ESAYI 26 - Tupuri Bible

Siŋ blum no

¹ Ti wur sen mono à ʼwaa ge siŋ ma kay la yaŋ ɓil sir Juda ga : Ɓi leege wùr ma de egre yaŋ. Á hã pẽẽge ne wùr diŋ kor ma ti wùri, diŋ glig ma ti wùri.

² Buŋ we jag tiŋn wo go, daga wer jar ma keɗed maga hay lag wo ti fen ma de deelen mo laa wo ni.

³ Ndo hã jam ne je maga bay ndar gog ti ɗiggi ɓe wa mono, wer maga a de kaŋ ɗiggi ɓe ti ɓo.

⁴ Kaŋ we ɗiggi ɓay ti Manwuri sagsage werga Manwuri, Manwur diŋ húulì ma nen kiŋgin wo ɓuy no.

⁵ Á hay srog jar maga hay wo de laa tiŋ ciŋ ti ngel ma de gẽẽre wo le go gesiŋ, fer ɓi leege maga hay go ciŋ ti kããra go gesiŋ, hayn go de wer nen siri.

⁶ Ɓi leege sen hay dag jar gayre wo ti, hay dag jar hugli wo go de ɓaale ti.

Tosge jar ma keɗedn wo

⁷ Faage mani je ma keɗedn diŋ de deele no. Ndo maga ndo de deele, ndo ʼwũy faage go ne je ma keɗed no.

⁸ Doo sen no so no wùr gor nà doo ɓo, O Manwuri! De maga ndo kaŋ põõre we ne jar ti no, wosela ɓuy ɗe ɗúu ɓo, fer ɗig ti ti ɓo lay.

⁹ Nen ngel ma de suŋ mono, maysee ɓi de sãy ɓo ti, nenterse ɓi le ɓil ɓi de kiɗ ndo lay. Werga, de maga ndo kaŋ põõre we ne jar ma ti tamsir wo ti no, jar ma ciŋ ti sir la had wo joŋ fẽẽre ti ngel ɓe.

¹⁰ Hayga à ko decoo je ɓlagge we no, á had fen ma ti ngel ɓen gà hã see ɓe go ne joŋge ɓlagge ɓil sir jar ma de deele wo, day hoo sug ti kluu mani Manwurn gà.

¹¹ Manwuri, doo ɓo wo go ciŋ hãã, bay maga nen ɓaara baan wa. Á ko ge wo yaŋ ga ndo de hun wer jar ɓon wo, day sõõre joŋ ge ra yaŋ ti seno. Doo kay no so wùu roɗ ge jar hee ɓon wo yaŋ go.

¹² Manwuri, ndo de hã jam ne wùri werga fẽẽre maga wùr joŋ ra mo ɓuy no, bag jag ɓaara go ne wùr diŋ ndo.

¹³ Manwuri, waŋre ma tigriŋ maga bay wo diŋ ndo wa hay kol wo go wãã wããre wùri, ama joŋ ga wùr mo ɗe ɗúu ɓo ɗa pa nà diŋ ndo boŋ tuu.

¹⁴ Jar húulí fer wo le go ciŋ gà so, jar ɓi tuu fer wo le go laage gà so lay. Doo kay nono, ndo raw urgi le, ndo kal taw rage go, day ndo raw yee nen je ma pel kããra ma honla ɓuy go.

¹⁵ Ndo raw tes wer jar ɓon wo, O Manwuri! Ndo tes wer jar ɓon wo, day ndo raw daʼ togoɗge. Ndo yaʼ haagu ma ti sirn wo pel ni go ti ɓe kara ɓuy.

¹⁶ Manwuri, á hay kiɗ wo ndo de maga re hay de caa rage mono. Saara hay lag pel ɓo ɗeged lag tosge de maga ndo hay kaŋ bon ne hara ti mono.

¹⁷ Doo wãy de ɓiili maga leʼ biŋgi joŋ bone day ra doo cege ɓiili ɓen nono, wùr hay raw wo go see ɓo hãã Manwuri!

¹⁸ Wùr hay far ɓiili, wùr joŋ bone day de maga wùr wo biŋgi so mono, wùr biŋ diŋ leege. Wer ɓe ga wùr joŋ diŋ joŋre maga hã pẽẽge ne tamsir gà wùr biŋ jar ma tigriŋ wo ti tamsir ni gà so lay.

Birgi jar húulí wo

¹⁹ Daga jar ɓo ma de húulí mo fer wo tenene! Daga jar ɓi maga huɗ wo go mo laa wo le go ciŋ! Pud we go ciŋ day joŋ we fruygi, nday jar ma nen sir no! Werga, meebe mani ɓon diŋ meebe poɗage, sir fer ge yaŋ le go laa jar ma de húulín wo.

²⁰ Wo we laage ɓil tiŋ naw ɓayn wo, nday jar mani ɓi no, tẽg we jag tiŋn wo ti ɓay. Yoŋ we wo go ni semagga nen maga bagge põõn mo taw go ɗa.

²¹ Werga Manwur le go de kalge. Á men ngel tiŋ ɓen le go ma joŋ bon jar ma ti sir wo day tamsir naa ge nen húulí maga se id rage go, yoŋ ge jag ti jar maga à hay id ra go gà lay.