ESAYI 18 - Tupuri Bible

Re ma caa sir Etiyopi no

¹ O ndo sir maga maʼ graŋ ɓiʼ ɓiʼ wo go faale maarog ma de pããge ma Etiyopin wo no!

² Ndo maga ndo lag jar soole ɓon wo wo ciŋ ti maaroge, lag daage fǐiri bii ɓon wo wo ciŋ ti bii wo mono! Nday jar soole ma deparday no, see we, wo we see wer jar ma de gẽẽre maga see ɓaara sag mono, see jar maga à joŋ hẽẽne doo ɓaara go ti ngel ɓuy mono, ni wer jar ma de egre maga ndreɗ wo jar go ɓuy day sir ɓaaran de car ɓil de maarog wo mono.

³ Nday ɓuy jar maga nday ti tamsir lam no, nday maga nday de lagge ciŋ ti sir lam no, nday kaŋ ge nen ɓay nà ti drapo ma de coʼge ciŋ ti húulìn wo mono. Nday coʼ ge sug yaŋ de maga à ʼwaa ge cõõn mono.

⁴ Werga Manwur hay riŋ me doo kay nono ga : Ndi ndor gà ndi ko koge ti ngel deŋ doo ceg maga sar nen ngel ceg nono, doo gedembar nen ceg ti wur weegen nono.

⁵ Ane, taŋgu weege fẽẽren de maga fẽẽren maŋ wo jag fuɗgi go, ga fuɗgin kol go diŋ tlalum ma de ruggi so mono, se car jag doo tlalum maga de ɓlaggen wo go de saŋ wo, horge ra go, day poʼ maga bay wo de el wa wo go.

⁶ À tob ge ra go ɓuy ne dweere ma re này maga wo yoo húulì wo de nàyre ma ti sirn wo. Dweere ma re nàyn caa ge wo ngel ti ceeren go ti ɓaara yeʼ yeʼ day nàyre ma ti sir caa ge wo yaale go ti ɓaara deŋ deŋ lay.

⁷ De sen ni, wer jar ma de gẽẽre ga see ɓaara sag mono, jar se maga à joŋ hẽẽne wo go doo ɓaara wer sir ɓuy, wer jar maga ndreɗ jar go ɓuy ga maarog de car nen sir ɓaaran a ge wo yaŋ de fẽẽre hãge ne Manwur Pantway no. Á a ge wo de ɓaara nà ti ngel maga ɗúu Manwur Pantwayn ra ni mono, ti húulì ma Siyoŋ no.