DANYEL 8 - Tupuri Bible

Gamla wo de togloŋ mbuɗ wo nen Danyele

¹ Nen kiŋgi ma de swaʼ maga Belsatsar de ma joŋ waŋ mono, ndi Danyel, mopo raw mbuɗ nen blam maga sen hay mbuɗ nen ɓi go taŋgu mo pa no.

² Nen mbuɗgi nen sen ni ndi hay de kaŋ nen ɓi taʼ koge, day de maga ndi hay de kaŋ nen ɓi mo taʼ ko fen maga mbuɗ nen ɓi mono, ndi raw ko see ɓi wo go Suse, ɓi leege ma kluun ma ti prog ma Elam no ndi raw ko see ɓi nen lwaʼgen ni jag maarog Ulay.

³ Ndi hay maŋ nen ɓi ciŋ day ndi kaŋ nen ɓi taʼ koge, kola gamla po deŋ de oole jag maarog no, se de cõõ ti ɓoge. Cõõ sen hay wo de gẽẽre ama boŋ yoo ɓaara hay de daŋ kẽẽ, ma se de daŋ kẽẽn la tĩĩ le blam la no.

⁴ Ndi raw ko gamlan de tur jar caw de cõõ ɓen nen nen wur bolaw, go nen ɓaŋ gloŋhwede, go nen ɓaŋ wãybane. Này po hay bay grege deŋ pel ɓe wa hase. Jobo hay bay de kããge ma yãã jar go doo ɓe wa lay. Á hay joŋ fen maga ɓil ɓe da ne day se hay gẽẽge ciŋ.

⁵ De maga ndi hay de kaŋ nen ɓi taʼ ɗeŋres mono, kola togloŋ po raw age le nen wur bolaw de tor sir le go de pel bay duʼ ɓaale gesiŋ. Cõõ togloŋ sen hay wãɗ kaʼ boŋ ti holaŋ nen ɓe wo doo fen mbuɗgi nono.

⁶ Se raw age go se gamla ma de cõõ ti ɓog ga ndi hay kon de oole jag maarogn mono. Se kal rumgi de gamlan go de egre ɓe ɓuy.

⁷ Ndi raw koge ɓe wo yaɗge see gamla no day sam pũũri go de ɓe. Se raw tuŋ gamla no, hrag cõõ ɓe ma ɓogn wo go, gamlan daʼ egre meʼ draʼ ma giŋgi ɓe gà ɓuy. Togloŋn raw bawge ɓe go gesiŋ day dagn go de ɓaale. Jobo daʼ ma yãã gamlan go doo ɓe gà ɓuy.

⁸ Togloŋn raw kolge go kluu ane de maga á kol go de egre debaŋ mokay cõõ ɓe ma kluun raw hawge go. Cõõ ma tigriŋ wo doo fen mbuɗgi nono raw wo tĩĩgi naa ti ngel ɓe go ti cõõ sirn naa ɓuy.

⁹ Cõõ po klee meʼ raw tĩĩgi le ti cõõ maapo boŋ day se gẽẽ debaŋ wo nen ɓaŋ wãybane, wo nen wur botoŋ, wo nen ti sir ma de daŋ kããra woore no.

¹⁰ Se gẽẽ, hãã wo go daʼ fẽẽre ma nen ngel ma ciŋ wo, laa te fẽẽre sen wo le go gesiŋ see ɓe de gér wo.

¹¹ A gẽẽ, hãã wo go daʼ Waŋ jar durgin wo, maŋ jag jar go ti siigi jag maga à hay siɗgi ɓe ne hẽn tum mono, day à raw tob ngel ɓe ma bay ɗagn go.

¹² À hã jar durgin wo de siigi jagn wo go ne hẽn doo wer debaycõõre ɓaara. Cõõn kaŋ ɓaale go ne cwãyn ti day raw sii ti ti joŋre ɓen wo.

¹³ Ndi raw laa wããre je ma bay ɗag po day je ma bay ɗag ma tigriŋ riŋ je maga hay wãã wããre gana : Fẽẽre se ga mbuɗugi nen naa nen ɓaara go mo deŋ maŋ ge wo jag go nà hãã hunla? Maga à maŋ jag siigi jag ma tum nen naw go, je ma bay ngar mbe go de taw jare, ngel ma bay ɗagn go de ɓoʼ foo, day à dag jar durgin wo go ti lay mono, sen joŋ ge naw nà gãyla?

¹⁴ Se day riŋ ndi ga : Wur coŋ, ngel tee go ɓaale ndar ɓog ti ɓe kiskis swaʼa, blam sen à fer go ʼwũy ngel ma bay ɗagn ti ngel ɓe so.

À naa wer mbuɗgi nen go ne Danyel pa

¹⁵ De maga ndi Danyel, ndi hay de kaŋ nen ɓi taʼ ko fen ma mbuɗ nen ɓi no, day ndi hay kiɗgi ga ndi laa wer ɓe go mono, kola jobo de oole pel ɓi la deŋ de maŋ je táabay.

¹⁶ Ndi kal laa gẽẽge jobo le nen Ulay de ngar jag ga : Gabriyele, naa wer mbuɗgi nenn ne je se deŋ no.

¹⁷ Se raw age ti jeŋ ngel maga ndi hay ni mono, day de maga a le de kos ndi mono, hẽẽne raw caa mege go. Ndi raw leʼge gesiŋ de mbuɗ nen ɓi gesiŋ. Se day riŋ me ga : Laa so, wel je táabay no, mbuɗgi nenn nà ti wur tawge ti fẽẽren wo no.

¹⁸ De maga á de wãã wããre ne ndi mono, ndi mbi go de maʼ nen ti tiʼ de mbuɗ nen gesiŋ koɗe. Se raw baa doo me see, kal maŋ ndi go ciŋ deele deŋ ti ngel maga ndi hay ni mono.

¹⁹ Blam ɓe se raw riŋ ndi ga : Ndi day nà kaŋ nen ɓo ti fen maga á ge le blam maga bagge põõn taw ge we go mono, werga wur go de ngaɓge ma tawge ti fẽẽren wo no.

²⁰ Gamla maga ndo kon ga cõõ ti ɓe ɓog mono, diŋ waŋre mani jar Mede wo de jar Persen wo.

²¹ Togloŋ ma de fũy sen diŋ waŋ Yafane. Cõõ ma kluu ma ti holaŋ nen ɓen diŋ waŋ ma taŋgu no.

²² À hay hawn go day cõõ ma naa maga tĩĩ wo le blam ti ngel ɓe wo diŋ sir waŋre naa maga kol ge wo yaŋ ti ngel ɓe mono, ane egre ɓaara day ma waŋ ma taŋgun go gà.

²³ Wo ge go ti tawge ti joŋge waŋ ɓaara no, day de maga jar debaycõõren bag wo jag joŋ ɓlaggen we go ɓuy so mono, waŋ po ma ɓil de ɓlagge ga de hila debaŋ lay kol ge yaŋ.

²⁴ Egre ɓe yaʼ ge wer yaŋ ciŋ ama bay diŋ de see ɓe tuu wa. Á ɓlag ge fẽẽre wo yaŋ go ni debaŋ debaŋ, sii gi ti yaŋ ti joŋre ɓen wo, day se taw ge jar egre wo de jar ma bay ɗagn wo yaŋ go lay.

²⁵ Wer horog ma doo ɓen wo de siigi ti maga se siin gi ti joŋre ɓe de hila ɓen wo mono, se raw kol ge mbar jag jiili ɓe. Á taw ge jar maga hay wo go de yõõ ti wo yaŋ go debaŋ day giŋ gi waŋ ma waŋre wo yaŋ. Á ma, á haw ge nen ge go, bay ga je táabay baa doo ne hẽn see wa has ɓuy.

²⁶ Mbuɗgi nen ma ti ngel ma de lawn wo de ma de jag toŋ diŋ fen ma cwãy kidolgi. Ma ɓo mono, ɗaw lwaʼge sen de yoŋre werga á nà ti wur ma pel wo wo hãã.

²⁷ Ndi Danyel ndi joŋ naw pur go de gayre lay, go de hoo egre lay. Blam ɓe ndi kal urgi go ciŋ, ndi raw ferge hã see ɓi ne joŋre mani waŋn wo. Ndi hay de ngilgi doo fen maga mbuɗ nen ɓi mono, se laa laa wer doo ɓi gà.