DANYEL 3 - Tupuri Bible

Fodo sõõ mani Nebukadnesar no

¹ Waŋ Nebukadnesar raw joŋ fodo mopo de boo biŋni, gẽẽre ɓe ciŋ meeder doo swaʼa, diy ɓe meeder swaʼ lay. Se raw kaŋge ɓe ɓil log ma Dura ti prog ma Babilon no.

² Waŋ Nebukadnesar raw ɓoʼ soole wer Satrapn wo, jar ko wer horogn wo, jar wãã re progren wo, jar bag yaŋn wo, jar ɗaw solayn wo, jar yer jag liŋgin wo, jar car kiidan wo de jar kluuri joŋre ma ti progren wo ɓuy maga á mo a wo ti tĩĩgi wer goŋge fodo maga waŋ Nebukadnesar hay kaŋ taʼ mono.

³ Mo so no Satrapn wo, jar ko wer horogn wo, jar wãã re progren wo, jar bag yaŋn wo, jar ɗaw solayn wo, jar yer jag liŋgin wo, jar car kiidan wo de jar kluuri joŋre ma ti progren wo ɓuy kal wo le tayge ma tĩĩ wer goŋ fodo maga waŋ Nebukadnesar hay kaŋ taʼ mono. Saara raw wo lagge pel fodo maga Nebukadnesar hay kaŋn taʼ mono.

⁴ Je ʼwad ɓayn raw ngar jag go kloŋ ga : Nday jar no, wer ma honla ɓuy, nday ma ti jag ma honla ɓuy, mokay diŋ fen maga à wããn wo ne nday mono :

⁵ De maga nday laa roo cõõ, manbããre, tidili, dilna, mandilna, jawlaŋ wo we de roo fen jõõ ma honla ɓuy we no, ni nday leɗ we monɗra day ni nday goŋ we fodo ma de joŋge de boo biŋni ga waŋ Nebukadnesar de kaŋge ɓe taʼ mono.

⁶ Wosela maga day ge we leʼ monɗra gà day goŋn we gà no, à ɓoʼn ge go doo la tuu nen wùu ma de ngalge hiɓi.

⁷ Diŋ wersen so, de maga jarn wo ɓuy wo wo laa roo cõõ, manbããre, tidili, dilna, mandilna, jawlaŋ wo de roo fen jõõ ma honla ɓuy mono, jarn ɓuy, wer jar ɓuy de jar ma ti jag ma honla ɓuy raw wo leɗ monɗra day goŋ wo fodo ma de joŋge de boo biŋni maga waŋ Nebukadnesar hay kaŋ taʼ mono.

Kããre Danyeln day wo goŋ sõõn gà

⁸ Ti wur sen de naw sen wo ni mono, jar Kalde po raw wo age laa húulí ne jar Jwifn wo ti.

⁹ Saara kal wãã wããre day riŋ wo waŋ Nebukadnesar gana : Daga waŋ mo hay mbe ciŋ caw tum!

¹⁰ Waŋ, ndo hay hã jag go ga wosela ɓuy maga laa roo cõõ, manbããre, tidili, dilna, mandilna, jawlaŋ wo de roo fen jõõ ma honla ɓuy we no, ni á mo leʼ monɗra day mo goŋ fodo ma de joŋge de boo biŋni no.

¹¹ Jag ɓo de hãge ga wosela ɓuy maga day we leʼ monɗra gà day we goŋge ɓe gà no, à mo ɓoʼn go nen wùu ma de ngalge hiɓ no.

¹² Day jar Jwif po maga ndo hay hã wããre prog ma Babilon ne hara doo, laa wo hoo sug ti jag ɓo maga ndo hãn mo gà hase waŋ, á wo diŋ Sadrag, Mesag wo de Abed-Nego. Á laa wo joŋ peele ne baa ɓon wo gà bay wo goŋ fodo ma de joŋge de boo biŋni ga ndo hay kaŋn taʼ mo wa lay.

¹³ Mo so no, Nebukadnesar raw juu nen go, ɓil ɓe sõõ debaŋ, se kal hã jag ga hoo Sadrag, Mesag wo de Abed-Nego wo le. Á raw hoo rage le pel waŋ.

¹⁴ Nebukadnesar kal wãã wããre day riŋ ra ga : Sadrag, Mesag wo de Abed-Nego, á diŋ mopo maga nday bag mbay jag ɓe le go ɓil ɓay ga nday mo joŋ peele ne baa ɓin wo wa lay, nday mo goŋ fodo ma de joŋge de boo biŋni maga ndi kaŋn taʼ mo wa lay yawla?

¹⁵ Patala grag we see ɓay go, day de maga nday laa roo cõõ, manbããre, tidili, dilna, mandilna, jawlaŋ wo de roo fen jõõ ma honla ɓuy we no, ni nday leɗ monɗra day ni nday goŋ we fodo maga ndi hay joŋn mono. Hayga nday goŋn we gà no, à laa nday go doo la tuu nen wùu ma de ngalge hiɓi, baa ma hon day yãã ge nday yaŋ go doo ɓi layblaʼ no.

¹⁶ Sadrag, Mesag wo de Abed-Nego kal wo ferge ne waŋ Nebukadnesar ga : Wùr bay de sãy fer wããre ne ndo ti sen ni wa.

¹⁷ Hayga á joŋ we doosen nono, Baa wùr maga wùr de ma joŋ peele ne hẽn de kããge ma yãã wùr go, á yãã ge wùr go jag wùu ma de ngalge hiɓ no, go doo ɓo lay waŋ.

¹⁸ Day ane waŋ, ko go ga wùr day joŋ peele ne baa ɓon wo gà wùr day goŋ fodo ma de joŋge de boo biŋni maga ndo de kaŋge ɓe mo taʼ gà lay.

¹⁹ Mo so no, ɓil Nebukadnesar raw cege ɓe, nen ɓe raw juugi go ne Sadrag, Mesag wo de Abed-Nego ti. Se kal wãã wããre pa, day raw hã jag ga yaʼ tuu wùu ma de ngalge hiɓn ni de daŋ ma seɓaan ɓaale renam.

²⁰ Blam ɓe se raw wii jar po wo mbag yoo soode ɓe ma de daŋ kããra egren wo ga á mo baŋ wo Sadrag, Mesag wo de Abed-Nego day mo laa wo ra go nen wùu ma de ngalge hiɓ no.

²¹ À raw baŋ jar sen wo, à her õõbe ɓaaran wo ne hara ti, trawal ɓaaran wo, õõbe ɓaara ma kluurin wo de te õõbe ɓaara ma lan wo day à raw laa rage go nen wùu ma de ngalge hiɓ no.

²² Wer maga jag waŋ maga á hay hãn tuu debaŋ lay, day wùun hay de ngalge de raw doo lay mono, trum wùu saw jar maga hay laa wo Sadrag, Mesag wo de Abed-Nego wo nen wùu wo go, id ra go.

²³ Jar se swaʼ ga diŋ Sadrag, Mesag wo de Abed-Nego leɗ wo nen wùu ma de ngalge hiɓn de baŋge tiʼ tiʼ i.

²⁴ Mo so no, hẽẽne raw caa Nebukadnesare, se raw urgi go ciŋ deparday. Se kal wãã wããre day riŋ jar bag yaŋ ne henn wo ga : Ɓa naa laa jar wo nen wùu la swaʼ de baŋge gà? Saara kal ferge ne hẽn ga : A mbe doosen no cwãy no waŋ!

²⁵ Se day pa ga : Day ndi de ko jar wo naa seege nen wùu tiʼ bay wo de baŋge wa lay, wùu bay cog rage wa lay nà ẽla! Nen je ma boŋn doo nen wel baa wo nono.

²⁶ Blam ɓe Nebukadnesar raw yaʼge wo ti jeŋ wùu ma de ngalge hiɓ no, raw wãã wããre day ga : Sadrag, Mesag wo de Abed-Nego, weere jõõre Baa ma ciŋ hãã no, laa we le go day a we le! Sadrag, Mesag wo de Abed-Nego raw wo laage le go nen wùu no.

²⁷ Satrapn wo, jar ko wer horogn wo, jar wãã re progren wo de jar bag yaŋ raw wo tayge le. Á ko wo ga wùun joŋ mopo see jar sen wo meʼ gà hase, ko wo ga wùu saw riŋ ti ɓaara gà lay, õõbe ɓaaran lĩd wo see meʼ gà lay, fõõre no wùu draʼ bay see ɓaara wa lay.

²⁸ Nebukadnesar kal wãã wããre day ga : Suseʼ ne Baa mani Sadrag, Mesag wo de Abed-Nego maga ɓoʼ je peele ɓe le, day yãã weere jõõre ɓen wo go mono. Á hay kaŋ wo ɗiggi diŋ ti ɓe, cegaɗ wo jag waŋ go day hã wo see ɓaara go ga sen de daŋ joŋge peele ne baa po noga goŋge baa po go sar ga bay diŋ Baa ɓaaran wa mono.

²⁹ Patala mokay diŋ jag maga ndi hãn mono : Wosela ɓuy ni jar ma hon wo layblaʼ, ti wer ma hon noga ti jag ma hon blaʼ ga wãã ge wããre po we bay ngar ti Baa mani Sadrag, Mesag wo de Abed-Negon no, à tawn ge go, day tiŋ ɓen kol ge go diŋ tabul ma de cor ɗugul ne kẽẽ ti werga Baa po bay doo se no ga yãã jar go wa.

³⁰ Blam sen waŋ raw kol Sadrag, Mesag wo de Abed-Nego wo go jar kluuri ti prog ma Babilon no.

Lwaʼge mani Nebukadnesar ti koo ma kluu no

³¹ Ndi Nebukadnesar waŋn, ndi yer wo ne jarn ɓuy, ne wer jar wo ɓuy, ne jar ma ti jag ma honla ɓuy maga wo wo go ti tamsir ɓuy mono. Daga jam mo hay see ɓay debaŋ!

³² A coo jag ɓi maga ndi mo kaŋ nen ɓay wo ti fẽẽre kaŋ nen wo de fẽẽre ma ngil jar maga Baa ma ciŋ hããn joŋ ra see ɓi mono.

³³ Fẽẽre kaŋ nen ɓen wo kluuri Fẽẽre ngil jar ɓen wo sara Waŋ mani ɓen diŋ waŋ ma tum Wããge re jar ɓen mbe wo tum, Wo ti wer jar maga ndar ge wo wo mo ɓuy no.