ESAYI 20 - Tupuri Bible

Esay ndar fẽẽre ma see ɓen go

¹ Ti kiŋgi maga se a Asdod mono, je kluu soode maga Sargoŋ waŋ Asiri ɓoʼn le kal dur Asdode, raw yããge ɓe.

² Sen nà ti kal maga Manwur wãã wããre nen doo Esay je ni Amots mono. Á hay riŋn ga : See, bud tãy õõbe ma sag ɓon go, ndar taarag ma ɓaale ɓon wo go. Se raw joŋ ge doosen nono, see go ɓaale koɗe, bay taarag ɓaale.

³ Manwur day ga : Doo maga wejõõ ɓi Esay see go see koɗe, bay taarag ɓaale nono, sen joŋ ge diŋ fen kaŋ nen nen kiŋgi swaʼa, diŋ fen riŋ jar Ejipte wo de jar Etiyopi wo go pel bole.

⁴ Waŋ Asiri horge ge jar Ejipte wo yaŋ ti daŋgay, raw ge yaŋ de jar Etiyopi wo, ma jõõre de jar tããrebe wo go see koɗe, bay taarag ɓaale, go glog koɗe ma kaŋ sõõre ne Ejipte ti.

⁵ Doo kay no so no, hẽẽne caa ge ra yaŋ go, sõõre baa ge ra yaŋ wer Etiyopi mo maga saara de kaŋ ɗiggi ti ɓe mono, wer Ejipte, fen woore ɓaara no.

⁶ Jar maga wo de tiŋ ti jeŋ maarog sen ni wãã ge wo yaŋ ti wur sen ga : Á wo mono diŋ mo maga naa hay de kaŋ ɗiggi ti ɓe mo so no, wo diŋ ngel yãã waŋ naa no. Jar caa war naa ma yãã naa go doo waŋ Asirin so! Naa joŋ ge nà joŋge ma daŋge go mo so la?