ESAYI 33 - Tupuri Bible

Re ti je ɓlag Jerusalem go no

¹ Re ti ɓo, ndo maga ndo frum jar go day à frum ndo ti boŋ gà mono! Re ti ɓo, ndo maga ndo lag húulí ne jar ti day à laa mo ti ti boŋ gà ɗa mono! De maga ndo maŋ ge jag frum jarn we go, de maga ndo taw ge lag húulí ne jar ti we go no, à laa ge húulí ne ndo ti lay.

² Manwuri, ko decoo wùri! Wùr de gor ge nà diŋ doo ɓo. Hay diŋ egre wùr tum de jag toŋ, diŋ je yãã wùr go nen wur reen wo no!

³ De maga à laa ɓaale ɓo le samge mono, wer jar daŋ wo, de maga ndo ur go ciŋ mono, jar dehãy wel wo go.

⁴ À trom fẽẽre ɓayn wo go doo ɓuy doo mo maga gejer seɗn wo go nono. À cor go ne kẽẽ ti corge doo maga maapoɗ cor wo go ne kããra ti nono.

⁵ Manwur go ciŋ ti jar werga a le go de hayle ciŋ. Á baa ɓil Siyoŋ go de fẽẽre ma ti faage ɓe no, de keɗed no.

⁶ Á joŋ ge nen maga ndo mo see go de yõõ ti nen naw ɓon wo. Ɗeŋ wo de koge re wo diŋ horog maga yãã jobo go, joŋge hẽẽne doo Manwur mo nà diŋ horog ɓe no.

Waŋkluu joŋ ge jar go nen ti taʼa

⁷ Blumri durgin wo go ti war ti faage wo, jar age de soole jawn ra wo debaŋ.

⁸ Blam faage huɗ wo go, jobo bay heege ti faagen wa so. Á ɓlag wo tayge jagn go, á ɓoʼ wo foo ɓi leegen wo go day se bay hoo sug ti jobo wa so hase.

⁹ Sirn go nen lawge, á puu go. Yooway ma ti húulì Libaŋn go nen sõõre, cog ti go gesiŋ. Ful Saron kol go doo laale nono, sir Basan wo de húulì Karmel puu wo go.

¹⁰ Patalam no, ndi ur gi yaŋ ciŋ, Manwur wãã nono. Patalam no, ndi bud ge see ɓi go. Patalam no, à maŋ ge ti ɓi yaŋ ciŋ.

¹¹ Nday hay maŋ diŋ ɓiili hõõ horog wo, nday raw biŋgi diŋ fíi. Ɓodge egre ɓayn diŋ wùu maga roɗ ge nday go.

¹² Wer jar roɗ ge wo yaŋ go doo mo ma ti ngel jiɗ fẽẽre nono, doo hõõre maga à car ra go day roɗ wo ti wùu nono.

¹³ Nday maga nday wo go hãã hãã mono, laa we re maga ndi hay joŋ mono! Nday maga nday la mbaŋ mono, ko we egre ɓin so!

¹⁴ Jar ɓlaggen ma ɓil Siyoŋn wo go de hẽẽne. Jar ɗar Baan wo go de daɗge day wo ga : Wose kãã ge yaŋ yoo naa ma ooge ti jeŋ wùu ma roɗ jarn la? Wose kãã ge yaŋ yoo naa ma ooge ti jeŋ jaŋre wùu ma tumn wo la?

¹⁵ Je maga see diŋ ti fen ma ti ngel ɓe wãã diŋ mo ma ti faage ɓe no. Á day yãã mo maga à daʼn le de hram gà baa doo ɓe see daʼ ge ma de koɗn gà. Á day coʼ sug wããre ma kaa cíi jarn go gà laa õõbe go nen ɓe maga se mo ko ɓlaggen wa lay.

¹⁶ Diŋ wersen á hay ge yaŋ go ti ngel ma ciŋ hããn wo. Húulì ma kiŋkiŋn joŋ ge wo yaŋ diŋ ngel iggi ɓe. À hã ge hoole yaŋ ne hẽne, á daʼ ge bii yaŋ go de yõõ ti.

Jerusalem daʼ ge see ɓe yaŋ

¹⁷ Nen ɓo ko ge waŋn yaŋ go de woore ɓen ɓuy, ndo ko ge kluu sirn yaŋ go de nen ɓo ɓuy lay.

¹⁸ Ndo ngrum gi jag yaŋ ti hẽẽne maga hay joŋ moge mono ga : Ɓa je yergen wo de je yãɗ lombon wo genla? Je maga hay kol go wãã wããre tiŋ ma de gẽẽren wo ɓuy nà genla?

¹⁹ Nen ɓo ko ge jar yurguy yoo jarn wo gà so hase, jar se maga jag ɓaara gaali ma laage lay, jag ɓaara diŋ jag dehãy maga à daʼ wer ne hẽn gà lay mono.

²⁰ Kaŋ nen ɓo ti Siyoŋ, ɓi leege maga diŋ ngel yiŋgi wùrn mono! Nen ɓo ko ge Jerusalem ngel iggi ma de woore no, tiŋ naw maga à jwidn gi go gà so hase, à ndar ge gefay ɓen wo ge go gà has day á pog ge saale ɓen wo go gà hase.

²¹ Sen kidolgi nà diŋ fen maga kaŋ nen ga Manwur kluu ti wùr mono. Á see wùr doo maarog ma de pããregen wo nono, doo log ma de diy maga daage ma durgi caa wo nen ɓe go gà hase, day daage biŋni po hee wo ni gà lay nono.

²² Werga Manwur diŋ je cag re wùr no. Manwur diŋ je ɓod jag liŋgin ne wùr no. Manwur diŋ waŋ wùr no, je yãã wùrn go nà diŋ se.

²³ Ma ɓo ndo je hee no, saale ɓon ngloʼ wo go, á bay wo de baŋ ko ɓon wa so, bay wo go mbeɗ õõbe ma dig leegen wa so lay. Doo kay no so no, à ɓes mbe fẽẽre maga à yãã ra le jag jaw koɗ so, hayba jar leŋre wo draʼ a wo ti frumgi fẽẽre ni lay.

²⁴ Je ma ɓi leege maga riŋ ga : Ndi de cegè, bay wa. Á fug ɓil go ne jar maga wo de tiŋ ɓi leege Jerusalem go ti debaycõõre ɓaara no.