ESAYI 24 - Tupuri Bible

WÃÃRE TI WUR MA PELN WO NO Tamsir ɓlag ge go

¹ Ko we ga Manwur go de ɓlag tamsiri, go de taw jar ma ɓil ɓen wo. Á ɓlag ge sirn go, wel ge jar ma ɓil ɓen wo go.

² Re maga daʼ ge je sii jagn diŋ maga daʼ ge jar ma ɓuyn wo mo lay, mani je wãã re jarn doo mani gebeen no lay, mani wãy tiŋn doo mani maygeben no lay, mani je maga yee mopo go doo mani je maga yee yeege no lay, mani je taɗ mopo ne jarn doo mani je maga taa taage no lay, mani je ma bay ɓèere tin doo je ma de ɓèere tin no lay.

³ À ɓlag ge tamsir go ɓlagge ɓuy tuu, à frumn gi go frumgi werga Manwur hay wãã wããre sen go.

⁴ Tamsir go nen lawge, a go de sealge. Jag sir tawge ɓuy go nen gayre, go de sealge. Jar maga wo go de lagge ciŋ ti jarn ciŋ ti sir la taw ge wo lay.

⁵ Jar ma ti tamsir la glubn wo go werga á cegaɗ wo jag liŋgin wo go, ɓoʼ wo foo wããre ma de yergen wo go, ɓlag wo tayge jag ma tumn go.

⁶ Diŋ wersen so ga faɗge go de taw tamsiri day jar ma ɓil ɓen wo de re ɓlagge sen ti mono. Diŋ wersen so ga jar ma ti sirn la roɗ ge wo go day jar gwaʼ ge wo ne yemeg mbag koɗ no.

⁷ Yii ma defayn go nen coocoo, pay tlalum hig go lay. Jar maga ɓil ɓaara hay go de fruygi mo ɓuy wo de ndumgi.

⁸ Fruygi tembaln taw wo go, ngarge jag hraggen maŋ wo jag go, fruygi dilnan caa wo wer go.

⁹ Jobo bay jo yii de siŋ jag wa so hase, fẽẽre jogen kol wo go wag jag jar jo rage no.

¹⁰ Ɓi leege ma de koɗ koɗn ɓlag go, jag tiŋn wo ɓuy wo go de tẽgge, jobo bay wo kalge ni wa so.

¹¹ À ʼwad war ti faage wo wer maga yii bay wa. Fruygin ɓuy kol go diŋ lawge, jag de fegn yee nen go ɓil sir no.

¹² Mo ma ɓlag jar de gwaʼge ɓi leegen ni, jag tiŋn wo go de hragge, gwaʼ go diŋ tabuli.

¹³ Wo yoo wer jar wo mono, sir joŋ ge doo maga à de jwaʼ koo Olifiye nono, doo maga à de fleg blam tlalum wo nono.

Á fruy wo de koɗ koɗe

¹⁴ Ama jar ma lan wo mbaara de ʼwad ware, ʼwad wo war de fruygi, ʼwad wo siŋ le de fruygi le nen wur bolaw ma maŋ ti Manwur ciŋ.

¹⁵ Togoɗ we Manwur wo ti ngel maga poɗag wo ni mono. Togoɗ we ɗúu Manwuri, Baa ma Israyeln wo ti kaali ma nen maarogn wo!

¹⁶ Go ti jag sir tawge naa laa siŋ wo ʼwadge ga : Hoo sug ti je ma keɗed no! Ama ma ɓi ndi wãã ɓin ga : Ndi go de yeege! Ndi go de yeege! Maga ndi taw we go! Jar lag cogobn lag wo cogobe, cogobe! Jar lag cogobn lag wo cogobe.

¹⁷ Hẽẽne, tuu wo de bay wo go de cir ti ɓo, ndo je ma ti tamsir no!

¹⁸ Je maga daŋ go doo hẽẽne maga caan go leʼ go ɓi tuu. Je maga ɗii le go ciŋ jag tuu mono, sen baa go ti bay. Werga jag ngel ma ciŋ buŋ wo le go, dog tamsirn hrag wo go lay.

¹⁹ Tamsir mun ɓor go, tamsir crag go, à gas tamsir go.

²⁰ Tamsir go de ɓaʼge doo ga je yii ɓaʼ nono. Á paa doo mburyug nono. Debaycõõre ɓen de põõge ɓe. Á leʼ go day ur gi ciŋ gà so hase.

Kluu joŋ ge go wurpo ɓuy doo Baa boŋ

²¹ Ti wur sen mono, Manwur joŋ ge bon jar durgi ma ciŋn wo yaŋ le ciŋ, joŋ ge bon waŋre ma ti tamsir wo yaŋ ti tamsir la.

²² À tay ge ra yaŋ go doo jar ma ti paglam wo ɓuy ɓi tuu, à laa ge ra yaŋ ti daŋgay ɓi tiŋ daŋgay. Naw joŋ ge we go blam sen pur no, à joŋ ge bon ɓaara.

²³ Sõõre baa ge few go, wur cog ge ti go gesiŋ de sõõre lay werga Manwur Pantway de hayge le waŋ ti húulì Siyoŋ ɓi leege Jerusalem. Togoɗge ɓen naa ge nen yaŋ go pel jar kluuri mani ɓen wo.