ESAYI 16 - Tupuri Bible

Jar Mohab wo ga jar Jerusalem mo caa wo war saara

¹ Laa we jar wo de sããre wo ne waŋ ma ɓil sir no, á mo hoo wo le ɓi leege Sela mo hee wo ti puuli no, hãã mo wo wo go ti húulì mani may ma Siyoŋ no.

² Mayre ma Mohabn kol ge wo go jag ngel maga à cegaɗ Arnoŋ go may ni doo wedwee maga wel go nono, doo weere mopo maga dus wo go men wo peŋ ɓaaran go nono.

³ Á kam wo jar Jerusalem wo yaŋ ga : Baa we yaŋ ne wùri, wãã we fen maga wùr nen joŋge ɓe ne wùri! Baa nen cee ɓon ne wùr ti doo ngel ma de suŋn no lay no, baa duuli ne jar maga ɗee wo le go ti, laa húulí go ne je wùr maga wel go ti wa!

⁴ Daga jar Mohab maga ɗee wo go mo daʼ wo ngel lagge ni ɓo! Hay diŋ duuli ma ti ɓaara doo je ɓlag jar no! Werga joŋ ge bon jarn joŋ ge gà so, frumgi jarn maŋ ge jag go, dagge jar tin caa ge wer go ɓil sir no.

⁵ Mo so no paale waŋn coɓ ge yaŋ wer joŋ ge de el no, je cag re ma ti tiŋ mani Dafid po hay ge yaŋ ti ɓe, diŋ je maga de kaŋ ɗiggi ti joŋge fen ma ti faage ɓe no, day go de gragge ma joŋ fen ma keɗed lay mono.

Jar Jerusalem day wo caa war Mohab gà

⁶ Wùr de laa wããre ti maŋge ti ciŋ mani Mohab no, diŋ maŋge ti ciŋ ma ti tawn tuu. Keɗge see ɓe no, farge ti ciŋ ɓe no, sõɗge ɓil ɓen wo ɗiggi ɓe ma bay blamn wo mono, wùr de ko rage.

⁷ Diŋ wersen so ga jar Mohab wo de lawge ti sir Mohabe, wosela ɓuy de law see ɓe mono. Á ra wo, seal wo go sealge wer maga à ɓlag Kir-Hasered go mono.

⁸ Werga, yoofíi ma Hesbon lwaɗ wo go. Waŋre mani jar dehãyn glab wo tlalum ma ɓil pay tlalum maga tĩĩ le Sibma hãã wo Yaeser wo go de maga hay wo mbaara wo go de tĩɗgi kaʼkaʼ ɓil puuli mono. Jag doo ɓaara hay de ɗeege hãã raw wo see maarogn wo go.

⁹ Diŋ wersen ndi raage pay tlalum ma Sibman yaŋ doo ga Yaeser raan no lay no. Ndi taŋ ge nday go de mberbe ma nen ɓin wo, diŋ nday ɓi leege Hesbon wo de Eleale werga à maŋ põõ le go ne fẽẽre ɓay ma weegen wo de ma hããgen wo ti.

¹⁰ Fruygi wo de feg caa wo wer go ɓil pay koore ma de peɗgen wo. Siŋ wo de joŋge fruygi caa wo wer go has ɓil pay tlalumn wo. Je hãã leʼ ge tlalum bay hãã yii ɓil cããgen wo wa so hase, ndi hay caa wer war fruygin wo go.

¹¹ Diŋ wersen so, weere ɓiiri ɓi duʼ wo roo wer Mohab doo mandilna nono, jag jiili ɓi ndar ndi wer Kir-Harese.

¹² À go de ko Mohabe, á gay see ɓe ti ngel ma de maŋge ciŋn ma cor sõõren nà gayge. Á wo ti ngel ɓe ma bay ɗagn ma tosge ama se kãã ma daʼ mopo gà hase.

¹³ Mokay diŋ wããre maga Manwur wããn le go taŋgu ɓaa tuu ti Mohab mono.

¹⁴ Day patala Manwur wãã wããre doo kay nono ga : Wo dayge ti kiŋgi swaʼ doo kiŋgi je yãɗ solay no mono, togoɗge mani Mohabn kol ge yaŋ go diŋ fen mbuɗ foo. Hayba de ngaɓa ɓaaran ma debaŋ doo ẽlan yaw, maga sen gwaʼ ge wo joŋ ge wo yaŋ diŋ jar po ma bay ngar wo ne yemeg koɗ no.