ESAYI 37 - Tupuri Bible

Esekiyas laa jar see Esay

¹ De maga Esekiyas laa re sen mono, se raw ngrag õõbe ma see ɓen wo go, raw rawge ɓil tiŋ mani Manwur no.

² Se raw laa Eliyakim je ko wer horog ma liŋ ni waŋn wo de Sebna je yergen wo de jar ma de garge ma yoo jar siɗ jagn wo. Saara raw de lag tãy õõbe ti see Esay je ni Amots, je ma ndar nen wããre Baan go no.

³ Saara day riŋn ga : Waŋ Esekiyas wãã ga : Wur ma waran diŋ wur re, wur bon wo de sõõre werga weere wo le go de laage ɓil man ɓaara ama egre ma er rage le go bay wa.

⁴ Tiga Manwuri, Baa ɓon yaŋ de coʼ sug wããre maga Rabsake maga waŋ Asiri je wãã re ɓen hay ɓoʼn le ma ɗar Baa ma tenenn mo layblaʼ no. Tiga Manwuri, Baa ɓon kaŋ ge bon yaŋ ne hara ti wer wããre maga se hay laa ra mo layblaʼ no. Tos ti jar maga gwaʼ wo tenen ɗa mono.

⁵ Weere jõõre waŋ Esekiyasn raw wo woge se Esay so.

⁶ Esay day riŋ ra ga : Mokay diŋ fen maga nday wo ge wããge ɓe ne je wãã re ɓayn mono : Manwur wãã ga : Joŋ hẽẽne doo wããre maga ndo laa ra day weere jõõre mani waŋ Asirin mbuɗ wo foo ɓi de ɓaara mo wa.

⁷ Ndi kaŋ ge ɗiggi yaŋ ne hẽn ti ti ngar maga à sii gi re po ne hẽn mokay se fer ge yaŋ ɓil sir ɓe, day ndi tawn ge yaŋ wo go de moslam ɓil sir ɓen ni.

Je Asiri wãɗ jag debaycõõre pa

⁸ Rabsaken raw ferge Libna, wo daʼ waŋ Asiri durgi de jar Libna wo werga Rabsaken hay laa ga waŋ go de men Lakisi.

⁹ Mo so no waŋ Asiri raw laa re po ti Tirhaka waŋ Etiyopi. Á kal riŋgi ɓe ga : Á le go de urgi ma age dur ndo. De maga se laa wããre sen mono, se kal laa jar soole see Esekiyas waŋ Juda ga :

¹⁰ Nday wo we wii Esekiyas waŋ Juda doo kay nono ga : Daga Baa ɓo maga ndo de kaŋ ɗiggi ti ɓe mo yõõ ndo ga Jerusalem kol ge go nen doo waŋ Asiri gà nà wa.

¹¹ Ndo de see ɓo ndo yaŋ de ko fen maga waŋre ma Asirin hay joŋ wo wer sirn wo ɓuy de ɓe mono, á hay caa wo wer ɓaara go day ndo ɓon la ga ndo yãã yaŋ go bla!

¹² Baa mani wer jar maga pããre ɓi taw wo ra go, jar Gosan wo, jar Haran wo, jar Resef wo de jar Eden maga wo wo Telasar mono, baa sen yãã mbaara ra we go yawla?

¹³ Waŋ Hamade, waŋ Arpad wo de waŋ ma ɓi leege Sefarfayim, Hena wo de Ifa wo nà genla?

Esekiyas tos Baa ti re no

¹⁴ Esekiyas raw yãã leedern doo jar soolen wo, raw keege ɓe go, raw rawge ɓi tiŋ mani Manwur no. Esekiyas kal blar leedern go pel Manwuri.

¹⁵ Esekiyas raw tos Baa ga :

¹⁶ Manwur Pantway no, Baa ma Israyel maga de hayle ciŋ ti Kerubẽẽ wo mono! Baa maga go ti sir waŋre ma ti tamsir wo la ɓuy mo nà diŋ ndo boŋ tuu. Joŋ ngel ma ciŋ wo de sir nà diŋ ndo.

¹⁷ Manwuri, coʼ sugi day ni ndo laa! Manwuri, buŋ nen ɓo go day ni ndo ko! Laa wããre maga Senakerib wãã ra le ma ɗar Baa ma tenenn mono!

¹⁸ O Manwuri, á mbe kidolgi ga waŋre ma Asiri hay taw wo wer jar wo go ɓuy, ɓlag wo sir ɓaara wo go,

¹⁹ lag wo baa ɓaara wo go ti wùu. Bà mbe mo pa yaw no, á hay bay mbaara diŋ baa wa lay ama wo diŋ joŋre ma doo je táabay, diŋ koo wo de húulì. Saara yee nen ɓaara go.

²⁰ Patalam no, Manwuri, Baa wùr no, yãã wùr go doo Senakerib, nen maga sir waŋre ma ti tamsir wo ɓuy mo ko wo ga ndo boŋ tuu ndo diŋ Manwur no!

Esay fer jag Baa ne Esekiyase

²¹ Mo so no Esay, je ni Amotsn raw ɓoʼ jobo wo riŋ Esekiyas ga : Manwuri, Baa ma Israyel maga ndo hay tosn ti Senakerib waŋ Asiri wãã ga :

²² Mokay la diŋ wããre maga Manwur wããn ti ɓe mono : Á ɓoʼ foo ɓo go, á feg ti ɓo, ndo maytigli no, may ma Siyoŋ no, á tuf sããre go ti ɓo, may ma Jerusalem no.

²³ Ndo hay ɗare, day mbuɗ nà diŋ foo wose mo la? Ndo hay maŋ gẽẽge ɓo ciŋ nà see wosela? Ndo mbeɗ see ɓo go ciŋ ti je ma bay ɗag ma Israyel no.

²⁴ Nen doo weere jõõre ɓon wo ndo hay ɗar Waŋkluu, ndo day ga : Ndi hay ɗid húulì wo de pus durgi ɓi ma ngaɓan wo hãã ndi wo go ti gisiɗgi húulì Libaŋ ma ɓedew no. Ndi car koore seder ɓe ma de daŋ kããra gẽẽren wo go de koore Sipres ɓe ma de wooren wo. Ndi wo go ti tipẽẽge ti ɓe ma taw no, yooway ɓe ma doo koore ma de peɗgen wo no.

²⁵ Ndi hay ter gutugri wo day ndi jo bii ɓaara. Ndi õg ge bii ma ti ɓrewge Niln ɓuy yaŋ go de kaŋge ɓaale ɓi tawa.

²⁶ Ndo bay de laage ga ndi hay joŋ fẽẽre sen wo le go taŋgu ɓaa, noga ndi hay ʼwũy ra le go ti wur ma wurpon wo gà yawla? Patala ndi a de ɓaara nen maga ɓi leege ma de egren mo ɓlag wo go, day mo kol wo go diŋ tabul ma de cor ɗugul ne kẽẽ ti.

²⁷ Doo jar ma ɓil ɓaara bay wo de kããge wa, hẽẽne go de caa rage, sõõre go de baa rage. Á wo doo fíi ma ɓil pay wo nono, doo fíi ma de laɓay nono. Á wo doo fíi ma ciŋ ti tiŋ wo nono, doo pay maga mopo bay de tĩĩgi ni wa ɗa nono.

²⁸ Ama ndi yaŋ mbi de ko wur maga ndo hay gesiŋ wo de wur maga ndo kal go day ndo fer le liŋ mono. Ndi de ko wur maga ndo mbuɗ nen de ɓi mono.

²⁹ Wer maga ndo mbuɗ nen de ɓi day wããre farge ti ciŋ ɓon a go sug ɓi mono, ndi fee ge hũy ɓo yaŋ, ndi hee ge bugrum yaŋ mo jage, day ndi fer ge ndo yaŋ liŋ ti faage maga ndo hay a le ni mono.

³⁰ Mokay la diŋ fen maga kaŋ ge nen ɓo Esekiyas ga ndi joŋ ge waŋ Asiri no mono : Tagla mono, à re ge diŋ coore ble maga à laa gesiŋ mono, deebo á re ge diŋ bas ɓe. Ama ti kiŋgi ma de swaʼn mono, joʼ we ni nday we we, peɗ we tlalum ni nday re we leʼge ɓe.

³¹ Jar maga gwaʼ wo ti tiŋ mani Judan laa ge wo cẽw yaŋ gesiŋ ɗa pa, day leʼge wo mbeere yaŋ ciŋ ti ɓaara ɗa lay.

³² Werga jar maga gwaʼ wo, laa ge wo yaŋ le go Jerusalem, laa ge wo yaŋ le go ti húulì Siyoŋ mani jar maga yãã wo go mono. Mo nà diŋ fen maga Manwur Pantway joŋn ge de hun ɓen mono.

³³ Diŋ wersen Manwur wãã ti waŋ Asiri doo kay nono ga : Á kal ge le ɓi leegen la gà á jwag ge waa la ni gà. Á ɗaw ge gidigli nen ɓe la ni gà á hoo ge fẽẽre durgi ciŋ see ɓi leegen la gà.

³⁴ Á fer ge yaŋ liŋ ti faage maga se hay a le ni mono. Á kal ge ɓi leegen la gà. Kay diŋ jag Manwuri.

³⁵ Ndi oo ge yaŋ ti ɓi leegen la ma yãã ge ɓe go. Sen wer ɓi lay, wer Dafid wejõõ ɓin lay.

Senakerib huu go

³⁶ Je peele Manwur raw kalge go, kal taw jar go yoo jar Asiri ma de kaŋgen wo ndar kis ti ɓe ndar doo nenmaʼ ti dwee. Saara wo go hooge ciŋ de jag toŋ mokay kola húulí mbe wo go sululul deŋ koɗe.

³⁷ Mo sono Senakerib waŋ Asiri raw rawge, fer ma woge hayge Ninife.

³⁸ Ti wurpo de maga se hay de leʼ monɗra ɓil tiŋ mani Nisrog baa ɓen mono, jar ni ɓe Adrameleg wo de Saretser raw wo carge ɓe go de moslam, kal wo daŋge wo go ɓil sir Ararade. Wel ɓe Esar-Hadon kal kolge go waŋ ti ngel ɓe.