ESAYI 25 - Tupuri Bible

Siŋ ma joŋ suseʼe

¹ Manwuri, ndo diŋ Baa ɓi no. Ndi kee ge ndo yaŋ, ndi maŋ ge ti ɗúu ɓon yaŋ ciŋ werga ndo hay joŋ fen ma ngil jare. Fẽẽre ɓo maga ndo hay ngaɓ ra le go ɓaa joŋge wo mbaara ti ngel ɓaara tum doo maga á hay wo nono.

² Werga ndo kol ge ɓi leegen go diŋ húulì ma de cor ɗugul ne kããra ti, kol ɓi leege ma de egren go diŋ tabuli. Ngel lagge ma de woore mani jar dehãyn yee wo nen go ɓi leege no, jobo fer ge booge ɓe gà so hase.

³ Diŋ wersen so ga jar ma de egren togoɗ wo ndo, wer jar joŋ bon jarn joŋ wo hẽẽne doo ɓo mono.

⁴ Werga ndo hay diŋ ngel yãã waŋ je ma de hugli no, diŋ ngel yãã waŋ je coon ti wur re no, diŋ duuli doo baa maga ra mono, diŋ nencee doo cege. Doo ga ɓoɗge egre jar joŋ bon jarn wo doo baa maga ra ne glig ti nono.

⁵ Doo maga ndo ii jag ceg ma ti puuli go no, ndo ham jag ngarge jag waaren wo go gesiŋ lay. Doo swaare maga hee go ne wur nen nono, ndo hay ham jag siŋ mani jar joŋ bon jarn wo go nà doo kay no lay.

Siyoŋ joŋ ge diŋ ngel joŋ few jar ɓuy

⁶ Manwur joŋ ge few ma kluu yaŋ ne wer jar wo de rege ma de woore wo, de yii ma de kiŋgi wo, de rege ma de noo này ti, de yii ma de kiŋgi ga go de jiigi de el wo ciŋ ti húulì ɓe no.

⁷ Day ciŋ ti húulì sen mono, se ngrag ge cee maga hay hee go ne wer jar wo ɓuy nen yaŋ go, hoo ge õõbe maga hay go de yoŋ nen wer jar wo ɓuy yaŋ go.

⁸ Á caa ge wer húulí yaŋ go ma tum. Waŋkluu, Manwur tag ge mberbe ma nen jar wo ɓuy yaŋ go, á maŋ ge sõõre ma ti jar mani ɓe ma ti tamsirn wo yaŋ go ɓuy. Manwur wããn go.

Israyel fruy gi yaŋ, Mohab bas ge go

⁹ Ti wur sen mono à wãã ge yaŋ ga : Mo nà diŋ Baa naa no, naa hay de kaŋ ɗiggi naa nà diŋ ti ɓe, day hay yãã naa go nà diŋ se. Naa hay de kaŋ ɗiggi naa nà diŋ ti Manwuri, ɓil naa mo hay go fehe day naa joŋ fruygi ti pẽẽge ɓe maga á hãn ne naa mono!

¹⁰ Werga doo Manwur de kaŋ bosaʼ ti húulì seno. À dag Mohab go ti ti ngel ni tuu doo fíi ma ɓi gloŋ jããren nono.

¹¹ Ɓi gloŋ jããre sen ni, se ɓod doo ɓe doo ga je ʼwẽẽ bii ɓod doo ɓe nono, ama Manwur ham jag maŋge ti ciŋ ɓen go gesiŋ wo go de rew ma doo ɓen wo ɓuy.

¹² Á mbug glig tiŋ ɓo ma de egre de gẽẽren wo go, hrag ra go gesiŋ. Á cor ra go gesiŋ hãã tay nen ɓaara go de beɗefe.