ESAYI 27 - Tupuri Bible

À naa ge blum Lefiyatann go

¹ Ti wur sen mono, Manwur joŋ ge bon Lefiyatan cwe ma de mbeɗge no, joŋ ge bon Lefiyatan cwe ma de dĩɗgin yaŋ de moslam ɓe ma de hãã kluu de egre no. Á ii gi barkag ma nen maarogn ge go.

Baa wo de pay tlalum ɓe no

² Ti wur sen mono, ni nday ʼwaa we siŋ ne pay tlalum ma hãã yii ma de jiigi no.

³ Ndi Manwur ndi diŋ je gor ti ɓe no, ndi kag bii ti ɓe ceɓe. Ndi gorn de suŋ lay de ceg lay nen maga jobo mo á kalge ɓil ɓe wa.

⁴ Ndi bay de sõõ ɓil wa so, ane hayga ndi daʼ ɗewseŋ wo we de hõõre ni no, ndi see ge go ne hara ti day ndi roɗ ge ra go jag taʼ boŋ ɓuy.

⁵ Ndi joŋn we gà no, ni à ɗee le yãã waŋ see ɓi, à baa barge go de ɓi, say à baa barge go de ɓi.

Baa fug gi ɓil go ne Israyel ti

⁶ Nen wur ma pel wo mono, Jakob laa ge cẽw yaŋ, Israyel jor ge yaŋ, fuɗ gi yaŋ day tamsir yãã ge yaŋ go de leʼge fẽẽre ɓen wo.

⁷ Manwur mbar mbe naa nà doo maga se mbar jar maga hay wo mbar naa no yawla? Á ʼwar mbe naa go nà doo maga se ʼwar jar maga se id ra go no yawla?

⁸ Ndo baa doo ɓo ɗawa ti kiida ɓaara maga ndo caan mono, Manwur kal fug rage wo go de ɓodge egre ɓen doo ma ti wur leege maga a le nen wur botoŋ nono.

⁹ Á maŋ ɓlagge mani Jakobn go nà doo kay no so no, day leʼge fuggi ɓil maga à fugn go ne hẽn ti diŋ ga á mbug gi húulì maga se hay bor ngel siɗ jag de ɓe ne sõõre wo yaŋ go, fed ge ra yaŋ go ciŋ doo húulì ma de sogoɗ nen nono. Jobo fer ge hoo koore maga à cor ra ne sõõ Asera wo ciŋ gà so hase, jobo baa ge doo ti mo ma roɗ fen fõõre wo gà so lay.

¹⁰ Werga ɓi leege ma de egre gwaʼ go de see ɓe boŋ. Á kol go diŋ tiŋ maga à tobn go, à menn go doo puuli nono. Weere deere kol wo go koɗge ni, suɗ wo go ni, sugway maga hay wo ni de fíi mono, saara seɗ ra go ɓuy lay.

¹¹ De maga jag doo koore hig wo we go no, à hrag ra go, naare kal wo age hee wùu go ne hara. Á wo diŋ jar ma bay ti wo, diŋ wersen so gà je maga hay joŋ ra ko decoo ɓaara gà mono. Je maga hay ʼwũy ra men ra bay joŋ bon gà lay mono.

Ferge jar Israyel wo le liŋ

¹² Ti wur sen mono, Manwur gas ge kooren wo yaŋ, koore maga tĩĩ wo le jag maarog ma de pããgen hãã leʼ wo go jag pyew ma Ejipten mono. À bag ge nday jar ni Israyeln yaŋ go doo boŋ boŋ ɓuy!

¹³ Ti wur sen mono, à ʼwaa ge cõõ ma kluun yaŋ, day jar maga hay wo go de yeɗge wo go ɓil sir Asiri fer ge wo yaŋ le de maga sen hay wo wo go de dusgi ɓil sir Ejipte mo ɓuy no. Saara leɗ ge monɗra yaŋ pel Manwur ciŋ ti húulì ma bay ɗagn wo Jerusalem.