DANYEL 5 - Tupuri Bible

Few ma kluu mani Belsatsar no

¹ Waŋ Belsatsar raw joŋ few rege ma kluu ne jar kluuri joŋre ɓe ma ndarn wo. Se raw jo yii pel jar se ma ndarn wo no.

² De maga waŋ baa jag go ti yii baa baa, se raw riŋgi ga hoo kobre ma de joŋge de boo biŋnin wo le de ma de joŋge de boo solay wo le, diŋ kobre maga pan ɓe Nebukadnesar hay hoo ra le go ɓil tiŋ Baa ma Jerusalemn mono. Belsatsar raw ga hoo ra le nen maga se waŋ se jo ɓil ɓaara de jar kluuri joŋre se wo, de naare se wo de ndeere se wo.

³ Mo so no à raw hoo kobre ma de joŋge de boo biŋni maga à hay hoo ra le go ɓil tiŋ Baa, tiŋ mani Baa ma Jerusalemn wo le, day waŋ wo de jar kluuri joŋre ɓen wo, de naare ɓen wo de ndeere ɓen kal wo joge ɓil ɓaara.

⁴ Saara raw wo jo yii day togoɗ wo baa boo biŋnin wo, baa boo solayn wo, baa boo dobn wo, baa boon wo, baa koon wo de baa húulìn wo.

⁵ De sen ni weere doo jobo raw wo naa nene, raw wo yerge pel ngel maga mo ma hag lampan de kaŋge ni see glig mani waŋ ma de kor see de puy no. Nen waŋ raw ko weere doo se maga hay yerge mono.

⁶ Doo kay, see waŋ raw baɗge go day nenterse ɓe raw daŋge ɓe go, sag ɓe leʼn go cege lay, kõyõgre ɓe mbar wo see kããra lay.

⁷ Waŋ raw ngar jag go kloŋ ga ɗe jar ndar wer fẽẽre ma nen ngel ma ciŋn wo le de jar Kalden wo de jar kaŋ halgen wo. Waŋ raw wãã wããre day riŋ jar ko re ma Babilon wo ga : Je maga kee yerge sen we go day naa wer ɓe we go ne ndi no, ndi hee ge õõbe ma de sẽẽ burbur ne hẽn ti, ndi hee ge redew boo biŋni ne hẽn soole day se joŋ ge diŋ je kluu ma de swaʼ ti sir waŋ ɓin la.

⁸ Jar ɗeŋ mani waŋn raw wo laa ge wo see waŋ ama saara kãã ma kee yergen go gà lay, laa wo naa wer ɓe go ne waŋ gà lay.

⁹ Ti sen mokay waŋ Belsatsar kal ferge go daŋ nenterse has pa, see ɓe baɗ go debaŋ lay jiili jar kluuri joŋre ɓen caa wo go debaŋ lay.

Danyel naa wer yergen go ne Belsatsare

¹⁰ Wer ngarge jag wããre waŋ wo de jar kluuri joŋre ɓen wo mono, man waŋ raw kalge le ɓil tiŋ rege few no, raw wãã wããre doo kay ga : Waŋ mo hay mbe ciŋ caw tum! Daga nenterse waŋ mo daŋ go wa. Ndo bay maga ndo baɗ see go wa!

¹¹ Jobo yaŋ ti sir waŋ ɓon la, je sen de Nenterse Baa ma bay ɗagn wo ti. Le ti kal mani pan ɓon mono, à hay daʼn diŋ je maga car ɓil fẽẽren go, de ti ngel lay day koge re ɓen doo mani baan wo nono. Bà ɓuy pa mono, waŋ Nebukadnesar pan ɓo hay hayn diŋ waŋ jar ko wer fẽẽren wo, waŋ jar ndar wer fẽẽre ma nen ngel ma ciŋn wo, waŋ jar Kalden wo de jar kaŋ halgen wo. Hay joŋ nono nà diŋ pan ɓo

¹² wer maga à hay daʼ je se ga diŋ Danyel maga à ɗen ga Belsatsar diŋ je ma de ɗeŋ de daŋ kããra, de ko wer ne fẽẽre wo, de ti, de ko faage ndar wer lwaʼge wo go de faŋge fíi fẽẽre ma de gaali wo, day kiɗgi wer fẽẽre ma de gaali wo nen ɓe. Daga à mo ɗe Danyel le ni se naa wer yergen yaŋ go.

¹³ À raw age de Danyel pel waŋ so. Waŋ raw wãã wããre day riŋ Danyel gana : Mbe mo nà diŋ ndo Danyel se ma yoo jar maga à hay hoo ra le daŋgay ti sir Juda, ga pan ɓi waŋ hay hoo ra le ti sir Juda mo yawla?

¹⁴ Ndi hay laa wããre ti ɓo ga ndo de Nenterse baa wo ti ɓo, ga à daʼ mo diŋ je maga car ɓil fẽẽre wo go, de ti ngel lay, de koge re ma sara lay.

¹⁵ À hay a we de jar ko reen wo de jar ndar wer fẽẽre ma nen ngel ma ciŋn wo pel ɓi la nen maga á mo kee wo yergen go ne ndi, mo naa wo wer ɓe go me. Ama saara kãã ma naa wer yerge sen go ne ndi gà.

¹⁶ Ndi hay laa ga ndo ndar wer fẽẽre ma de gaalin wo go, ndo faŋ fíi ɓaara go. Patalam no, hayga ndo kãã yaŋ go ma kee yerge sen go, ma naa wer ɓe go ne ndi no, ndi hee ge õõbe ma de sẽẽ burbur ne ndo ti, ndi hee ge redew boo biŋni ne ndo soole day ndo joŋ ge diŋ je kluu ma de swaʼ ti sir waŋ ɓi no.

¹⁷ Danyel raw ferge pel waŋ ni so ga : Ɗaw mbo fẽẽre ɓon wo ma ɓo, hã mandekoɗ ɓon wo ne je tigriŋ. Á ne, ndi kee mbi yergen yaŋ go ne waŋ day ndi naa mbi wer ɓe yaŋ go ne hẽne.

¹⁸ Waŋ, Baa ma ciŋ hããn hay hã waŋ, hã kluu, hã hooge sug ti wo de togoɗge ne pan ɓo Nebukadnesare.

¹⁹ Wer kluu maga á hay hãn ne hẽn mono, jar wo ɓuy, wer jar wo ɓuy, jar ma ti jag ma honla ɓuy hay wo joŋ hẽẽne ɓe, hay wo daɗge doo ɓe. Waŋ hay go id jar maga se hay da ga se id ra go mono, hay men jar maga se hay da ga se men ra tenen wo tenene. Á hay hã kluu ne jar maga se da kol rage go kluuri mono, day hay fer jar maga se da fer rage go gesiŋ go gesiŋ.

²⁰ Ama de maga á hay maʼ jag jiili ɓe day ɗig ɗiggi ma kee see ɓe mono, à raw srogge ɓe go ti paale waŋ ɓe no day à ɓoʼ foo ɓe go.

²¹ À raw niigi ɓe go yoo jar téebeere wo, ɗiggi ɓe kol go doo ɗiggi nàyre wo nono day ngel naw ɓen kol wo go yoo gerhẽẽre ma yooway wo. Á hay hãge ne hẽn ma rege diŋ fíi doo deere wo nono, meebe taŋ see ɓe go hãã se wo koge ɗa so ga Baa ma ciŋ hããn de wãã re waŋ ma honla ɓuy ti holaŋ jar téebeere wo la, day se hay wosela maga ɓil ɓe dan ti waŋ.

²² Day ndo Belsatsar wel ɓen, ndo fer ti see ɓo gesiŋ gà. Bà mbe de maga ndo go de ko re sen mo ɓuy,

²³ ndo raw yiŋ pel de Waŋkluu ma ciŋ no. Ndo kal hoo kobre ma ɓi tiŋ ɓen wo le go pel ɓo, day nday de jar kluuri joŋre ɓon wo, de naare ɓo wo de ndeere ɓon wo, nday jo yii go ɓil ɓaara. Ndo kal togoɗ baa boo solayn wo, baa boo biŋnin wo, baa boo dobn wo, baa boon wo, baa koon wo, baa húulì maga bay wo ko nen wa, bay wo laa sug wa, bay wo ko mopo wa wo. Ndo togoɗ Baa maga tenen ɓon wo de faage ɓon wo ɓuy nen doo ɓe mo gà.

²⁴ Diŋ wersen so, se raw ɓoʼ jag doosen le krig yerge sen mono.

²⁵ Yerge maga á krign ga : Meene, meene, Tekel Ufarsin.

²⁶ Mokay diŋ naage wer wããre sen wo : Meene nà ga Baa kee joŋge waŋ ɓo no day se ndoʼ ti ɓe go.

²⁷ Tekel nà ga à lam põõre ɓo ti klew day à daʼ ndo go gofoŋ.

²⁸ Ufarsin nà ga à caa ge ɓil sir waŋ ɓon go day à hãn ge go ne jar Mede wo de jar Perse wo.

²⁹ Doo ni tuu Belsatsar raw riŋgi ga à mo hee õõbe ma de sẽẽ burbur ne Danyel ti, ga hee redew boo biŋni ne hẽn soole, ga à mo ʼwaa ɓay go ɓuy ne jar ga á joŋ ge je kluu ma de swaʼ ti sir waŋ no.

³⁰ De suŋ ni tuu à ʼwar Belsatsar waŋ jar Kalden wo go.