ESAYI 42 - Tupuri Bible

Wejõõ Manwur no

¹ Ko we wejõõ ɓi maga ndi go de oole wer ɓe sog boŋ tuu mono, je maga ndi maŋn go day maysee ɓi go de fruygi ti ɓe debaŋ mono. Ndi de kaŋ Nenterse ɓi ne hẽn ti day se naa ge nen fen ma ti faage ɓen ne wer jar wo ra.

² Á ngar ge jag gà lay, maŋ ge gẽẽge ɓe go ciŋ kloŋ gà lay day à laa ge gẽẽge ɓe go ti faage wo gà lay.

³ Á haw ge fǐiri bii ma de laɓayn go gà ii gi jag wùu maga de yããge es es go gà lay. Á naa ge nen mo ma ti ngel ɓe cwãyn yaŋ go.

⁴ Á gay ge ti faage gà lay, mbuɗ gi nen blam gà lay hãã se kaŋ caage kiida ma ti ngel ɓen go ciŋ ti sir la ɗa, day jar ma ti kaalin gor wo jag liŋgi ɓen yaŋ.

⁵ Wãã doo kay nono diŋ Baa, Manwur maga joŋ ngel ma ciŋ day cor fẽẽre wo le ciŋ ni mono, diŋ Baa maga joŋ sir de fẽẽre maga tĩĩ wo ti ɓe, day hã tenen ne jar téebeere ma ɓil ɓen wo, hã egre ma tenen ne jar maga raŋ wo ti ɓe mono.

⁶ Ndi Manwur ndi hay ɗe ndo maga ndo mo joŋ fen ma keɗed no, day ndi raw ɗaw doo ɓo ciŋ. Ndi de gor ti ɓo day ndi kaŋ ndo maga ndo mo tay jag jar no, maga ndo mo hay diŋ poɗag ma wer jar wo,

⁷ ma buŋ nen jar rẽwre wo go, ma ɓoʼ je ma de baa ge ti daŋgayn go, ma laa jar maga wo ti paglam nen suŋgu wo go.

⁸ Ndi diŋ Manwuri, ɗúu ɓi nà doosen nono. Ndi hã ge togoɗge ɓin go ne je tigriŋ gà ndi hã ge hooge sug maga à hoo ti ɓi go ne fodo ma de ceɗgen wo gà.

⁹ Ko we ga fẽẽre ma taŋgun hay bag wo jag go day ndi sii ma defay wo ne nday pa. Taŋgu maga á bay wo tĩĩ joŋ ge ɗa mono, ndi wãã ra maga nday mo laa ra go bole.

Siŋ ma defay no

¹⁰ ʼWaa we siŋ ma defay ne Manwuri, togoɗ we ne le ti jag sir tawge hãã nday maga nday yor ciŋ ti maaroge, day nday go de bagge ɓe mono, nday kaalin de jar ma ti ɓayn wo no!

¹¹ Daga puuli de ɓi leege ma ti ɓen wo de prog maga jar Kedar wo de tiŋ ni mo maŋ wo gẽẽge ɓaara go ciŋ kloŋ! Daga jar maga wo Sela mo yor wo ciŋ de ware! Daga tipẽẽge ti húulì mo ʼwad wo war de fruygi.

¹² Daga á mo hã togoɗge ne Manwuri, day kaali mo ngar wo jag de maŋge ti ɓe ciŋ no.

¹³ Manwur kal le go doo blum nono, á baa wùu joŋre ɓen doo je ma de ko durgi nono, á ngar jag wo, swele day naa blum jar hee ɓen wo.

De el maga Baa joŋn ge see jar mono

¹⁴ Ndi hay mbi le ɓaa baʼa, ndi mbi baʼa, ndi ɗaw mbi see ɓi, ndi ndum doo wãy maga de biŋgi nono. Egre ɓi hoo go, ndi kol go car hlew lay.

¹⁵ Ndi ɓlag ge húulì wo yaŋ go de ngel ma de farge ciŋ wo, ndi hig gi fen de pãy ma ti ɓaaran wo go. Ndi kol ge maarog ma de pããregen wo yaŋ go diŋ kaali wo, ndi õg ge mangloŋren wo yaŋ go.

¹⁶ Ndi kol ge jar rẽwre wo yaŋ go seege ti faage maga á hay bay wo de koge ɓe wa. Ndi see ge yaŋ de ɓaara ti blam faage maga a hay wo de yõõge see ɓaara mono. Ndi kol ge suŋgun yaŋ go ne hara pel diŋ poɗage, kol ge sir ma de tuun wo yaŋ go ne hara pel diŋ sir ma bay tuu. Kidolgi mono diŋ fen maga ndi joŋn ge mono, day ndi tob gerage go gà.

¹⁷ Á dag ge wo yaŋ de gloge, wuɗ gi wo ti yaŋ go doo sõõre, jar se maga kaŋ wo ɗiggi ɓaara ti fodo ma de ceɗgen wo, jar se maga wii wo boo ma de yorgen ga : Nday diŋ baa wùr wo mono.

Wer jar ndigriŋ ma rewren wo

¹⁸ Nday ma ndigriŋ no, laa we! Nday ma rẽwre no, kaŋ we nen ɓay ni nday ko we!

¹⁹ Wose rẽw la, say nà diŋ wejõõ ɓi no noga ndigriŋ la, say diŋ je soole ɓi maga ndi ɓoʼn mo gà yawla? Wose rẽw doo je maga daʼ see ɓe go nono, go rẽw doo wejõõ Manwurn no la?

²⁰ Nen ɓo hay ko fẽẽre wo debaŋ ama ndo la kaŋ ɗiggi ti ɓaara gà à hay buŋ mbe sug go ane à laa mopo gà.

²¹ Manwur hay ɗig ga se kol jag liŋgin go kluu lay, diŋ mo maga go ni ɗawa lay nà diŋ wer keɗed ɓe no.

²² Day jar sen wo diŋ jar po maga à hay frum ra go, à hay yãã fẽẽre ɓaaran wo go. À hoo ra go ɓuy ɓi tuu ti rew, à yoŋ ra go ɓi sululu wo. À lag ra go lag ga frum ra go, je yãã rage bay wa hase. À hay yãɗ fẽẽre ɓaaran wo, je maga mo riŋ ga fer ra ne hara bay wa hase.

²³ Wose hay coʼ sug fẽẽre sen wo we yoo ɓay la? Wose hay ɗig we yoo ɓay ga se hay eŋ ma laa re maga joŋ ge wo pel mo la?

²⁴ Wose hã Jakob go ne jar yãɗ fẽẽre jarn wo doo noga hã Israyel go ne jar frum jarn wo doo mo la? Bay diŋ Manwur maga naa joŋ ɓlagge see ɓe mo wa yawla? Á hay day wo seege ti faage ɓen wo gà day wo coʼ sug jag liŋgi ɓen gà.

²⁵ Diŋ doo kay no so ga se raw bug wùu bagge põõ ɓen ne Israyel ti, raw kaŋ põõre durgi ne hẽn ti mono. Wùu bagge põõ ɓen raw roɗge ɓe go see ɓuy, day se laa dayge ko sen gà. Á hay roɗ Israyel go ama se kaŋ ti ti re sen gà.