ ɓil ɓaara go feh fehn wo.

¹⁵ Ndi diŋ Manwuri, je ɓay ma bay ɗag no, je joŋ Israyel no, Waŋ ɓay no.

Faage ma defay ma ti puuli no

¹⁶ Manwur maga ɓoʼ faage ciŋ ti maaroge, soo blam faage ciŋ ti bii ma kluuri wo,

¹⁷ Manwur maga wo kaŋ pus durgi wo de piiri wo de jar durgi wo de blumri durgin wo jag jaw wãã ga : Á suɗ wo, hoo wo go ciŋ gà so hase. Á huɗ wo jag go doo wùu nono, á roɗ wo go doo saale ma ɓil lampa nono.

¹⁸ Manwur wãã ga : Fer we ɗig ti ti fẽẽre maga joŋ wo le go taŋgu mo wa, kaŋ we ti ti mo ma ɓaan wa so hase.

¹⁹ Ko we, ndi de ma joŋ mo ma defay, á go patala de tĩĩ wer yaw, day nday bay de daʼ wer ne hẽn wa ɗa yawla? Ndi ɓoʼ ge faage yaŋ ɓil puuli no, ndi ɓod ge blam maarog ma de pããrege wo yaŋ ti laalen wo.

²⁰ Nàyre ma yoofíi togoɗ ge wo ndi yaŋ, diŋ wé wo de gii wo. Werga, ndi maŋ ge bii yaŋ go ti puuli no, ndi ɓod ge blam maarog ma de pããrege wo yaŋ ti laalen wo maga jar mani ɓin wo, jar ɓi maga doo ɓi leʼ ti ɓaara mo jo wo bii ni.

²¹ Jar maga ndi ʼwũy ra go ma ɓi naa ge wo nen togoɗge ɓin yaŋ go.

Kiida ma ti holaŋ Baa wo de Israyel no

²² Ndo hay ɗe nà diŋ ndi gà o Jakobe werga ndo ga ndo gay doo ɓi o Israyele!

²³ Ndo hay joŋ siigi jag maga à roɗ mo ɓen go ɓuy ne ndi de weere sããre ɓon wo gà. Siigi jag ɓon hay bay wo ma hã togoɗge ne ndi wa. Ndi hay riŋ ga ndo mo hã fẽẽre ne ndi ɓegdeʼ gà. Ndi gay coo ɓo de roɗge fen fõõre wo ne ndi gà.

²⁴ Ndo hay yee fíi fõõren le de suŋgu ne ndi gà day ndo hay wùu ndi go de noo nàyre siigi jag ɓon wo gà. Ama, ndo hay joŋ doole ɓi ti ɓlagge ɓon wo, ndo hay gay ndi de joŋge fẽẽre ma ti ngel ɓen gà ɓon wo.

²⁵ Diŋ ndi, ndi tag debaycõõre ɓon wo go wer dage ma ɓil ɓi no, ndi fer ge ɗig ti ti ɓlagge ɓon wo gà so.

²⁶ Fer ɗig ti ti fen maga ndi hay joŋ mono, naa lag cag reen de kããra. Wãã mbo ti see ɓo tuu ma yãã see ɓo go.

²⁷ Pan ɓo ma taŋgun hay joŋ ɓlagge, jar fer jag ɓon joŋ wo ti graŋ go see ɓi.

²⁸ Diŋ wersen ga ndi ɓoʼ foo waŋre ma ti ngel ma bay ɗagn wo go mono. Ndi hã Jakob go maga tawn go, hã Israyel go maga lasn go.