EFES WO 1 - Tupuri Bible

Pol hee jag ne jar Efes wo

¹ Yer wããre sen mokay diŋ ndi Pol maga diŋ je peele Yeso wer dage Baa mono. Ndi yer wo ne jar mani Baa ma Efes maga bay wo ndar gog wa, day wo de tayge de Yeso Kris mono.

² Daga Baa Pããben wo de Yeso Kris Waŋkluu mo woo wo nday, mo ɗaw wo nday jam!

Wooge maga Baa woo naa wer Kris mono

³ Naa togoɗ we Baa Pan Waŋkluu naa Yeso Krisi, werga á woo naa we de wer fẽẽre ma ciŋ wo le, a hã fẽẽre sen wo we ne naa ɓuy wer Krisi.

⁴ Le go taŋgu maga Baa hay bay joŋ fẽẽren wo ti tamsir la wa ɗa mokay, Baa le go de hoo naa nen maga naa mo tõɗ see naa see Krisi, naa mo hay ma ɓe, naa mo hay de lagge pel ɓe bay dage, bay wããre ti werga ɓil ɓe da naa debaŋe.

⁵ Wersen á raw ɗiggi le go pel bol hãã ga se kol naa go diŋ weere ɓe ma de ɓil ɓe nen doo Yeso Krisi. Á coo jag ɓe maga se mo joŋ doosen nono.

⁶ Naa togoɗ we Baa ti maga á woo naa de Wel ɓe ma dagen mono.

⁷ Nen doo cíi mani Kris no, naa yãã go jag ɓlagge, à fug ɓil go ne naa ti ɓlagge naa wo lay. Baa raw kaŋ nen naa go ti ɓil de el ɓe ma debaŋn diŋ de seno.

⁸ Á woo naa we debaŋ debaŋ, kol naa go ko re, ɗiggi de ele, day kol naa go daɗ wer re maga ɓil ɓe da sen wo mono.

⁹ Cwãy wããre maga á hay ɗign le go mo ɓaa ga se hay yoŋn le go ɓaa day laa ɓoʼ wer ɓe go ne jobo gà mono, se raw ɓoʼ wer ɓe go ne naa diŋ de joŋre Krisi.

¹⁰ Á hay men wããre sen mokay gor naw maga á hay ngaɓn go mono, diŋ wur maga se tay fẽẽre maga wo le ciŋ noga gesiŋ ti tamsir la ɓuy wo go wer Waŋ po boŋ, diŋ Krisi.

¹¹ Wer tayge maga naa tay go de Kris mokay, naa daʼ nen mo ma naan lay, de ngaɓge degaʼ de ɗiggi maga Baa hay ɗign le go ɓaa nono. Baa raw hoo naa le go taŋgu pel bol ɓaa

¹² maga naa mo hay ma togoɗ se, naa maga naa hay kaŋ ɗiggi naa ti Kris taŋgu mono.

¹³ Nday doosen no lay : De maga nday laa wããre ma cwãy no, Wããre ma de Cõõren maga yãã we go mono, nday raw yããge ɓe day Baa raw kaŋ lamba ɓen ne nday ɓil de Nenterse ɓe maga á hay riŋ ga se hãn yaŋ le, á raw ɓo ge ɓe ne nday ti mono.

¹⁴ Nenterse ɓe se ga á hãn ne naa mokay á deŋ naa de ɓe maga naa mo ko see ɓe ga se hã fẽẽre yaŋ ne naa, day naa wo ge yaŋ daɗ fẽẽre sen wo wur maga á wo ge go pog naa jag bon ɓuy so mono. Sen nà maga naa mo hay ma togoɗ Baa.

Pol tos Baa ti jar Efes wo

¹⁵ Diŋ wersen so ga hã le ti wur maga ndi laa wããre ɓay ga nday de hã ɓil ɓay ne Yeso Waŋkluu naan lay, nday de da jar mani Baa wo ɓuy lay mono,

¹⁶ ndi de joŋ suseʼ ne Baa ti ɓay tum. Ndi leʼ tos Baa we mo tum ɓuy ndi ɗig ti ti ɓay tum lay.

¹⁷ Ndi de tos Baa mani Yeso Kris Waŋkluu no, Panbe ma de togoɗgen ga á mo hã Nenterse koge reen we maga á mo naa nen Baa go ne nday de ele day nday mo kon go de el pah lay.

¹⁸ Daga Baa mo caa nen ɓay go ko fen maga á ɗe we le ti ɓe gorge ɓe mono, nday mo ko fẽẽre ma de woore debaŋ maga á wo de yoŋ rage ne jar ɓe ma bay ɗagn wo wo ciŋ mono.

¹⁹ Ndi da ga nday mo ko ga Baa kluu, á de egre de daŋ mayse la ɓuy. Nday mo ko ga naa jar maga naa yãã wããre ɓen, á yaŋ kay naa de egre ɓe no.

²⁰ Egre ɓe se ga á fer bir Kris go, day raw hayge ɓe wo go ciŋ see ɓe nen ti ɓaŋ war ɓe mono.

²¹ Kris wo ciŋ ni mono, se go ciŋ ti jar maga egre de hãge ne hara doo wo, go ciŋ ti jar egre wo de fẽẽre maga wo diŋ jar kluuri ma pel kããra wo, go ciŋ ti fẽẽre maga ɗúu ɓaara go de rage mo deŋ ɓuy. Sen nà bay nen wur ma debalan la tawa wa ama wo nen wur ma wurpo wo wo pa yaw.

²² Baa hayn go waŋ fẽẽren wo ɓuy, hayn go diŋ je kluu ma wãã re fẽẽre wo ɓuy, hay ne je kluu ma pel Tayge jar ma wer Krisn wo.

²³ Tayge jar ma wer Krisn wo diŋ hõõgese Krisi, jar ko ga Kris no kay diŋ see ɓaara, werga Kris go ti ngel ɓuy mono.