ESAYI 10 - Tupuri Bible

Re ti jar hã faage ɓlaggen wo

¹ Re ti jar maga yer wo jag liŋgi ma bay blam wo mono, ti jar maga hã wo faage joŋge fẽẽre maga bay wo ti ngel ɓe wa mono!

² Á joŋn wo maga saara mo maŋ jag jar coo wo go ti ɗege ɗúu ti kiida, saara mo joŋ nen jar gayre ma yoo jarn wo ti nen mo ɓaaran no, saara mo kol naare dewur wo go har ɓaara, weere holge wo go fen frumgi ɓaara.

³ Nday joŋ ge wur reen wo de bon maga le de seege hãã mo caw joŋge la? Nday ɗee ge wo nà see wo se ma yãã waŋ mo la? Day nday men ge togoɗge ɓayn ge go ne wose mo la?

⁴ Gwaʼ mbe nà diŋ maga nday ham ti go gesiŋ de jar maga wo ti paglam mo koɗ so, diŋ ga nday leɗ mbay go gesiŋ de húulí yoo jar maga à id ra go mo so no. Bà mbe de sen ɓuy bagge põõ ɓen taw go ne hara ti gà day doo ɓe joŋ mbe de maŋge ciŋ see ɓaara ɗa pa.

Re ti sir Asiri, á raw wùu liŋ jar no

⁵ Re ti sir Asiri, graw bagge põõ ɓi no! Genày ma doo ɓen diŋ fen maga ndi bag jag sõõge ɓil ɓin go de ɓe mono.

⁶ Ndi ɓoʼn wo ne wer jar maga bay wo hoo sug ti ɓi wa wo ti. Ndi geɗer jar maga car wo jiili ɓi go wo de ɓe nen maga á mo frum ra go day mo hoo ra go ɓe, nen maga á mo dag ra go ti doo ga à dag pããge ma ti faage nono.

⁷ Ama se kon doosen no gà á kon le de ɓil ɓe nà doo kay no gà. Werga fen maga le ɓil ɓe nà diŋ tawge wer jar wo go debaŋ.

⁸ Day se ga : Jar kluuri ɓin bay wo doo waŋre wo no maʼ tuu wa yawla?

⁹ Re maga hay daʼ ɓi leege Kalno diŋ te ma Karkemis no, ma Hamadn diŋ te ma Arpad no, ma Samarin diŋ te ma Damas no.

¹⁰ Doo maga doo ɓi yãã sir waŋre maga baa ɓaaran bay wo diŋ Baa wa ga fodo ɓaara hay de daŋ ma Jerusalem wo de Samarin yaw nono,

¹¹ ndi joŋ ge Jerusalem wo de baa ɓe ma de ceɗgen wo de te fen maga ndi hay joŋ Samari wo de baa ɓe ma bay blamn wo de ɓe mo lay.

¹² Ane, de maga Waŋkluu bag ge jag joŋre ɓen we go ti húulì Siyoŋ wo de Jerusalem no, ndi joŋ ge bon waŋ Asiri yaŋ ti leʼge maʼge jag jiili ɓe ma ɓil ɓe no, ti debaycõõre ma nen ɓe ga se far ti see ɓe ciŋ wer ɓe mono.

¹³ Werga á kal wããge ga : Doo ɓi joŋn mo hãʼ diŋ de egre ɓi, diŋ de ɗeŋ ɓi werga ndi diŋ je ma de ti. Ndi hay ɓlag haagu sir wer jar wo go, ndi hay yãɗ horog ɓaara wo go, men ra go ploʼ ploʼo. Doo je egre nono, ndi hay srog jar maga hay wo de lagge wãã wããre jar wo go gesiŋ.

¹⁴ Doo ɓi daʼ horog mani wer jarn wo taʼ doo jobo maŋ tiŋ dwee nono, doo maga jobo hoo pããre maga à tobn go nono. Ndi hoo fẽẽre ma ti tamsirn go ɓuy, jobo fũy graŋ meʼ gà lay, caa jag gesiŋ gà lay, tĩĩ roo po gà ɓuy lay.

¹⁵ Klaɓ kee mbe see ɓe yaŋ de daŋ je maga de ɗawge ɓe caa mopo mo yawla? Weklaɓ far mbe ti see ɓe yaŋ ciŋ de daŋ je maga de ceɗge de ɓe mo yawla? Sen nà doo ga graw kol fĩɗ je maga maŋn ciŋ nono, doo ga genày maŋ je maga bay diŋ koo wa ciŋ nono.

¹⁶ Diŋ wersen Waŋkluu, Manwur Pantwayn kaŋ ge fen ngog jar yaŋ ti holaŋ jar Asiri ma de goɓren wo. Á ngal ge wùu yaŋ ne twore ɓen wer doo wùu ma de ngalge hiɓ nono.

¹⁷ Poɗag ma Israyeln kol ge yaŋ diŋ wùu. Je ɓe ma bay ɗag kol ge yaŋ diŋ trum wùu maga roɗ hõõre wo de ɗewseŋ go, taa sããge ɓaara go nen wurpo boŋ,

¹⁸ diŋ wùu maga caa ge wer woore yooway ma Asirin wo go de koore ɓe ma de peɗgen wo ɓuy. Sen joŋ ge nà doo je cegè maga leʼ go de sealge nono.

¹⁹ Koore ma yooway ma Asiri gwaʼ ge wo no mbag no, go nen maga weklee kee ra go.

Jar Israyel maga gwaʼ ge wo mono

²⁰ Day ge ti wur sen mono, jar Israyel maga gwaʼ ge wo de jar ma liŋ ni Jakob maga daŋ wo go men ge wo deŋ see ɓaara yaŋ go see je maga hay mbar rage mono, day saara deŋ ge see ɓaara yaŋ de hãge ɓil see Manwuri, je ma bay ɗag ma Israyeln de kaŋ ɗiggi ti ɓe.

²¹ Jar po wo mbag fer ge wo yaŋ le see Baa ma de egre no, diŋ jar ni Jakob maga gwaʼ ge wo mono.

²² O Israyele, de maga jar sir ɓon joŋ ge wo we go ngaɓa doo duguɗgi ma jag maarog nono, jar po wo mbag koɗ fer ge wo yaŋ le. Baa go de ɗig tawge jar no, ma naa nen keɗedn go.

²³ Werga tawge jar se maga Baa ɗign go mono, Waŋkluu Manwur Pantwayn go de baa jag ɓe ti sirn ɓuy yaw.

Joŋ we hẽẽne doo jar Asiri wo wa

²⁴ Diŋ wersen Waŋkluu, Manwur Pantwayn wãã so ga : Nday jar ɓi maga de lagge Siyoŋn mono, joŋ we hẽẽne doo je Asirin wa! Á de mbar nday de graw, maŋ genày ɓen ciŋ see ɓay doo maga jar Ejipte hay wo joŋ nday nono.

²⁵ Ane naw gwaʼ mbe meʼ koɗe sõõge ɓil ɓin taw ge yaŋ go, ɓil ɓi fug gi yaŋ go.

²⁶ Manwur Pantwayn caa ge mbreŋ yaŋ ti ɓe doo ma ti wur maga re caa jar Madiyaŋ wo le ti húulì Oreb nono. Manwur go de coŋ graw ɓen ciŋ ti maaroge, á de maŋge ɓe ciŋ doo ma Ejipten nono.

²⁷ Ti wur sen mono, à srog ge fen põõre ɓen yaŋ go mo jag bay, jug ɓe ma soole ɓon lay. Jugn men ge ngel yaŋ go ne twore no.

Je heen kos Jerusalem we go

²⁸ Á go de age Ayade, le go de hres Migron, men fẽẽre ɓen wo Mikmase.

²⁹ Á cegaɗ wo holaŋ húulìn wo we le go day wãã wo ga : Naa wo kaŋge Geba! Rama go de daɗge yaw, Gibeya mani Sawuln daŋ wo we de ɗeere yaw.

³⁰ Cag mbo go de roo so, may ma Galim no! Ko see ɓo Layisi! Faɗge go ti ɓo Anatode!

³¹ Madmena go de dusgi yaw, jar Gebim wo de kiɗ ngel yoŋre.

³² Wara tuu se wo ge Nobe, day maŋ ge doo ɓe yaŋ ciŋ see húulì mani may ma Siyoŋ no, see húulì ma Jerusalem no.

³³ Ko we, Waŋkluu, Manwur Pantwayn le de brag sug koore wo de egre : Maga sen daŋ wo kããra ciŋ gẽẽre car wo go, maga sen wo de gẽẽre debaŋ leɗ wo go gesiŋ.

³⁴ Á poʼ lir ma yoowayn go de klaɓe, koore ma ti húulì Libaŋ laa wo go gesiŋ ɓaale je ma de egre no.