ESAYI 11 - Tupuri Bible

Wur mani Mesi no

¹ Jag doo koo po jaw ge yaŋ ti gùr mani Isayi no, kããge ɓe maga jor ge leʼ ge mbèere yaŋ.

² Nenterse Manwur joŋ ge yaŋ de hayle ti ɓe, diŋ Nenterse ma ɗeŋn wo de ti ngel no, Nenterse ma bag yaŋn wo de ma naa blum no, Nenterse koge reen wo de joŋge hẽẽne doo Manwur no.

³ Nen fen ɓe ma boŋ tuu diŋ joŋge hẽẽne Manwuri. Á car ge kiida jar bay diŋ see nen ɓaara wa, blaw ge jar diŋ ti riŋgana gà lay.

⁴ Ama á car ge kiida jar coo wo ge ti ngel ɓe, blaw ge jar gayre ma ti tamsir wo ti faage ɓe. Á mbar ge tamsir de wããre ma jag ɓe doo graw nono, day fen maga kal ge le go jag ɓe taw ge je debaycõõren go.

⁵ Keɗedn joŋ ge diŋ mblaaga ma yoo ɓe, de deelen joŋ ge diŋ mblaaga ma sag ɓe.

⁶ Way-baa joŋ ge wo yaŋ see kããra de we sam, bel suu gi wo yaŋ see kããra de welfìi. Wedày, wel mingiri wo de fǐiri maga à de laa rage goɓge tay wo yaŋ go see kããra boŋ, day weklee po koɗ ge ra yaŋ.

⁷ Mandày wo de này urse koɗ wo yaŋ go ti kããra boŋ, weere ɓaara suu gi wo yaŋ ti ngel po boŋ. Mingir re ge fíi yaŋ doo bloodày no lay.

⁸ Mbarga ma ti pããn joŋ ge mbe hragge yaŋ jag tuu yee no, wel maga go de maŋ jag hee ge mbe we doo ɓe ɓi tuu bondro no.

⁹ Joŋge nen kããra po noga herge kããra po joŋ ge ti húulì ɓi ma bay ɗagn gà hase. Werga koge mani Manwurn baa ge tamsir go ɓuy doo ga bii baa ɓil maarog go nono.

¹⁰ Ti wur sen mono, à kiɗ gi kããge mani Isayi maga joŋ ge de coʼge kaʼ doo drapo wer jar wo nono yaŋ, day ngel hayle ɓen joŋ ge yaŋ de togoɗge.

Ferge jar Jwif wo le liŋ

¹¹ Ti wur sen mono, Waŋkluu coŋ ge doo ɓe yaŋ ma de ɓog ma ko decoo jar maga gwaʼ wo yoo jar ɓe maga hay lag wo le go Asiri, go Ejipte, go Patrose, go Etiyopi, go Elam, go Sineyare, go Hamad wo de kaali ma nen maarogn wo mono.

¹² Á ɗaw ge drapon yaŋ ciŋ ne wer jar wo, tay ge jar Israyel maga hay wel wo go wo yaŋ le day fer ge yaŋ le yãã waare jar Juda maga sen hay dus wo wo go ti jag sir tawge mo ɓuy no.

¹³ Hun ma ɓil Efrayim caa ge wer go, day jar hee sir Judan taw ge wo go. Efrayim joŋ ge de hun see Juda gà so hase day Juda caa ge hee de Efrayim gà so has lay.

¹⁴ Á cwaa ge wo yaŋ wo nen wur bolaw ne jar Filistẽẽ wo jag bay. Á wo ɓog ɓuy frum gi wo jar ma nen wur botoŋn wo yaŋ go. Edom wo de Mohab leʼ wo keŋ yaŋ go doo ɓaara, jar Amoŋ kol wo yaŋ go gebeere ɓaara.

¹⁵ Manwur caa ge wer jar ma ti hulug maarog ma Ejipten yaŋ wo go day maŋ ge doo ɓe yaŋ ciŋ see bii maarog ma de pããge no. Á fug gi yaŋ de egre ti ɓe, day se car ge ɓil ɓe yaŋ go diŋ log tiʼ tiʼ renam day jar see yaŋ go ni de taarage.

¹⁶ Faage ɓoʼ ge yaŋ ne jar ɓe maga hay gwaʼ wo le go Asiri doo maga á hay joŋ le ne Israyel ti wur maga á laa wo le go ɓil sir Ejipte nono.