DANYEL 12 - Tupuri Bible

Wur bon wo de laage jar go ciŋ no

¹ De ngar ngel sen ni mono Misel, waŋ ma kluun ur gi yaŋ. Á diŋ je maga de oole ngiŋ ti weere ma ti wer mani ɓon wo mono. Á joŋ ge ti wur sen ni diŋ naw ma de gaali wo, diŋ naw maga te ɓaara hay joŋ ti boŋ gà le ti wur maga wer jar ndar wo le taʼ taʼa, hãã bà go patala mono. De ngar ngel sen ni jar mani ɓon yãã ge wo yaŋ go, diŋ wosela ɓuy maga à daʼ ge ɗúu ɓe de yerge ɓil kefdern mono.

² Jar debaŋ maga wo go wara de húulí de terge nen sir gesiŋ fer ge wo yaŋ go birgi, jar lan wo ma daʼ tenen ma tum, ma lan wo ma woge nen sõõre wo de coocoo ma tum no.

³ Jar maga hay joŋ wo de ko re, sen sag ge wo yaŋ doo sagge ngel ma ciŋ nono, day jar maga hay had wo ngaɓan de mo ma ti ngel ɓen sag ge wo yaŋ wo tum doo gér wo nono, wo sagsage.

⁴ Ma ɓo Danyel mono, ɗaw wããre sen wo de yoŋre, naa nen wããre ma de yerge ɓil kefdern go ne jobo wa hãã á mo wo go ti wur tawge ti fẽẽre no. Jar debaŋ keen ge wo yaŋ day koge ɓaara yaʼ ge yaŋ ciŋ.

Wur tawge fẽẽren de yoŋre

⁵ Ndi Danyel ndi hay de kaŋ nen ɓi taʼ koge, kola jar po ma tigriŋ wo ɓog de odge deele deŋdeŋ, ma boŋ wo go faale maarog ma de pããgen ɓaŋla la, ma lan wo go ɓaŋla lay.

⁶ Ma po boŋ yoo ɓaara raw riŋ je ma de õõbe lẽẽn ti ga hay de oole ciŋ ti bii maarog ma de pããgen ga : Wur tawge ti fẽẽre ngil jar sen wo a ge nà hunla?

⁷ Ndi raw laa wããre je ma de õõbe lẽẽn ti ga hay de oole ciŋ ti bii maarog mono. Se raw hoo doo war ɓe wo de doo gùr ɓe ciŋ, raw haʼge go de je maga mbe tenen tiʼ sagsag ga fẽẽre sen joŋ ge wo nen kiŋgi swaʼ de nusi ga fẽẽre sen wo mo ɓuy bag ge wo jag go nà de maga egre jar ma bay ɗagn hoo ge wo we go has ɓuy tuu so mono.

⁸ Ndi laa mbi wããre de sug ɓi, ane ndi laa laa wer mopo meʼ gà hase. Ndi day ga : Waŋkluu ɓi no, fẽẽre sen wo ge wo ɓoʼ ti nà ɓoʼge la?

⁹ Se kal ferge ne ndi ga : Danyele, see mbo, werga wããre sen joŋ ge wo de yoŋre go has tuu, hãã wo go ti wur tawge ti fẽẽren wo.

¹⁰ À fãã ge jar debaŋ wo yaŋ go, à yog ge ra yaŋ go cwelgede, à lam ge ra yaŋ go. Jar ɓlaggen joŋ ge wo mbaara ɓlagge no day jobo boŋ yoo jar ɓlaggen laa ge wer mopo gà hase. Á ma, jar maga joŋ ge wo de ti ngel mono, sen laa ge wo wer reen yaŋ.

¹¹ Tĩĩ le hãã ti wur maga à dig gi siigi jag ma nen naw tumn go day à kaŋ ge mo horge see mani je ɓlag jarn go ti ngel ma bay ɗagn so mono, naw joŋ ge ndar ti ɓe kiskis ɓog de naw doo kaawaʼa.

¹² Woore ti je maga gor ge day wo ge go ti naw ndar ti ɓe kiskis swaʼ de naw doo swaʼ ti dwee mono!

¹³ Day ndo ma ɓon oo ngiŋ, wo go ti naw tawge ti fẽẽre no. Ndo suu gi yaŋ go iggi day ndo ur gi yaŋ go ciŋ ma woge daʼ nen mo ma ɓon go ti wur tawge nawn wo no.