DANYEL 10 - Tupuri Bible

Jobo de õõbe lẽẽ ti mbuɗ nen Danyele

¹ Nen kiŋgi ma de swaʼ maga Sirus waŋ Perse de ma joŋ waŋ mono, à raw naa nen wããre po ne Danyel maga à hay ɗege ɓe ga Belsatsar mono. Wããre sen diŋ wããre ma cwãy, á wãã ti durgi maga a ge de gayre ma debaŋ ne jar ti mono. Danyel kal ɗaw wããre seno, raw kaŋ ti ɓe ti fen maga mbuɗ nen ɓe mono.

² De sen ni ndi Danyele, ndi kal joŋ lumo swaʼ nen lawge.

³ Ndi laa re rege po ma de el gà lay, hayba này noga yii ndi baa jag ti ɓaara gà. Ndi tag noo po see ɓi gà lay hãã lumo ma swaʼn bag wo jag go.

⁴ Ti naw doo ɓog ti naa nen few ma taŋgun mono, ndi hay jag maarog ma de pããge ma kluu ga diŋ Hidekel mono.

⁵ Ndi raw maŋ nen ɓi ciŋ, ndi kaŋ nen ɓi taʼ koge, kola jobo la deŋ de õõbe lẽẽ ti, de saʼ sag ɓe de mblaaga boo biŋni ma Ufas no.

⁶ Hõõgese ɓe hay doo Krisolid húulì ma de wooren nono. Pel ɓe sag doo sagge Baa nono, nen ɓe wo doo wùu maga de yããge nono. Doo ɓe wo de ɓaale wo de maŋ boo dob ma de gùr see nono. Wããre ɓe doo ngarge jag jar ngaɓa nono.

⁷ Ndi Danyele, ndi ko mbuɗgi nen sen diŋ ndi boŋ. Jar maga hay wo see ɓi ni ko wo mbuɗgi nenn gà. Á ne hẽẽne raw caa rage go debaŋ day saara kal daŋge de ɗeere yoŋge.

⁸ Ndi kal gwaʼge boŋ ko mbuɗgi nen se ma kluu no. Egre ɓi raw hooge go, see ɓi daŋ me go, kal hragge go lay. See ɓi huu go ɓuy tuu.

⁹ Ndi raw laa gẽẽge wããre ɓe no. De maga ndi laa gẽẽge wããre ɓen wo mono, ti ɓi raw maʼ nen go, ndi raw leʼge de mbuɗ nen gesiŋ.

¹⁰ Kola doo po raw duʼgi me see, kal maŋ mege go ciŋ. Ndi de laa kõyõgre ɓi wo de doo ɓi gesiŋ daʼge tiʼ i.

¹¹ Blam ɓe se kal riŋ ndi ga : Danyele, je ma dage no, laa mbo wer wããre maga ndi day wãã rage ne ndo mono. Oo go ti deele ti ngel maga ndo ni mono, gahãyla, à ɓoʼ ndi le patala see ɓo. De maga á wãã wããre sen ne ndi mono, ndi kal urgi go ciŋ ti deele deŋ daʼge.

¹² Se day riŋ ndi ga : Danyele, joŋ hẽẽne wa, gahãyla, ti naw ma taŋgu maga ndo ɗig le ɓil ɓo ga ndo mo laa wer mopo, day ndo mo fer ti see ɓo gesiŋ pel Baa ɓon mono, à de laa wããre ɓon wo. Ndi a nà diŋ wer wããre ɓo sen wo.

¹³ Je kluu ma ti sir ma Persen hay giŋ ndi nen naw doo ɓog ti boŋ ama, Misel, jobo yoo waŋre ma kluurin wo boŋ hay a kay mege, ndi raw hayge ni yeʼ see waŋre ma Persen wo.

¹⁴ Ndi a patala ma kaŋ nen ɓo ti fen maga a ge ne jar mani ɓo wo ti nen wur ma peln wo mono, werga mbuɗgi nen yaŋ de gwaʼge boŋ ti wur ma sen wo ɗa pa.

¹⁵ De maga á de fer wããre sen wo me mono, ndi raw jel ti ɓi go gesiŋ, ndi mbi baʼbaʼ deŋ.

¹⁶ Kola jobo de maŋ weere mani jar tabayn wo la deŋ, raw age duʼ mege jage. Ndi raw bul jag go, ndi wãã wããre. Ndi raw riŋ je maga hay de oole pel ɓi ga : Waŋkluu ɓi no, wer fen maga mbuɗ nen ɓi mono, see ɓi daŋ ndi go, day egre ɓi hoo go lay.

¹⁷ Ndi, wejõõ waŋkluu ɓin ndi kãã ge ma fer wããre ne waŋkluu ɓin ferge de maga ndi go patala de sealge lay, day egre ɓi go de hooge lay nà ferge la?

¹⁸ Mo so no, je maga hay de maŋ je táabay la raw duʼ ndi tigriŋ pa, day ndi raw daʼ egre so.

¹⁹ Blam ɓe se kal riŋ ndi ga : Joŋ hẽẽne wa, je dage no, jam mo hay see ɓo! Coɓ see ɓo, coɓ see ɓo! Day de maga á de wãã wããre ne ndi mono, see ɓi raw ferge le see ɓi, ndi day ga : Waŋkluu ɓin mo wãã mbe wããre so, werga ndo fer hã egre me mono.

²⁰ Se raw riŋ ndi ga : Ndo yaŋ mbo de ko fen maga ndi a see ɓo ti re ɓe mo yawla? Patala, ndi fer ma woge dur je kluu ma ti sir Perse no, day de maga ndi raw ge mono, ko ga waŋ ma ti sir Yafan a ge yaŋ.

²¹ Ane, ndi da sii fen maga go de yerge ɓil kefder ma cwãyn ne ndo ɗa. Jobo laa kay ndi ma dur rage gà diŋ Misel je kluu ma ti ɓay tawa tuu.