ESAYI 38 - Tupuri Bible

Esekiyas leʼ cege, Baa pẽẽn go

¹ De ngar ngel sen ni mono, Esekiyas raw leʼ cegè go nen húulí. Je ndar nen wããre Baa Esay je ni Amots raw age see ɓe day riŋn ga : Manwur wãã ga : Fer jag ɓo go ne jar ni ɓo wo werga ndo huu go, ndo joŋ ge caw gà so.

² Esekiyas raw mbuɗ nen ɓe see gligi, kal tos Manwuri.

³ Á day ga : O Manwuri, fer mbo ɗig ti ti maga ndi hay see le pel ɓo de deele lay, go ɓil sog boŋ lay mono, ti fen maga ndi hay joŋn le de el nen ɓo mono! Day Esekiyas raw cagge go de roo de mberbe nen debaŋ.

⁴ Mo so no Manwur raw wãã wããre ne Esay ga :

⁵ See wo riŋ Esekiyas ga : Manwuri, Baa mani pan ɓo Dafidn wãã ga : Ndi laa tosge ɓon we, ndi ko mbi mberbe ɓon we. Ko ga ndi de laa kiŋgi ne ndo ti naw ɓon wo ni hwal ti dwee.

⁶ Ndi yãã ge ndo yaŋ go, ndi yãã ge ɓi leegen la yaŋ go doo waŋ Asiri. Ndi oo ge yaŋ ti ɓi leegen la.

⁷ Mokay la diŋ fen kaŋ nen maga Manwurn joŋn ge ma kaŋ nen ga wããre maga se wããn bag ge jag yaŋ go mono :

⁸ Ndi fer ge nen cee wurn yaŋ go blam nen kaŋ ɓaale hwale, diŋ nencee maga cwaa wo go ne ngel maga à ɗii wo liŋ ni Akas de ɓe mono. Nencee wur raw ferge go blam nen ɓaale hwal ti ngel ɗiigi maga se hay cwaa wo go ni mono.

Esekiyas joŋ suseʼ ne Baa

⁹ Yerge maga Esekiyas waŋ Juda yern de maga á joŋ cegè go nen húulí day se fer go pẽẽge mono.

¹⁰ Ndi hay wãã le ɓil ɓi ga : De maga naw ɓin hay wo mbaara de gwaʼge ni ɗa mono, ndi hay wo go jag tiŋ mani jar húulí wo go. À caa jag kiŋgi ɓin wo ciŋ!

¹¹ Ndi hay wãã le ɓil ɓi ga : Ndi ko ge mbi Manwuri, Manwur ti sir mani jar ma tenen wo gà so. Nen ɓi baa ge mbe je táabay po yoo jar ma ti tamsir wo gà so hase!

¹² À naa tenen ɓin go, à raw wo go de ɓe see ɓi hãã doo duuli mani je koɗ horogn nono, doo je ɓod õõbe maga rab õõbe maga se ɓoʼ jag ɓe go nono. Á yãã joŋre ɓin go me doo. Tĩĩ de ceg hãã wo go de suŋ mono, ndo de taw naw ɓi we go!

¹³ Ama ndi gwaʼ mbi yemaʼa, hãã ngel tee. Á hay hrag hm ɓi wo go ɓuy doo mingir nono. Tĩĩ de cege hãã wo go de suŋ mono ndo de taw naw ɓi we go!

¹⁴ Ndi hay rage le jag gesiŋ doo lebregnee maga de pudgi nono, ndi hay ndumgi doo kurgudu nono. Nen ɓi hay wo de kaŋge nen ciŋ de coocoo. Ndi hay wããge ga : Waŋkluu, ndi jag re, caa war ɓi le!

¹⁵ Ndi wãã ge bà mayse pa la? Á yiŋ jag we go ne ndi day joŋn mbe go nà diŋ se tuu so. Ndi see ge yaŋ mbi de fer ti gesiŋ nen naw ɓin wo ɓuy wer re ma ti maysee ɓi no.

¹⁶ Waŋkluu, jobo joŋ tenen caw nà diŋ wer ɓil de el ɓo no. Ndi ɓod egre wara ɗa nà diŋ wer ɓo. Ndo fer go pẽẽ ndi, ndo fer ndi go tenene.

¹⁷ Doosen lawge ɓin de see ɓe kol go diŋ jam. Á coo mbe jag ɓo de see ɓo tuu ga ndo mo yãã me le go jag tuu ma yee nen jar go no, werga ndo laa ɓlagge ɓin wo wo go nen blam ɓo.

¹⁸ Maŋ ge ti ɓo ciŋ nà bay diŋ jar ɓi tuu wo wa. Je húulí togoɗ ge ndo gà. Gor ga ndo mo ko ngar saara nà bay diŋ jar maga wo wo go ɓi tuu mo wa.

¹⁹ Je ma tenen no, je ma tenen no, je sen maŋ ti ɓo ciŋ doo ga ndi wara nono. Kaŋ nen weere wo ti koge ngar jar ɓon nà diŋ pan ɓaara wo.

²⁰ Manwur yãã ndi we go! Wùr feɗeg ge mbe saale fẽẽre jõõn wo yaŋ tum nen tenen wùrn wo ɓil tiŋ mani Manwur no.

²¹ Esay hay wãã we go ga à mo a de leʼge hõõ wo ti kerge day à mo lagn nen gwẽẽ no ni Esekiyas joŋ ge yaŋ tenene.

²² Esekiyas de see ɓe hay wii lay ga : Ndi ko ge nà de mayse ga ndi ur yaŋ go ciŋ day ndi wo ge yaŋ go ɓil tiŋ mani Manwurn la?