ESAYI 13 - Tupuri Bible

WÃÃRE TI JAR DEHÃY WO Re ti Babilone

¹ Re ma ti sir Babilon maga à naa nen ɓe ne Esay je ni Amotsn mono.

² Coʼ we drapo ti húulì po kaʼa. Ngar we jag wo nen ti ɓaara, horge we doo ciŋ! Daga jar mo cegaɗ wo jag tiŋ mani jar kluuri sirn wo wo go!

³ Ndi go de hã jag ɓi ne jar maga wo go sagsag ɓi mono. Ndi le go de ɗe jar durgi ɓi ma de egren wo lay, maga á mo bag wo jag bagge põõ ɓin go. Á wo diŋ jar maga joŋ wo fruygi blum ɓi maga ndi naan mono.

⁴ Ngarge jag debaŋ le de ngarge ti húulì wo doo ngarge jag jar ma ngaɓa wo nono. À de laa ngarge jag ma ti sir waŋre wo, diŋ wer jar dehãy maga tay wo see ɓaara go mono. Manwur Pantway de kee jar durgi ma de ɓaalen wo.

⁵ Á a wo le ti sir ma hãã, le ti jag sir tawge. Manwur wo de jar bag jag ɓil sõõge ɓen go wo de kaŋ gayre ne sirn ti ɓuy.

⁶ Law we see ɓay werga wur mani Manwurn go de kosge, á a ge doo re ma caa jar maga je ma de egren ɓuy kaŋn ne jar ti nono.

⁷ Diŋ wersen so ga doo jar hrag wo ra go ɓuy, jiili jar téebeere caa wo bii go ɓuy mono.

⁸ Hẽẽne go de caa rage, see ɓaara baŋ ra go, re de caa rage. Á tor wo ãy doo wãy maga de biŋgi nono, á ko wo kããra ngil ngil doo hẽẽne ti bii go nen ɓaara taʼ taʼa.

⁹ Ko we, wur mani Manwurn le de age. Á diŋ wur ma de hãã, wur waŋ wo de bagge põõ ma kluu, wur maga kol ge tamsir go diŋ puuli ma poɗag poɗage, wur maga taw ge jar joŋ ɓlagge wo go mono.

¹⁰ Gér ma ciŋ wo de gojog ɓaaran sag ge wo gà lay, wur ɓoʼ ge suŋgu yaŋ go nen de maga se naa le go mono day few ler ge ngel gà so has lay.

¹¹ Ndi joŋ ge bon tamsir yaŋ ti debaycõõre ɓe no, joŋ ge bon jar debaycõõren wo yaŋ go ti ɓlagge ɓaara no. Ndi caa ge wer mbarge jag jiili mani jar keɗ see ɓaaran wo yaŋ go. Ndi ham ge jag farge ti ciŋ mani jar joŋ bon jarn wo yaŋ go gesiŋ.

¹² Ndi kol ge jar téebeere wo yaŋ go daʼge gaali de daŋ boo biŋni ma yelyele, ndi kol ge ra go daʼge gaali de daŋ boo biŋni ma Ofir no.

¹³ Diŋ wersen ndi ɓlagge ngel ma ciŋn ge go, dog tamsirn fĩɗ gi wo yaŋ doo sõõge ɓil mani Manwur Pantwayn ti wur bagge põõ ɓe ma de hãã no.

¹⁴ Doo meene maga go de caa hẽẽne nono, doo fǐiri maga je baa ti ɓaara bay wa nono, wosela ɓuy fer ge see jar ma ti wer mani ɓen wo, wosela ɓuy daŋ ge ɓil sir ɓe.

¹⁵ Jar maga à yiŋ gi de ɓaara mo ɓuy, à jwag ge ra go de waa, maga à bag ge sen wo doo mo ɓuy no, moslam taw ge sen wo go.

¹⁶ À jwag ge ti weere ɓaara ma ti pãã wo go gesiŋ de nen ɓaara, à frum gi tiŋ ɓaaran wo go day à joŋ ge fen ma bay ngar go de naare ɓaaran wo.

¹⁷ Ko we, ndi srog wer jar Medi maga bay wo ɗiggi de re suŋgu wa lay, day boo biŋni bay diŋ mopo nen ɓaara wa lay wo yaŋ ne hara ti.

¹⁸ Waa ɓaaran sraʼ ge wo weere ma jõõren wo go gesiŋ. Á ko ge wo de coo kamliirin wo gà lay, weere kleere ko ge wo de coo nen ɓaara gà has lay.

¹⁹ Babilon togoɗge ma sir waŋren wo, mo woore ma hã fruygi ne jar Kalden wo no! Ndo kol ge yaŋ go doo Sodom wo de Gomor maga Baa hay dwas ra go nono.

²⁰ Jobo joŋ ge de tiŋ ni gà so has lay, jar joŋ ge wo ɓil ɓe gà so has lay de kiŋgi de kiŋgi. Je Arabn baa ge tiŋ õõbe ɓen ni gà lay, jar koɗ horog wo ge wo yoŋ horog ɓaaran wo ni gà lay.

²¹ Fẽẽre ma ɓil puuli a ge wo yaŋ go kiɗ ngel yoŋre ni. Tukturu bag ge wo ɓil tiŋn wo yaŋ go, gii tes ge wo yaŋ go ni day togloŋre ma yoofíi yor ge wo yaŋ go ni.

²² Nàyre ma yoofíi big gi wo yaŋ ti naare dewur ɓaaran wo, wé big gi wo yaŋ go ɓil tiŋ waŋre ma de wooren wo. Wur ɓen go mbaŋ ma age day naw ɓen yaʼ ge wo pel ni gà.