DANYEL 9 - Tupuri Bible

Danyel tos ti Israyel wo

¹ Nen kiŋgi ma taŋgu maga Dariyus je ni Asuwerus je Meden kol ti waŋ, hay go waŋ ti sir mani jar Kalden wo,

² day nen kiŋgi waŋ ɓe ma taŋgun mono, ndi Danyel ndi raw laa wer wããre ɓil kefder wo ti kiŋgi ma doo renam maga hay wo go nen rawge ɗa hãã Jerusalem go de ɓlagge taʼa mono, diŋ kiŋgi se ga Manwur hay wãã wããre ne Jermi je ndar nen wããre Baa gon ti ɓaara mono.

³ Ndi raw mbuɗ nen ɓi ne Baa Waŋkluu ti ma tosge ɓe, ma kamge ɓe de hẽẽge bii, de lagge tãy õõbe wo ti, de hayle nen sããge.

⁴ Ndi raw tos Manwuri, Baa ɓi no, day ndi raw wii fuggi ɓil doo ɓe ga : O Waŋkluu, Baa ma kluu maga à nen hẽẽ moge mono, ndo maga ndo oo ti tayge jag ɓo no, ndo ko decoo jar maga da wo ndo day hoo wo sug ti jag liŋgi ɓon wo lay mono!

⁵ Wùr hay joŋ ɓlagge, wùr hay joŋ debaycõõre, wùr hay joŋ hãyhãy, wùr hay joŋ ti graŋ, wùr hay mbuɗ faale go ne jag liŋgi ɓon wo de jag liŋgi ma ɓoɗ faage wããre ɓon wo.

⁶ Wùr hay laa jag weere jõõre ɓo jar ndar nen wããre ɓo maga hay wo wãɗ wããre ti ɗúu ɓo ne waŋre wùr wo de waŋre wùr ma kleeren wo, ne pããre wùr wo de jar ma ɓil sirn ɓuy wo mo gà.

⁷ Ma ɓo Waŋkluu ndo keɗede, sõõren nà diŋ see wùri. Doo maga wara jar Juda wo, jar Jerusalem wo de jar Israyel wo ɓuy, maga wo la maŋ noga wo wo go hãã hãã ti sir maga ndo nii ra wo go wer ndarge gog ɓaara maga saara kol see ɓaara go de re ti pel ɓo de sõõre ti wara nono.

⁸ Manwuri, sõõren nà diŋ see wùri, diŋ waŋre wùrn wo, weere waŋre wùrn wo de pããre wùrn wo wer maga wùr hay joŋ ɓlagge see ɓo.

⁹ Koge decoo wo de fuggi ɓil wo nà see Waŋkluu, Baa wùr no, gahãyla wùr hay joŋ ti graŋ go see ɓe.

¹⁰ Wùr hay laa jag Manwuri, Baa wùrn ma seege ti jag liŋgi ɓe maga se hay laa ra ne wùr pel nen doo weere jõõre ɓe jar ndar nen wããre ma jag ɓen wo mo gà.

¹¹ Israyel wo ɓuy hay cegaɗ wo jag liŋgi ɓon go, cel wo go, laa wo laa jag ɓo gà. Wersen so faɗge wo de re maga Baa hay hãʼ go ga se kaŋ ra ne wùr ti day wo go yerge ɓil jag liŋgi mani Moyis wejõõ Baan raw wo leɗge ne wùr ti, sen nà wer maga wùr hay joŋ ɓlagge see Baa.

¹² Á raw bag jag wããre se maga se hay wããn ti wùr de waŋre wùr maga hay wo wãã re wùr go, raw kaŋ re ma kluu ne wùr ti, te re ma kay ga caa Jerusalem joŋ ti boŋ ti tamsir la gà hase.

¹³ Re sen caa wùr mo ɓuy nà doo maga á go de yerge ɓil jag liŋgi mani Moyisn nono, day wùr laa joŋ kam kam ne Manwuri, Baa wùrn gà. Wùr laa mbuɗ faale ne joŋre wùr ma ni naŋ gàn wo gà wùr laa wii wer ne cwãyn gà.

¹⁴ Diŋ wersen ga Manwur joŋ ga re sen mo caa wùri, werga Manwuri, Baa wùrn keɗed ti joŋre ɓen wo ɓuy ama wùr hay laa jag ɓe gà.

¹⁵ Day patala mono Waŋkluu, Baa wùr no, ndo maga ndo hay laa jar ɓon wo le go ɓil sir Ejipte de doo ɓo ma de egre debaŋ no, ndo maga ndo hay ra ɗúu see ɓo go doo ga á wara no mono, wùr hay joŋ ɓlagge, wùr diŋ jar hãã.

¹⁶ Waŋkluu, wer joŋre ɓo ma ti ngel ɓen wo no, daga jiili ɓo mo caa go noga ɓil ɓo mo cee ndo ne Jerusalem ɓi leege mani ɓon ti noga ne húulì ɓo ma bay ɗagn ti wa so. Werga, wer ɓlagge wùrn wo de debaycõõre pããre wùr wo, Jerusalem wo de jar mani ɓon wo go diŋ fen feg ti nen jar maga wo ti wùr mo kara ɓuy no.

¹⁷ Patalam so no, O Baa wùr no, coʼ mbo sug tosge wo de joŋge kam kam mani wejõõ ɓo no. Wer ɓil de el ɓo no, mbuɗ mbo nen ɓo ko ngel ɓo ma bay ɗag maga go de ɓlagge mono.

¹⁸ Baa ɓi no, coʼ mbo sugi, day laa mbo! Buŋ nen ɓo go day ko mbo tabul wùrn wo de ɓi leege maga à ɗe ɗúu ɓo ne hẽn ti mono! Werga, wùr de ma joŋ kam kam ne ndo mo nà bay diŋ werga joŋre wùr po wo ti ngel ɓe lay nà wa, ama diŋ wer koge decoo jar ɓo ma debaŋ no.

¹⁹ Waŋkluu, laa mbo! Waŋkluu fug mbo ɓil go! Waŋkluu coʼ mbo sugi! Joŋ mbo mopo day gor wa so, wer ɓil de el ɓo no, O Baa ɓi no! Werga à de ɗe ɗúu ɓo ti ɓi leege ɓon wo de jar ɓon wo no.

Baa yiŋ jag ne Danyele

²⁰ De maga ndi hay wãã wããre ɗa, ndi hay tosge, ndi hay wii fuggi ɓil ti ɓlagge ɓin wo de ɓlagge jar ɓi jar Israyel wo, ndi hay joŋ kamkam ne Manwuri, Baa ɓin ti húulì ma bay ɗag mani Baa ɓi no,

²¹ Ndi hay wãã wããre nen tosge ɗa, kola Gabriyel, bloo maga hay naa nen see ɓe le me taŋgu nen mbuɗgi nen raw urgi le deparday, yaʼ le see ɓi d, sen nà de wur maga à de ma joŋ siigi jag ma de lawn mono.

²² A had ndi day wii me ga : Danyele, ndi á mo deŋ patala ma hã ti ne ndo maga ndo mo laɗ wer fẽẽre wo.

²³ De maga ndo tĩĩ wer joŋ kamkam ɓon pel Baa no kay tuu mono, à raw kal wããre wo go siigi day ndi a nà ferge ɓe ne ndo, werga ndo diŋ je dage. Coʼ sug wããre seno, day ni ndo laa wer fen maga mbuɗ nen ɓo mono.

²⁴ À hay ngaɓ lumo we go doo renam ti jar ɓon wo de ɓi leege ma kluu ma bay ɗarge no, ma caa wer cegaɗge ti jag liŋgin go, ma dig ɓlaggen go, ma fãã joŋre ma ni naŋ gàn wo go, ma age de keɗed maga taw gà mono, maga lwaʼge wo de wããre maga à hay wãɗ ra go pel bol mo leɗ wo jag go, ma ferge go gel ngel ma bay ɗag has has no.

²⁵ Doosen ndo nen koge day ndo nen laa wer ɓe ga tĩĩ wer ti wur maga à kal wããre le go ga fer kneʼ Jerusalem, fer booge ɓe hãã wo go dayge ti wur mani Mesi waŋn mono, lumo ni rename. Day nen lumo doo hiiraʼ ti ɓog à fer ge yaŋ bor ngeln wo de blam biin wo, nen wur lawge.

²⁶ Blam lumo se ma doo hiiraʼ ti ɓogn wo mono, à ii gi Mesi po yaŋ go day je ɓe po joŋ ge gà. Day jar mani waŋ po a ge wo yaŋ, Saara ɓlag ge ɓi leegen wo go de ngel ma bay ɗag no, Ane húulí waŋ sen la joŋ ge nen re ma glumglum Ama á go de wããge an ga re ma taw jarn wo ge go hãã ti tawge ti durgi no.

²⁷ Waŋn la tay ge jag yaŋ go tamɗag de jar debaŋ nen lumo boŋ Ane wo dayge ti gisiɗgi naw se renam wo mono, se diggi siigi jagn wo yaŋ wo go de hãge fẽẽre ne Baa no. Je ɓlag jarn rawge wùu joŋge fẽẽre horge seen wo hãã wo go ti wur maga fen ma re ngeln wo de fen maga à hay ngaɓ le go ti ɓe cwaa wo ne je taw jarn ti.