ESAYI 3 - Tupuri Bible

Sir Juda glub go

¹ Cwãy, kidolgi Waŋkluu, Manwur Pantway, Maŋ ge ɓil fen ma kay Jerusalem wo de Judan wo yaŋ wo go De fen maga á deŋ wo see ɓaara see ɓe mo ɓuy yaŋ wo go hãã. Á caa ge kããge hoolen go ɓuy, caa ge kããge biin go ɓuy lay.

² Blumn wo de je durgi no, Je car kiidan wo de je ndar nen wããre ma jag Baa go no, Je ko nen wo de je kluu no,

³ Je wãã re jar doo dween wo de je ma pel kããra no, Je bag yaŋn wo de je ma de ɗeŋ debaŋ no, Je kaŋ halge ma de daŋ kããra no, Jar sen wo ɓuy ndi caa ge wer ɓaara go.

⁴ Ndi lag ge weere jõõre wo yaŋ joŋ waŋ ti ɓaara, Kamliiri wãã ge wo re ɓaara yaŋ wo.

⁵ Yoo jar mo lay no, à joŋ ge bon kããra yaŋ : Wosela ɓuy joŋ ge bon kan ɓe yaŋ, Wel ma jõõn leʼ ge je ma de tããben yaŋ, Je ma bay ngarn leʼ ge je maga à horge sug ti ɓe mono.

⁶ Doo kay, wosela ɓuy baa ge hẽn ɓe ma liŋ ni pan ɓe yaŋ day wiin ge ga : Ndo de õõbe ma kluu ti mono, hay waŋ wùri, maŋ joŋre jar se ma ngaɓa maga see wo mbaara hãy tuu mo tiʼ doo ɓo!

⁷ Ti wur sen ni se buŋgi jag yaŋ ma wããge ga : Ndi bay diŋ je pẽɗ jar wa, hoole noga õõbe ma kluu bay liŋ ni ɓi wa. Hay we ndi waŋ wa!

⁸ Kidolgi ɓi leege Jerusalem go de leʼge gesiŋ, sir Juda go de dwasge werga jag ɓaara wo de joŋre ɓaara maga saara joŋ ra wo see Manwur diŋ ma giŋ kluu mani ɓe no.

⁹ Koge nen ɓaara joŋ mbe sedewa go ti ɓaara tuu, á naa wo nen ɓlagge ɓaaran go doo jar Sodom wo nono, yoŋn wo gà ɓuy. Re ti ɓaara, werga á wo de ʼwũy re ti see ɓaara toge!

¹⁰ Wãã we ga : Je ma keɗedn yaŋ mbe ti faage ma de el no, werga á re ge wo leʼge joŋre ɓaaran wo yaŋ.

¹¹ Re ti je debaycõõre no! Á ɓen ti faage ma de ɓlagge no, day à joŋn ge yaŋ de fen maga á hay ʼwũyn go de doo ɓe ma joŋ jar mono.

¹² Kamliiri kol wo go joŋ bon jar mani ɓin wo, naare kol wo go wãã wããre ɓaara. Jar mani ɓin wo, jar seege de ɓayn yee wo nday go, á glub wo faage maga nday de seege ni go.

Re ti jar ma peln wo

¹³ Manwur go de age ma ɗe ɗúu ne hara ti, á go de oole deele ma caa kiida jar wo.

¹⁴ Manwur ti kiida de jar kluuri ma pel jar mani ɓen wo, de waŋre ɓaaran wo. Nday ɓlag pay tlalumn go! Nday horge fẽẽre je coon go liŋ ni ɓay!

¹⁵ Wer mayse ga nday dag jar mani ɓin wo go ti day nday ndreɗ nen je coon go la? Kay diŋ jag Waŋkluu, Manwur Pantway.

Re ti Man-naare ma Jerusalem wo no

¹⁶ Manwur ga : Wer maga mayre ma Siyoŋ far wo ti see ɓaara ciŋ, see wo ti go ciŋ taʼtaʼ a, day lag wo nen sweg swege, wer maga á je-er wo jeerge day ra wo ɓeege ma ɓaale ɓaaran wo kemjeʼ kemjeʼ mono,

¹⁷ Waŋkluu cẽẽ ge ti mayre ma Siyoŋ wo yaŋ go. Manwur men ge pel ɓaara yaŋ go de koɗe.

¹⁸ Ti wur sen ni mono, Waŋkluu naa ge fẽẽre jõõ ma see ɓaara wo yaŋ go ɓuy : Ɓeegen wo, boore ma de woore ma sagge doo wurn wo, boo ma soole doon wo,

¹⁹ klelew ma sugn wo, hérgeben wo de õõbe ma klewge tin wo,

²⁰ tilgin wo, cen wo de mblaaga ma de lag larn wo, klobo trussan wo de layan wo,

²¹ boore ma herge doon wo de ma herge hũyn wo,

²² õõbe ma de ɗúun wo de õõbe ma kluuri ma de diyn wo, õõbe ma kluurin wo de ndar ma herge yoon wo,

²³ fen ko nen wo de õõbe ma nen yerããrããn wo, mblaagan wo de selabin wo.

²⁴ Fen de buugi kol yaŋ go ti ngel trusa no, saale kol yaŋ go ti ngel mblaaga no, kroʼge ti go ti ngel derge ti no, bugu swee go ti ngel õõbe ma de woore no, lĩdgi see go ti ngel woore no.

Naare dewur joŋ ge wo debaŋ

²⁵ Moslam taw ge werpiiri ɓon wo go day blumri ɓon taw ge wo le go jag jaw.

²⁶ À duʼ gi roo yaŋ geɗ geɗe, à law ge yaŋ jag tiŋ ma Siyoŋn doo wãy maga gwaʼ go de coocoo day hay go gesiŋ nono.