ESAYI 40 - Tupuri Bible

WÃÃRE MA TEŊ NEN JAR ISRAYELN WO NO Baa hã jag ga se yãã Israyel go

¹ Teŋ we nen jar ɓin wo, teŋ we nen ɓaara, wããn diŋ Baa ɓay no.

² Bag we wããre ne jar Jerusalem wo, wii we ra go jag ciŋ kloŋ ga joŋre bon ɓaaran taw we go, ga à fug ɓil we go ne hara ti ɓlagge ɓaara no, ga Manwur poɗn we go ti re ma ti ɓaaran wo ɓuy so.

³ Jobo le de ngar jag ga : Ɓoʼ we faage ne Manwur ti puuli, kneʼ blam faage ne Baa naa ti laale no.

⁴ Daga log ma honla ɓuy mo tos wo go, húulì ma honla ɓuy de wel húulì ma honla ɓuy mo ham wo go gesiŋ! Daga ngel ma de farge ciŋ mo kol wo go diŋ ngel ma gesiŋ wo, fẽẽre ma de gẽẽre daŋ kããra ciŋn mo kol wo go diŋ log wo!

⁵ Mo so no togoɗge mani Manwurn naa ge nen yaŋ go day nen jar téebeere kon wo yaŋ jag taʼ boŋ ɓuy werga jag Manwur hay wããn go.

⁶ Gẽẽge po wãã ga : Ngar jage! Day à raw ferge ga : Ndi ngar ge jag nà gahãyla? Wãã ga : Je táabay ɓuy doo fíi nono, woore ɓen doo fuɗgi ma ɓil pay wo nono.

⁷ Fíi hig go, fuɗgin lwaɗ go werga Manwur fug egre ne hẽn ti. Kidolgi jarn wo diŋ fíi.

⁸ Fíi hig go, fuɗgi lwaɗ go, ama wããre mani Baa naa joŋ ge mbe yaŋ wo tum sag sage.

Wããre ma de cõõre debaŋ no

⁹ Siyoŋ, ndo wãy ma woge de soole wããre ma de cõõre no, ɗii go ciŋ ti húulì ma de gẽẽre! Jerusalem, ndo wãy ma woge de soole wããre ma de cõõre no, maŋ gẽẽge ɓo go ciŋ kloŋ! Maŋ gẽẽge ɓo go ciŋ kloŋ, joŋ hẽẽne wa! Wo wii ɓi leege ma ti sir Judan wo ga : Á mo nà diŋ Baa ɓayn no!

¹⁰ Á mo nà diŋ Waŋkluu ɓi no, diŋ Manwuri. Á le de age de egre, wããge wããre jar ɓuy nà diŋ doo ɓe. Ko we, á go de poɗge ɓen doo, fen sagn wo de seege pel ɓe.

¹¹ Á koɗ ge horog mani ɓen wo doo je koɗge nono, á tay ge weere sããren wo yaŋ le de doo ɓe, day hoo ge ra yaŋ jag jiili ɓe. Á see ge yaŋ pel mansããre ma de weere wern wo.

Baa go kluu ti tamsir ɓuy

¹² Wose hay ngaɓ maarog wo we go ɓi coo doo ɓe noga hay ngaɓ kluu ngel ma ciŋ we de weere doo ɓe wo la? Wose hay ko põõre beɗef ma ti tamsir la ɓuy we go ti mundoore la? Wose hay hag húulì wo we go ciŋ kaʼ kaʼ ma ko põõre ɓaara noga kaŋ ra ti klew la?

¹³ Wose hay lam ɗiggi Nenterse Manwur we day hay kaŋ nen ɓe we ti ɓen la?

¹⁴ Á hay lag wo we ɓoʼ ti wããre de wose maga se hay daʼ hadge le see ɓe ni la? Wose hay kaŋ nen ɓe we ti faage joŋge mo ma ti ngel ɓen la? Wose hay hadn we de ɗeŋ mopo noga hay kaŋ nen ɓe we ti koge reen la?

¹⁵ À ko wer jar ma ti sir wo, saara doo bii maga kaa go praw ti han-gutug nono. Á wo doo ɓurgi maga la ti fen far klew nono.

¹⁶ Yooway ma ti húulì Libaŋn kãã go nen ngal wùu draʼ gà nàyre ma yoo ɓen kãã wo go ma sii jag maga à roɗ mo ɓen go ɓuy mo gà.

¹⁷ Wer jar wo ɓuy bay wo pel ɓe diŋ mopo wa hase, de el ɓaara bay nen ɓe meʼ draʼ wa has lay.

Fen ma ngaɓge de Baa bay wa

¹⁸ Nday da ngaɓ Baa nà de mayla? Nday ɗag bà mayse ga joŋ ge yaŋ doo se no la?

¹⁹ Yor fodo mopo nà diŋ je yor fẽẽre no, je joŋre boo biŋnin raw kor boo biŋnin ne hẽn see, day se raw saɗge ɓe de receʼ boo solay wo.

²⁰ Je maga yaŋ go de coo nen maga joŋ doosen no gà no, raw kiɗ koo ma graŋ maga re doo sõõre wo gà mono. Se raw kiɗ je joŋre ɓe ma de kããge nen maga á mo ɓal fodo ma de ceɗgen see kẽẽ day á mo hay de jagge deŋ.

²¹ Nday bay bà de daʼ wer ne hẽn wa ɗa yawla? Nday bay bà de laage ɓe wa yawla? À hay siin bà le ne nday ti tĩĩgi wer gà yawla? Nday bay de laa wer maga tamsir nà de ɓo wer nà ɓoʼge la wa yawla?

²² Á diŋ je maga go ciŋ ti tamsir ma delel maga jar ma ɓil ɓen wo doo maapoɗ wo no mono. Á blar ngel ma ciŋ go doo õõbe nono, blarn go doo tiŋ õõbe ɓen nono maga se koln go diŋ ngel hayle ɓe.

²³ Á diŋ je maga ɓoʼ foo weere waŋre wo go mono, diŋ je maga fer jar car kiida ma ti tamsir la wo go blam has mono.

²⁴ Á bay wo de peɗge wa, bay wo de joʼge draʼ wa lay. Gur ɓaara bay le de laa cẽw gesiŋ wa. Á fug bà egre ne ra ti no, saara hig go day degurleege hoo ra go wer doo fíi nono.

²⁵ Nday ngaɓ me de wose maga ndi joŋge de maŋge ɓe mo so la? Je ma bay ɗagn wãã nono.

²⁶ Hoo we nen ɓay ciŋ ni nday ko we ɗala, wose joŋ fẽẽre sen wo mo la? Á diŋ je maga naa nen ɓaara le go ɓuy mono. Á ɗe ra go ɓuy de ɗúu ɓaara wer kluu ɓe ma debaŋn wo de egre ɓe ma de daŋge no, mopo yõõ ti ɓe go boŋ gà hase.

Baa diŋ egre jar hugli wo

²⁷ Jakobe, wer mayse ga ndo wãã day Israyel ndo dogn pa ga : Re ɓin yee nen Manwur go, Baa ɓin bay joŋ mopo ma kay ti ɓi wa so has la?

²⁸ Ndo bay de daʼ wer ne hẽn wa yawla? Ndo bay de laage ɓe wa yawla? Á diŋ Baa ma tum no, diŋ Manwur maga joŋ jag sir tawge go krub ɓuy mono. Á gay gà lay, see ɓe hrag gà lay. Jobo daʼ wer go ne ɗiggi ɓe gà.

²⁹ Á hã egre ne je ma de gayre no, day se coɓ je maga egre ɓe hoo go mono.

³⁰ Weere maga wo de naa jõõre gay wo go, hrag wo see go, weere ma jõõre leʼ wo gesiŋ

³¹ ama jar maga gor wo doo Manwur fer wo daʼ egre, fer wo pudgi doo gebeg wo nono. Á hoo wo ɗeere day saara gay gà á hoo wo seele day see ɓaara hrag ra go gà.