DANYEL 6 - Tupuri Bible

¹ Dariyus je Meden daʼ waŋ de maga kiŋgi ɓe doo hiiraʼ ti ɓog mono.

Jar hee Danyel kaŋ wo tew ɓe

² Dariyus raw koge nen ɓe de el ga se lag Satrap wo ti sir waŋ ɓen kis ti ɓe doo ɓog go ti sirn ɓuy.

³ Se raw lag waŋre wo pel ɓaara swaʼ nen maga Satrap mo fer wo wããre ti joŋre ɓaaran wo ne hara day re po mo caa waŋ wa hase. Danyel hay yoo waŋre se swaʼn wo no.

⁴ Danyel de see ɓe hay de daŋ waŋren wo de Satrapn wo werga koge re ɓe hay de daŋ rage day waŋ hay ɗiggi ga se hayn go ciŋ ti sir waŋn ɓuy.

⁵ Mo so no waŋren wo de Satrapn raw wo kiɗ ɗeŋ ma caa re ne hẽn see ti re joŋre maga á hay joŋge ɓe ti wããge re sirn mono. Ama saara laa daʼ fen po noga ɓlagge po see ɓe gà werga á hay de deele day nen bay baa mopo see ɓe ga á joŋ de el gà noga se de yeege ti ɓe wa hase.

⁶ Mo so no jar sen la day wo ga : Naa daʼ ge mopo meʼ ma kaŋ tew Danyel sen gà hase, joŋ we nà ni se ti ɓaŋ jag liŋgi mani Baa ɓen an layblaʼa.

⁷ Doo kay no so no, waŋre sen wo de Satrapn raw wo naage wo de ngarge jag jag debaŋ pel waŋ day riŋ wo doo kay nono ga : Waŋ Dariyus, hay mbo ciŋ caw tum!

⁸ Mo so no waŋre ma ɓil sir waŋ ɓon wo ɓuy, jar ko wer horogn wo, Satrap wo, jar bag yaŋn wo de jar wãã re progren wo ɓuy ɓoʼ wo jag go boŋ ɓuy ga waŋ mo ɓoʼ kefder go ti ngel ɓuy ma maŋ jag jar wo go ɓuy ga : Wosela ɓuy nen naw doo swaʼ tos baa po noga je táabay po we ga bay diŋ ndo waŋ wa no, à ɓoʼn go ɓi tuu ne mingir wo.

⁹ Patalam no waŋ, daga ndo mo wãã go ga á nà nono, kaŋ doo ɓo go ti kefder no, nen maga á mo hay diŋ fen maga fer blam gà has doo ga á ti jag liŋgi jar Mede wo de jar Perse wo ga à ɓlag re ma ɓil kefder maga waŋ kaŋ doo go ɓil ɓe go gà nono.

¹⁰ Wersen mokay waŋ raw kaŋ doo go ɓil kefdern ma maŋ jag jar go ti tosge no.

À ɓoʼ Danyel go ɓi tuu mingir wo

¹¹ De maga Danyel wo koge ga à kaŋ doo go ɓil kefdern mono, se raw woge tiŋma ni ɓe maga feneder ɓen hay wo de caage ne Jerusalem ti mono. Ɓaale swaʼ nen naw tum se hay laa kõyõgre gesiŋ, hay tos Baa ɓe no, hay joŋ suseʼ ne hẽn doo maga se hay mbe seɓaa joŋge ɓe nono.

¹² Mo so no, jar sen la raw wo le laage de ngarge jag jag debaŋ, wo wo daʼ Danyel de ma joŋ kam kam ne Baa ɓe no, de ɗege ɓe lay.

¹³ Blam ɓe saara raw woge daʼ waŋ day wiin wo ti maŋge jag maga waŋ maŋn go gana : Waŋ, ndo hay go de kaŋ doo ɓil kefder go de yerge ni ga je maga nen naw doo swaʼ tos baa po noga je táabay po we ga bay diŋ ndo waŋ wa no, à mo ɓoʼn go ɓi tuu ne mingir wo gà yawla? Waŋ kal ferge ga : Wããre sen diŋ cwãy doo ga á ti jag liŋgi jar Mede wo de jar Perse wo ga re ma ɓil kefder maga waŋ kaŋ doo go ɓil ɓe coo gà nono.

¹⁴ Saara fer wãã wããre pa day riŋ wo waŋ ga : Danyele, diŋ jobo yoo daŋgay maga à hoo ra le ti sir Juda laa dayge kaŋ ti ti ɓo gà lay, ti maŋge jag maga ndo kaŋ doo go ɓil kefder ɓon ti ɓe mo gà lay, day se tos Baa ɓen ɓaale swaʼ nen naw boŋ.

¹⁵ Jiili waŋ raw caage go debaŋ de maga se laa re sen mono, se raw go bag jag ɓe ɓil ɓe ga se yãã Danyel go. Hãã wo go ti leʼge wur gesiŋ, se hay dur maga se yãã Danyel go.

¹⁶ Ama, jar sen la raw wo ferge le de ngarge jag jag debaŋ see waŋ pa day riŋ wo waŋ ga : Waŋ, ko mbo go ti ɓo ga ti jag liŋgi jar Mede wo de jar Perse wo mono, mopo ɓuy maga waŋ maŋ jag ɓe go noga ɓoʼ kefder ɓe go mono, sen fer blam gà hase.

¹⁷ Doo kay waŋ raw hã jag ga baa Danyel le, day à mo ɓoʼn go ɓi tuu ne mingir wo. Waŋ kal wãã wããre day riŋ Danyel ga : Daga Baa ɓo maga ndo joŋ peele ne hẽn tum mo yãã ndo go!

¹⁸ À raw maŋ húulì le day à ɓoʼn go jag tuu no. Waŋ raw kaŋ kase go ti ɓe de boo ma soole doo ɓen wo de ma soole doo jar kluuri joŋre ɓen wo nen maga fen po mo coo blam ti re Danyel wa hase.

¹⁹ Blam ɓe waŋ raw rawge ɓi feele waŋ ɓe no. Se raw nage koŋne, ɗe nday ɓe po wo see ɓe gà lay, nen ɓe laa baa naa gà lay.

Baa yãã Danyel go jag mingir wo

²⁰ Waŋ raw urgi go ciŋ de maga waa naa wer le go day ngel le go de maŋge mono, kal rawge deparday wo jag tuu mingir wo no.

²¹ Se kal yaʼge wo jag tuu no, day ɗe Danyel de gẽẽge lawge. Waŋ kal wãã wããre day wii Danyel ga : Danyele, wejõõ Baa ma tenen no, Baa ɓo maga ndo joŋ peele ne hẽn de egre tum yãã mbe ndo we go jag mingirn wo yawla?

²² Danyel raw wãã wããre ne waŋ ga : Waŋ, hay mbo ciŋ caw tum!

²³ Baa ɓin ɓoʼ je peele ɓe le day tẽg jag mingirn wo go maga á mo joŋ wo ndi de mopo wa werga á daʼ re po ti ɓi pel ɓe gà. Pel ɓo waŋ bà draʼ ndi bay de ma joŋ mopo ma de ɓlagge wa lay.

²⁴ Mo so no, ɓil waŋ raw go joŋge fehfeh debaŋ, se raw hã jag ga maŋ Danyel le go ɓi tuun ciŋ. Á raw maŋ Danyel le go ɓi tuun ciŋ. Á daʼ hõõge tagtããre po de kriggi see ɓe gà hase, wer maga á hay de hã ɓil ne Baa ɓe no.

²⁵ Waŋ raw hã jag ga à mo hoo jar se maga hay caa wo re ne Danyel see wo le day à mo laa ra go ɓi tuu ne mingir wo, saara de naare ɓaara wo de weere ɓaara wo. De maga á wo bay dayge wo ɓi tuu seŋ, mingir yor wo go de ɓaara jage, day sor wo hm ɓaara go tuu tuu.

²⁶ Blam sen waŋ Dariyus raw yer kefder wo go ne jar ɓuy, ne wer jarn ɓuy, ne jar ma ti jag ma honla ɓuy maga wo go ti tamsir ɓuy ga : Daga jam mo hay see ɓay debaŋ debaŋ!

²⁷ Ndi wãã wo ga wo go ɓi sir waŋ ɓin tem tem ɓuy mono, à mo joŋ hẽẽne doo Baa mani Danyel no, à mo hẽẽ ne. Werga, á diŋ Baa ma tenen no, Day se mbe tum sag sage! Waŋ mani ɓen diŋ waŋ maga taw gà hase, Day wããge wããre jar ɓen joŋ ge mbe wo tum Hãã wo go ti tawge fẽẽren ɓuy.

²⁸ Á diŋ je maga pẽẽ jar go day yãã jar go. A joŋ fẽẽre kaŋ nen wo de fẽẽre ngil jar wo, Le ciŋ lay ti tamsir la lay. Hay yãã Danyel go Jag fũygi-ɓaale mingir wo nà diŋ se.

²⁹ Danyel raw joŋge diŋ je kluu nen waŋ Dariyus lay, nen Sirus je Persen lay.