ESAYI 14 - Tupuri Bible

Sir Israyel fer yaŋ daʼ see ɓe

¹ Werga, Manwur ko ge decoo Jakob yaŋ, doo ɓe fer yaŋ mbe leʼ ge ti Israyel pa, day se fer ge yaŋ lag rage ti sir ɓaara no. Jar dehãy tay ge wo yaŋ see ɓaara day saara tay ge yaŋ go de tiŋ mani Jakob no.

² Jar dehãy horge ge wo ra yaŋ day wo ge wo yaŋ de ɓaara ti sir ɓaara no. Tiŋ mani Israyeln kol ge ra yaŋ go gebeere ɓe wo de mayre gebeere ɓe ti sir mani Manwur no. Á horge ge jar maga hay horge wo ra ti daŋgay yaŋ wo day kaŋ ge wo põõre yaŋ ne jar joŋ bon ɓaaran wo ti.

Waŋ Babilon taw ge go

³ Ti wur maga Manwur hã ge iggi we ne ndo ti gayre ɓon wo de joŋge coo ɓon wo, ti gebee ma kluu maga à hay kaŋ mo ti no,

⁴ ndo ʼwaa ge siŋ se kayn la yaŋ ti waŋ Babilone. Ndo wãã ge yaŋ ga : May pa, je joŋ bon jarn yee nen we go! Joŋge coo jarn taw we go!

⁵ Manwur haw genày mani jar debaycõõren wo we go, haw graw mani jar joŋ bon jarn wo we go.

⁶ À ɓoʼ keŋ je maga hay mbar jar wo mbe ceɓ doo ɓil waŋ day hay joŋ gebeere wer jar wo nen ɓil sõõge we go.

⁷ Sirn ɓuy de daʼ iggi lay, go jam lay. À ʼwaa siŋ jag ti fege.

⁸ Koore sipres wo de koore seder ma Libaŋ wo draʼ joŋ wo fruygi ti re maga caa ndo mono, day wãã wo ga : Hãã le ti wur maga ndo leʼ go gesiŋ mono, je car kooren bay le age car wùr wa so.

⁹ Jar ɓi tuu wo ɓuy fĩɗ wo kemãy kemãy ma yãã waare ɓo de maga ndo wo wo mono. Á pũy jar húulí wo go ne ndo de waŋre ma ti tamsirn wo ɓuy. Á hoo waŋre ma ti wer jar wo ɓuy wo go ciŋ, saara men paale waŋre ɓaaran wo go.

¹⁰ Á wo ɓuy wãã wo wããre ma riŋ ndo ga : Ndo, ndo kol go de hugli doo wùr no lay, ndo kol go de maŋ wùr lay no!

¹¹ À srog wer jeʼerge ɓon wo go ɓi tuu húulí de gẽẽge mandilna ɓon wo ɓuy. Cogcõõre see wo wer ɓo sunug sunugi, tunug kol wo diŋ fen laage ti ɓo no.

¹² May pa, ndo leʼ we le go ciŋ so, Gér ma sagge no! Wel ma ti naage waa no! Ndo maʼ gor we go gesiŋ so, ndo je joŋ gebee wer jar wo no!

¹³ Ɓil ɓo hay le riŋ moge ga : Ndi ɗii gi yaŋ wo ciŋ, ndi kaŋ ge ngel hayle ɓin yaŋ wo go ciŋ ti gér mani Baan wo. Ndi hay ge wo ciŋ ti húulì maga Baa yiŋ wo wo go ni mono, wo go nen gloŋhwede ma jag tawn wo go mono.

¹⁴ Ndi ɗii gi yaŋ wo go ciŋ ti swaare wo day ndi joŋ ge yaŋ go doo je ma ciŋ hããn nono.

¹⁵ Ama à raw srog ndo wo go ɓil tuu húulí, wo go ti tawge tuu ma wer gesiŋ ɓedew no.

¹⁶ Jar maga nen ɓaara ko wo ndo, ngris wo, kaŋ wo nen mo ti taʼ taʼa, day wãã wo ga : Ɓa mbe mo nà diŋ bloo se maga hay fĩɗ tamsiri, hay ɓlag sir waŋre wo go,

¹⁷ hay kol tamsir go diŋ puuli, frum ɓi leege wo go hay bay men jar maga se horge ra daŋgay wo go laage liŋ wa mbe mo yawla?

¹⁸ Kidolgi waŋre ma ti wer jar wo ɓuy suɗ mbaara go ti twore so, wosela ɓuy liŋ ni ɓe.

¹⁹ Ama ma ɓon, à ɓoʼ ndo wo go hãã see tipaale mani ɓon doo mbarga maga à cwaa ɓiili ɓe go nono, doo húulí maga à id ra de moslam day à sor ti ɓaara mbe wo hãyhãy ti jeʼãy ma ɓi tuu húulín nono, doo húulí maga à dagn go ti nono.

²⁰ À tay tuu ɓon de ɓaara gà werga ndo ɓlag sir ɓon go, ndo taw jar sir ɓon wo go. À tĩĩ gi re jar debaycõõren wo ge jag gà so hase.

²¹ Kiɗ we faage ma taw weeren wo go wer ɓlagge pããre ɓaaran wo! Daga á mo hoo wo go ciŋ ma yãã tamsiri noga ma baa ɓil ɓe go de hun wa so!

²² Wããre ma jag Manwur Pantwayn ga : Ndi ur gi yaŋ go ciŋ ti re ɓaara. Ndi caa ge wer ɗúu Babilon yaŋ wo go de fẽẽre maga gwaʼ wo ɓil ɓe ni mono, de weere ɓen wo, de wer mani ɓen wo. Kay diŋ jag Manwuri.

²³ Ndi koln ge yaŋ go diŋ ngel gecemgecem wo, kol ndo go diŋ fuli. Ndi torn ge yaŋ go de getagle ma ɓlag jar no. Kay diŋ jag Manwur Pantway no.

Sir Asiri hoɓ ge go

²⁴ Manwur Pantwayn hay hãʼ go haʼge ga : Kidolgi á joŋ ge doo maga ndi hay ɗign nono, fen maga ndi hay bag jag ɓe le go ɓil ɓi nduu gi kidolgi.

²⁵ Ndi ndreɗ ge je Asirin yaŋ go ɓil sir mani ɓi no, ndi dagn ge yaŋ go ti ciŋ ti húulì mani ɓin wo. À maŋ ge jug ɓe ma soolen ge go ne jar ɓin wo ti, à srog ge fen põõre ɓe ma jag bay ɓaaran yaŋ go.

²⁶ Mono diŋ fen maga ndi bag jag ɓe le go ɓil ɓi ma joŋ tamsir de ɓe mono. Mono diŋ doo ɓi maga ndi maŋ ciŋ see wer jar wo ɓuy mono.

²⁷ Manwur Pantwayn go de bag jag re sen ɓil ɓe day wose dign ge yaŋ la? Doo ɓe go de maŋge ciŋ day wose fern yaŋ go gesiŋ la?

Re ti jar Filistẽẽ wo

²⁸ Nen kiŋgi maga waŋ Akas huu mono, à raw wãã re se kayn la ga :

²⁹ Nday jar Filistẽẽn ɓuy, joŋ we fruygi ti maga graw maga hay mbar nday haw we go mo wa. Werga cwen biŋ gi nà diŋ bondro day jorge maga á jor mono diŋ manmbuyuri mopo ma de graŋ ti.

³⁰ Mo so no jag weere mani jar gayren daʼ ge wo rege ɓaaran yaŋ, jar coo daʼ ge wo ngel lagge yaŋ go flãy. Ama ndi taw ge wer mani ɓon wo yaŋ go de koŋne, day fen ɓo po ɓuy maga sen gwaʼge mono, à ʼwarn ge go.

³¹ Jag tiŋ no, law see ɓo! Ndo ɓi leege no, cag go de roo! Seal mbo go so, sir Filistẽẽn ɓuy! Werga cug po yaŋ le de naage nen ɓaŋ gloŋhwede, jobo yoo jar mani je heen ga cel go bay wa.

³² À fer wããre ne jar soole ma ti wer jar sen wo nà gahãyla? Ga Manwur hay ɓoʼ wer Siyoŋ day jar gayre ma yoo jar ɓen daʼ ge wo ngel yãã waŋ nà ni.