DANYEL 7 - Tupuri Bible

Nen Danyel mbuɗ ti nàyre wo naa

¹ Nen kiŋgi ma taŋgu maga Belsatsar waŋ Babilon de ma joŋ waŋ mono, Danyel raw lwaʼge day fẽẽre mbuɗ wo nen ɓe de maga se hay ti fen suuli ɓen mono. Blam ɓe se raw yer lwaʼgen go, kal wãɗ kluuri ɓen wo.

² Danyel kal wãã wããre day ga : Ndi hay de kaŋ nen ɓi taʼ nen lwaʼge ɓi ma de suŋ no, kola leege a wo le ti cõõ sir naa ɓuy, a wo maʼ gamla ti maarog ma kluu no.

³ Nàyre po wo kluuri naa, wo sar sar naa ɓuy laa wo le go nen maarog no.

⁴ Ma taŋgun hay doo mingir nono day se hay de graŋ gebeg ti. Ndi hay de kaŋ nen ɓi taʼ koge ɗa à raw ndar graŋ ɓen wo go. Á raw maŋge ɓe go ciŋ, à oon go ti deele deŋ ti ɓaale ɓe ɓog doo je táabay day à raw hã jiili je táabay ne hẽne.

⁵ Kola này ma de ɓogn deŋ doo này urse nono, de oole ti ɓaale po wo ɓaŋ po boŋ. Hm yoo wo swaʼ hay wo jag ɓe ti holaŋ saŋ ɓe wo, day à riŋn gana : Ur go ciŋ re mbo này jar debaŋ so.

⁶ Blam sen ndi raw kaŋ nen ɓi taʼ koge, kola này ma de swaʼ deŋ doo jwarga de graŋ ti naa doo wedwee nono. Này sen la ti ɓe hay naa, day à raw hã wããge wããre jar ne hẽn doo.

⁷ Blam sen nen lwaʼge ɓi ma de suŋ no, ndi hay de kaŋ nen ɓi taʼ koge pa, kola này ma de naa la deŋ kluu tiɓriʼi, joŋ hẽẽne lay, de egre debaŋ bay jag foo wa ɓuy. Saŋ ɓe hay wo diŋ boore wo kluuri. Se hay go re jare, crag jar go day dag maga gwaʼ wo go ti. Á hay go sar de nàyre ma lan wo no, day cõõ hay wo ti ɓe hwale.

⁸ Ndi hay de kaŋ nen ɓi taʼ er cõõn wo no, kola cõõ maapo klee raw tĩĩgi le yoo ɓaara ni tigriŋ day à raw ndarge go yoo cõõ wo swaʼa, à men ngel go ne hẽne. Nen hay ti cõõ sen ɓog doo nen je táabay nono, jag hay ti ɓe kaʼ wãɗ jag debaycõõre lay.

Kiida mani Baa no

⁹ Ndi hay mbi de kaŋ nen ɓi taʼ tum de maga à hay kaŋ paale waŋre wo taʼ taʼ puri. Je ma de tããbe ma kiŋgi pur debaŋn raw hayge gesiŋ. Õõbe ma ti ɓen hay depuy doo húulì-baa nono, riŋ ti ɓe hay go de puy paɗ paɗ doo mbaaraw ma bay dwẽẽ nen nono. Pale waŋ ɓen hay doo trum wùu wo nono. Ɓaale palen hay wo doo wùu ma de ngalge hiɓ nono.

¹⁰ Maarog wùu hay yuugi pel ɓe tiʼ i day raw wo go. Jar ndar gãy layblaʼ ɓuy hay wo joŋ peele ne hẽne, ngaɓa jar gãy layblaʼ hay wo de lagge pel ɓe. Jar car kiida raw wo lagge day à raw bul kefder wo go.

¹¹ Mo so no ndi raw kaŋ nen ɓi taʼ koge werga cõõ hay wãɗ jag ɓlagge mono. Day de maga ndi de kaŋ nen ɓi mo taʼ koge mono, à raw ʼwar nàyn go, se huu go day à ɓoʼn go nen wùu ma roɗge ɓe go.

¹² À raw yãɗ egre ma doo nàyre ma lan wo go ane à kal men rage tenen ma naw mbage.

¹³ Ndi hay de kaŋ nen ɓi taʼ koge nen lwaʼge ɓi ma de suŋ no, kola jobo doo wel je táabay raw age le ciŋ nen swaare wo. Se raw rawge le see je ma de tããbe ma kiŋgi pur debaŋ no, day à raw yaʼge ɓe le see ɓe.

¹⁴ À raw hã wããge re jar ne hẽn doo de hooge sug wo de waŋ no. Jar ɓuy, wer jar wo ɓuy de jar ma ti jag ma honla ɓuy raw wo joŋ peele ne hẽne. Wããge re jar ɓen diŋ ma tum, á taw ge gà day waŋ ɓen diŋ waŋ maga ɓlag ge go gà hase.

À naa wer mbuɗgi nen go ne Danyele

¹⁵ Ma ɓi Danyel, see ɓi raw daŋ mege go day hẽẽne raw joŋ mege debaŋ doo fẽẽre maga mbuɗ wo nen ɓi mono.

¹⁶ Ndi raw yaʼ see ɓi see jobo yoo jar maga hay wo ni mono ma wiigi ɓe ti fen maga hay ti cwãy ɓen nen lwaʼgen ni mono. Se kal siigi ɓe ne ndi day kaŋ nen ɓi ti naage wer ɓen gana :

¹⁷ Nàyre se kluuri naan wo diŋ waŋre po wo naa maga kol ge wo yaŋ ti tamsiri.

¹⁸ Ane jar ma bay ɗag mani je ma ciŋ hããn yãã ge wo waŋn yaŋ day joŋ ge wo waŋn yaŋ ma tum, de kiŋgi de kiŋgi.

¹⁹ Blam ɓe ndi raw ɗiggi ga ndi mo ko mopo go de el cwãy ti này ma de naa maga hay go sar de nàyre lan wo, kluu debaŋ lay, saŋ ɓe diŋ boore wo, fũygi-ɓaale ɓe wo diŋ boo dob lay, này se ga hay go re jare, ndreɗ jar go day ɗag maga sen gwaʼ wo jag ɓe ni go ti lay mono.

²⁰ Ndi hay ɗig ga ndi mo laa mopo go de el cwãy ti cõõ maga hay wo ti ɓe hwal mono, ti cõõ maga tĩĩ le yoo ɓaara day cõõ swaʼ laa wo go gesiŋ pel ɓe, diŋ cõõ se ga hay de nen ti, de jag ma wãɗ jag ɓlagge ti lay day hay kluu de daŋ ma lan wo lay mono.

²¹ Ndi raw ko cõõ sen caw dur jar ma bay ɗagn wo day se kal raw egre ɓaara,

²² hãã je ma de tããbe ma kiŋgi pur debaŋn wo le age ma blaw reen go ne jar ma bay ɗag mani je ma ciŋ hããn wo, day wur raw age maga jar ma bay ɗagn yãã wo waŋ no.

²³ Je sen kal riŋ ndi doo kay nono ga : Này ma de naan diŋ sir waŋ po ma de naan maga kol ge yaŋ ti tamsiri day re ge tamsir yaŋ go ɓuy, dagn ge yaŋ go ti day ndreɗn ge jar go.

²⁴ Cõõ ma hwaln wo diŋ waŋre wo hwal maga kol ge wo ti sir waŋ se no. Waŋ po boŋ kol ge yaŋ blam ɓaara, se joŋ ge sar de daŋ ma taŋgun wo day se yãã ge waŋ ma waŋre po wo yaŋ go swaʼa.

²⁵ A wãɗ ge wããre ma de ɓlagge yaŋ ti je ma ciŋ hãã no, joŋ ge bon jar ma bay ɗag mani je ma ciŋ hããn wo yaŋ day kaŋ ge ɗiggi ɓe yaŋ ga se mo coo wurn wo de jag liŋgi no. Á hã ge jar ma bay ɗagn wo yaŋ go ne hẽn ɓi coo doo ma kiŋgi swaʼ de nusi.

²⁶ Blam sen wur kiidan raw age day à yãã ge wããge re jar ma doo ɓen wo go, à ɓlag ge waŋ ɓen go, se yee ge nen go ma tum.

²⁷ Waŋ no, wããge re jarn wo de kluu ma doo waŋre ma ti tamsirn wo la ɓuy à hã ge ra go ne jar ma bay ɗag mani je ma ciŋ hããn wo no. Waŋ ɓen diŋ waŋ ma tum day jar wãã re jarn joŋ ge wo peele ne hẽne, hoo ge wo sug ti ɓe.

²⁸ Go mo nà diŋ tawge ti wããre maga ndi siin mono. Ndi Danyele, hẽẽne raw caa ndi go debaŋ, see ɓi baɗ go, ane ndi ɗaw wããre sen wo jiili ɓi.