ESAYI 4 - Tupuri Bible

¹ Ti wur sen mono, naare wo renam tay ge wo yaŋ ti je twar boŋ day riŋn gi wo yaŋ ga : Wùr kiɗ mbe hoole ma jag wùr yaŋ, wùr kiɗ mbe õõbe ma herge ti wùr yaŋ de see wùri. Joŋ mbo ga à mo ɗe wùr mbe de ɗúu ɓo tawa! Maŋ mbo sõõre go ne wùr ti!

Jar Israyel maga gwaʼge wo mono

² Ti wur sen mono, fen maga jaw ge le ti kããge Manwur Kol ge yaŋ de togoɗge debaŋ, Day leʼge mopo ɓuy maga joŋ ge ɓi sir ni joŋ ge yaŋ diŋ fen senaʼge, Fen woore jar Israyel maga sen daŋ ge wo go mono.

³ Á joŋ ge nen maga je maga gwaʼ ge ti Siyoŋ Wo de je maga à menn ge Jerusalem ni à mo ɗe ge ra ga : Jar ma bay ɗag wo. Á wo diŋ jar maga ɗúu ɓaara hay go de yerge ma joŋ ge tenen tiʼ Jerusalem mono.

⁴ Waŋkluu yog ge ɗag mayre ma Siyoŋ wo go, Fãã Jerusalem go ti cíi maga à kaan ɓil ɓe go mono. Á joŋn ge diŋ de fuggi egre fen ma de deelen, De fuggi egre ma ɓlag jarn ne hara ti.

⁵ De sen ni mo so no, Manwur kaŋ ge swaare wo de cug yaŋ Nen ngel ma de ceg no, kaŋ ge wùu yaŋ sagge de yããge Nen ngel ma de suŋn go ti húulì ma Siyoŋ ɓuy lay, Go ne jar ɓe maga tay wo mo ɓuy ti lay. Werga, Fen ma de togoɗge ɓuy joŋ ge yaŋ go de naa nen tinoo poɗage.

⁶ Duuli joŋ ge yaŋ ma baa nencee ne jar ti doo ceg ma nen ngel ceg no, Diŋ ngel yoŋre wo de ngel hulgi doo leege baan wo de rage baa no.