ESAYI 15 - Tupuri Bible

Wããre ti Mohabe

¹ Re ti Mohabe. Kidolgi, nen naw boŋ à frumn go! Ar-Mohab yee nen we go! Kidolgi, nen naw boŋ à frumn go! Kir-Mohab yee nen we go!

² À ɗii ciŋ ti ngel cor sõõre ma de maŋge ciŋ ma Bayid wo de Dibon ma raage. Sir Mohab wo go de law see ɓe ciŋ ti húulì Nebo, Ti húulì Medeba. Tin wo go de cẽẽge ɓuy, piŋ ma jag jarn wo go de poʼge ɓuy lay.

³ Go ti faage mono, saara go de lag tãy õõbe wo ti. Go ciŋ ti tiŋ wo de ngel kluuri ma ɓi leegen wo mono, wosela ɓuy law see ɓe day cag go de roo.

⁴ Hesbon wo de Eleale hrag wo roo, à laa gẽẽge ɓaara wo go hãã Yahase. Diŋ wersen so ga jar durgi ma Mohabn laa wo roo day caa wo bii go ɓil mono.

⁵ Jiili ɓi le de lawge ti Mohab maga jar ɓe maga yor wo go daŋ wo wo go hãã Soware, wo go hãã Eglad-Selisiya mono. Werga á ɗii wo ngel ma de maŋge ciŋ ma Luhidn ti roo, ʼwad wo war re ti faage ma Horonayim no,

⁶ doo ga bii ma Nimrimn õg wo go, fíin hig go, fen depãy ɓuy taw go, fíi depãy bay wa so.

⁷ Diŋ wersen so ga saara horge te fẽẽre ɓaara maga gwaʼ wo mono, cegaɗ wo go de rege ɓaaran hãã wo go faale pyew genanga no.

⁸ Gahãyla war reen go ti haagu Mohab ɓuy, lawge ɓe maga se law mono, à laan wo go hãã Eglayim, wo go hãã Beer-Elim.

⁹ Bii ma Dimon wo go de bagge de cíi, day ndi kaŋge re ma tigriŋ wo yaŋ ne Dimon ti pa. Ndi ɓoʼ ge mingir wo ne jar Mohab maga daŋ wo go ti, ne fen po ɓuy maga gwaʼ ti sir ɓen ni ti.