ESAYI 22 - Tupuri Bible

Wããre ma ti Jerusalem no

¹ Re ti log ndarge nen wããre no. Wer mayse ga jar sir ɓon wo ɓuy ɗii wo go ciŋ ti tiŋ ma de lawgen wo la,

² ndo ɓi leege ma de ngarge jag ɓil maga war wo go de yããge ɓil ɓo ɓuy day à joŋ hragge ni no? Car wããge ne jar ɓon wo see bay diŋ moslam wa, à huɗ gi wo bay diŋ jag durgi wa.

³ Jar kluuri soode ɓon hoo wo ɗeere go jag taʼ boŋ ɓuy, jar jwag waa hoo wo ra go daŋgay. À hoo jar sir ɓon wo go jag taʼ boŋ ɓuy daŋgay de maga saara hoo ɗeere wo go hãã tiʼ ma daŋge mono.

⁴ Diŋ wersen so ndi ga : Far we nen ɓay go ne ndi ti, men we ndi raage debaŋ. Teb we ndi ma jãã nen ɓi ti re maga de caa may mani jar ɓin wo mo wa.

⁵ Werga á diŋ wur sõõre, wur ndreɗge jar wo de bagge põõ maga Waŋkluu, Manwur Pantwayn á de ɓe ɓil log ndarge nen wããre no. À mbug korn go day à ʼwad war wo nen ti húulìn wo nen maga jar mo caa war saara le.

⁶ Jar Elam wo go de ɓod hul waa jag bay, pus durgi ma jar durgin wo de jar piirin wo le de seege. Jar Kir wo go de hoo gidigli ɓaaran siigi.

⁷ Por ɓo ma de woore daŋ kããra wo go de bagge de pus durgi wo. Jar piiri wo go de cirgi mo jag tiŋ ma dur moge.

⁸ À hog kor ma ti Judan go. Ti wur sen mono, ndo hay kaŋ nen ɓo diŋ ti fẽẽre durgi ma ɓil tiŋ ma yooway no.

⁹ Nday ko ywaale ma ti kor ma ti ɓi leege mani Dafid no, nday raw yãã bii ɓil gloŋ ma nen gesiŋ no.

¹⁰ Nday kee tiŋ ma Jerusalem wo day nday mbug tiŋ wo go ma jwaʼ see kor no.

¹¹ Nday tee gloŋ ti holaŋ kor ma ɓogn wo ma yãã bii ma ɓil gloŋ ma ɓaa no. Ama nday laa dayge kaŋ nen ti je maga joŋ re sen mo gà nday bay ko je maga hay ʼwũy re sen le go taŋgu ɓaa mo wa.

¹² Waŋkluu, Manwur Pantway ɗe nday wara maga nday mo raa, nday mo law, nday mo cẽẽ ti ɓay go day nday mo lag tãy õõbe ti ɓay.

¹³ Bà nà nday bay mbay dayge wa pa. Jag ɓay mbe ti fege. Nday mbay nà ti fruygi doosen lam no! À ngaʼ deere, à ngaʼ fǐiri. À re này, à jo yii day à kal ga : Naa re, naa jo werga toŋ naa huɗ gi go!

¹⁴ Manwur Pantwayn go de naa nen ɓe me ga : Cwãy à maŋ ge ɓlagge sen go ma ko decoo ɓay gà hase, say diŋ húulí ɓay boŋ tuu. Waŋkluu, Manwur Pantway wãã nono.

Re ti Sebna

¹⁵ Waŋkluu, Manwur Pantway wãã gana : See, wo daʼ Sebna je twore no, je ma ti tiŋ mani waŋn ga :

¹⁶ Mayse ɓo la ni noga wose ɓo la ni nen maga ndo tee tuu húulí ɓo go la ni la? Ndo kol mbo go ter tuu húulí go ti ɗiŋriŋ wo hãy so! Ndo cloʼ mbo húulì wo hãy ma tiŋ naw so!

¹⁷ Ko go ti ɓo ga Manwur srog mo yaŋ wo go hãã de egre, ndo pãy no. Á kaŋ ge cee yaŋ go mo ti.

¹⁸ Á kaa ge ndo yaŋ go ti kẽẽ, legad ge ndo yaŋ wo go legadge ti ngel ma fihfihi. Ndo huu gi wo go nà ni. Pus ɓo ma de togoɗgen taw wo ge wo go nà ni lay, ndo je ma kaŋ sõõre ne tiŋ mani je wãã wããre ɓon ti no!

¹⁹ Ndi Manwuri, ndi nii ndo yaŋ go ti ngel joŋre ɓo no, ndi yãã ge ngel kluu ɓon yaŋ go mo doo.

²⁰ Ti wur sen ni, ndi ɗe ge wejõõ ɓi Eliyakim je ni Hilkiyan yaŋ.

²¹ Ndi hee ge õõbe ɓo ma kluun yaŋ go ne hẽn ti, ndi saʼ ge yoo ɓe yaŋ go de mblaaga ɓo no, day ndi hã ge kluu mani ɓon yaŋ go ne hẽn doo. Á joŋ ge yaŋ diŋ pan jar Jerusalem wo de tiŋ mani Juda no.

²² Ndi hã ge saale tiŋ mani Dafid yaŋ ne hẽn doo : De maga á buŋ jag ɓe we go no, je tẽgge ɓe joŋ ge gà hase. De maga á tẽgn we go no, je bulgi ɓe joŋ ge gà has lay.

²³ Ndi coʼn ge yaŋ gesiŋ doo gefay go ti ngel ma flãy day se joŋ ge yaŋ diŋ ngel hayle ma de togoɗge ma jar ni ɓe wo.

²⁴ Fen maga diŋ togoɗge ma jar ni ɓe wo mo ɓuy à hagn ge go ti ɓe ɓuy. Á diŋ jag doo ɓe wo, sug ɓe wo, fẽẽre ma bargiŋ wo ɓuy, tĩĩ ti tasan wo hãã leʼ wo go ti hoolen wo, sen wo mo ɓuy joŋ ge wo go de hagge ti ɓe.

²⁵ Wããre ma jag Manwur Pantwayn ga : Ti wur sen mono, à naa ge gefay se ma de coʼge gesiŋ ti ngel ma flãyn yaŋ go, à caan ge go day se wãã ge mopo gà. Á ɓlag ge fẽẽre põõre maga hay wo ti ɓe wo yaŋ go werga Manwur wããn go.