DANYEL 4 - Tupuri Bible

¹ Ndi Nebukadnesar, ndi hay go de yõõ ti liŋ ni ɓi go de fruygi ɓi feele waŋ ɓi no.

² Ndi raw lwaʼ lwaʼge po se caa hẽẽne ɓi go. Ɗiggi maga hay a wo me ti ti ɗeere ɓi de mbuɗgi nen maga hay mbuɗ wo nen ɓi daŋ wo nen ceere ɓi go.

³ Ndi raw hã jag ga tay jar ko re ma Babilon wo le pel ɓi ɓuy nen maga á mo naa wo wer lwaʼgen go ne ndi.

⁴ Mo so no jar ko wer fẽẽren wo, jar ndar wer fẽẽre ma nen ngel ma ciŋn wo, jar Kalden wo de jar kaŋ halgen raw wo nduugi. Ndi raw sii lwaʼgen ne hara, ama saara naa wer ɓe ne ndi gà.

⁵ Ge go blam taw Danyel maga a ɗen ga Belsatsar de ɗúu baa ɓin raw age pel ɓi. Á diŋ je maga Nenterse Baa ma bay ɗagn wo ti ɓe day ndi raw fer jag lwaʼgen ne hẽn ga :

⁶ Belsatsar waŋ jar ko wer fẽẽren wo, ndi de koge ga Nenterse Baa ma bay ɗagn wo ti ɓo, day fen po ma de yoŋre ɓuy bay de gaali see ɓo ma naa wer wa mono, naa wer mbuɗgi nen maga mbuɗ nen ɓi nen lwaʼge wo go ne ndi ɗala.

⁷ Mokay diŋ mbuɗgi nen maga mbuɗ wo nen ɓi de maga ndi hay ti ɗeere ɓin mono : Ndi hay de kaŋ nen ɓi taʼa, kola ti gisiɗgi tamsir koo kluu kaʼ de gẽẽre debaŋ.

⁸ Koo sen hay kluu lay, hay ngrim lay. Tipẽẽge ti ɓe duʼ ngel ma ciŋ go day à kon wo go ti jag sir tawge hãã hãã ɓuy.

⁹ Sug ɓe hay de woore lay, leʼge ɓe hay debaŋ lay day wosela ɓuy hay daʼ rege ɓen ti ɓe. Nàyre ma yoofíi hay wo lagge wer ɓe nen cee, dweere ma ciŋ hay wo de kaŋ tiŋ yoo ɓe day mopo ma tenen ɓuy hay daʼ rege ɓen le nà see ɓe.

¹⁰ Nen mbuɗgi nen maga mbuɗ nen ɓi ti ɗeere ɓin mono, Ndi hay de kaŋ nen ɓi taʼa, kola jobo boŋ yoo jar ma bay ɗag maga gor wo ngel raw cwaage le ciŋ.

¹¹ Se raw ngar jag go kloŋ day wãã doo kay nono ga : Caa we koon go, car we jag doo ɓe wo go, sroɓ we sug ɓe go day lag we leʼge ɓen wo wo go nen maga nàyren mo dus wo go, weere dweeren mo men wo jag doo ɓen wo go!

¹² Ane, men we gùr ɓen wo de kããge ɓen wo gesiŋ ni. Saʼn we de reeceʼ boo wo de reeceʼ boo dob wo go yoofíi ma ɓil pay wo. Daga meebe mo taŋ go day rege ɓe mo kol go diŋ fíi doo nàyre wo no lay no.

¹³ À naa ge ɗiggi je táabay ma ɓil ɓen yaŋ go day à kol ɗiggi horog yaŋ ne hẽn ɓili. Kiŋgi raw ge yaŋ go ti ɓe renam.

¹⁴ Re se kayn diŋ fen maga jar ma gor ngeln ɓoʼ wo ti ɓe le go, á diŋ fen maga jar ma bay ɗagn bag wo jag ɓe le go nen maga jar ma tenen wo ɓuy mo ko wo ga je ma ciŋ hãã de wãã re waŋ ma honla ɓuy yoo jar téebeere wo, mo ko wo ga á hãn go ne wosela maga ɓil ɓe da day hay je ma blam kããra tawn go ti waŋ.

¹⁵ Mokay diŋ lwaʼge maga ndi waŋ Nebukadnesar ndi hay lwaʼn mono. Ndo Belsatsare, naa wer ɓe go ne ndi werga jar ko re ma ti tway ɓin wo ɓuy bay wo de kããge ma naa wer ɓe go wa. Ndo ɓon ndo de kããge werga Nenterse Baa ma bay ɗagn wo ti ɓo.

Danyel naa wer lwaʼgen go ne waŋ pa

¹⁶ Mo so no Danyel maga à ɗen ga Belsatsar raw hayge semagga de ngilgi yeʼe, day see ɓe raw daŋge ɓe go. Waŋ fer wãã wããre day ga : Belsatsare, daga lwaʼgen wo de naage wer ɓen mo daŋ wo see go ne ndo wa! Belsatsar kal ferge ga : Je wãã re ɓi no, daga lwaʼge mo hay ti jar hee ɓon wo, day naage wer ɓen mo hay ti jar giŋ mogen wo!

¹⁷ Koo maga ndo kon ga hay kol go kluu ngrim, ga tipẽẽge ti ɓe duʼ ngel ma ciŋ day à kon go ti tamsir ɓuy mono,

¹⁸ koo se ga sug ɓe de woore day leʼge ɓe debaŋ, rege jar ɓuy ti ɓe, nàyre ma yoofíi lag wo wer ɓe, dweere ma ciŋ bag wo tiŋ ti jag doo ɓe wo lay mono

¹⁹ waŋ, á diŋ ndo maga kol go kluu lay, de egre debaŋ lay mono. Á diŋ ndo maga kluu ɓo gẽẽ ciŋ hãã wo go daʼ ngel ma ciŋ, ndo maga ndo wãã re jare, hãã wo go ti jag sir tawge mono.

²⁰ Nen waŋ hay ko jobo yoo jar ma bay ɗag ma gor ngel wo le cwaage ciŋ day riŋ ga : Caa we koon go, kaf we nen ɓe go ane, men we gùr ɓe wo de kããge ɓe wo gesiŋ ni, saʼn de reeceʼ boo wo de reeceʼ boo dob wo go yoofíi nen maga meebe mo taŋn go day á mo re fíi doo nàyre wo nono hãã kiŋgi raw go ti ɓe renam.

²¹ Waŋ, mokay diŋ naage wer ɓe no : Re maga je ma ciŋ hããn ɗign le go caa ge waŋ je wãã re ɓi no.

²² À nii gi ndo yaŋ go ti holaŋ jar téebeere wo, ngel naw ɓon joŋ ge yaŋ yoo nàyre ma yoofíi wo day à hã ge fíi yaŋ ne ndo ma rege doo ga à hã fíi ne deere wo ma rege nono. Meebe taŋ ge ndo yaŋ go day kiŋgi raw yaŋ go mo ti renam hãã ndo wo ge koge de ti ngel ɓo ɗa ga je ma ciŋ hããn de wãã re waŋ ma honla ɓuy yoo jar téebeere wo day se hãn ne wosela doo ga ɓil ɓe da nono.

²³ Ti jag maga à hãn ga men gùr koon wo ni de kããge ɓen mono, wer ɓe ga waŋ ɓon gwaʼ ge mbe yaŋ ma ɓo hãã de maga ndo wo ge koge ga je ma wãã re fẽẽren ɓuy le ciŋ mono.

²⁴ Diŋ wersen so waŋ, daga yaŋ maga ndi baan ne ndo mo coo jag ɓo! Men joŋ ɓlagge ɓon wo go day joŋ fen ma ti ngel ɓe no, men debaycõõre ɓon wo go day koo decoo jar ma de gayre wo ni hayle ɓo go de yõõ tin see yaŋ wo pel ni ane.

Lwaʼgen bag jag go

²⁵ Re sen ɓuy raw bag jag go ti waŋ Nebukadnesare.

²⁶ Few raw go hwal ti ɓoge, waŋ hay go caw mbeɗ ɓaale ɓe ɓi feele waŋn ɓi leege Babilone.

²⁷ Waŋ raw wãã wããre day gana : Ɓa lam nà bay diŋ Babilon ma kluu maga ndi hay boon de kluu egre ɓin maga á mo hay diŋ ngel hayle waŋ, mo hay diŋ fen hã togoɗge ne kluu ɓin mo wa yawla?

²⁸ Waŋ bay ɓoʼ jag wããren seŋ gẽẽge po raw wããge le ciŋ gana : À wãã wããre nà diŋ ne ndo, waŋ Nebukadnesare! Waŋ ɓon maŋ ɓil we go see ɓo!

²⁹ À nii gi ndo yaŋ go ti holaŋ jar téebeere wo, ngel naw ɓon kol ge yaŋ wo yoo nàyre ma yoofíi wo, à hã ge fíi yaŋ ne ndo ma rege doo ga à hãn ne deere wo ma rege nono. Kiŋgi raw ge wo yaŋ go mo ti renam hãã ndo wo ge koge ɗa ga je ma ciŋ hããn de wãã re waŋ ma honla ɓuy yoo jar téebeere wo, day se hãn ne wosela ɓuy doo ga ɓil ɓe da nono.

³⁰ Doo ni tuu wããren bag jag go ti Nebukadnesare. Á raw niigi ɓe go yoo jar téebeere wo, se kol rege diŋ fíi doo deere wo nono, hõõgese ɓe taŋ go de meebe hãã riŋ ti ɓe gẽẽge go doo tãy gebeg nono, fũygi ɓe jaw wo go doo fũygi weere dweere wo no lay.

Nebukadnesar fer go pẽẽge

³¹ Wo go dayge ti tawge naw maga hay go de ngaɓge mono, ndi Nebukadnesar ndi raw maŋ nen ɓi ciŋ day ti ɓi raw ferge de ele. Ndi raw joŋ suseʼ ne je ma ciŋ hãã no, ndi maŋ ti ɓe ciŋ, ndi togoɗ je maga mbe tenen tum mono, je maga wããge re jar ɓen diŋ ma tum day joŋge waŋ ɓen mbe wo tum de kiŋgi de kiŋgi mono.

³² Jar ma ti tamsir wo ɓuy doo ga de el ɓaara bay meʼ wa has nono. Á joŋ joŋre de jar durgi ma ciŋn wo de jar téebeere wo doo ga ɓil ɓe da nono. Je maga maŋ doo ɓe noga riŋn ga á joŋ nà mayse la bay wa.

³³ De sen ni ti ɓi raw ferge de ele, hooge sug ti waŋ ɓi no, togoɗge ɓin wo de kluu ɓin wo mono, à fer fer rage ne ndi. Jar bag yaŋ ne ndin wo de jar kluuri ma ti ɓin fer wo joŋge de sãy ɓi ti, à raw ferge hay ndi ti waŋ ɓi no day kluu ɓi hay seɗge de pel de pele.

³⁴ Patala ndi, Nebukadnesar ndi joŋ suseʼe, ndi maŋ ti waŋ ma ciŋn ciŋ, ndi togoɗ ne. Joŋre ɓen wo ɓuy cwãy, faage ɓen wo ti ngel ɓe. Á de kããge ma fer jar maga wo de far ti see ɓaara ciŋ go blam.