AMOS 9 - Tupuri Bible

Naage nen ma de dwee no

¹ Ndi kal ko Manwur de oole ti ngel siɗ jagge. Á day ga : Mbug dlaʼge ti gefay ma kiŋkiŋ wo go, Day ngel ɗiigi jag tiŋ Baan mo fĩɗ wo! Day ndi mbug gi ti ɓaara go ɓuy! Ndi caa ge wer weere ɓaara wo go de jaw Yoo ɓaara mokay no, jar maga sen ɗee ge wo mono, Kãã ge wo ma daŋge gà. Jar maga gwaʼ wo mokay maapo daŋ ge go boŋ gà hase.

² Hayga á mo laa bà wo go ni jar ɓi tuu wo, Doo ɓi joŋ ge mbe nen hoo rage le go ni. Hayga á ɗii wo we wo go ciŋ no, Ndi fer ge le go cwaa rage gesiŋ.

³ Hayga á raw wo we yoŋge ti tipẽẽge húulì Karmel no, Ndi wo ge go kiɗ rage ni, day ndi hoo ge ra le go. Hayga á yoŋ wo we go nen ɓi wer maarog gesiŋ no, Wo ni mono, ndi wii gi cwe yaŋ ga á mo lor ra

⁴ Hayga jar hee ɓaaran hoo wo ra we wo go ti daŋgay no, Wo ni mono, ndi wii gi jaw yaŋ ga á mo taw ra go. Ndi joŋ ge yaŋ de kaŋ nen ti ɓaara Diŋ ma kaŋ gaali ne hara ti, ama bay diŋ ma hã daʼge see ne hara wa.

⁵ Waŋkluu, Manwuri, Pantway Duʼ tamsiri, day se kal ngoroɓge go. Jar ma ɓil ɓen ɓuy wo go nen lawge Á ur le ɓuy doo bii Nil nono, Day á kal hayge gesiŋ doo maarog ma Ejipten nono.

⁶ Á le go de kneʼ ngel hayle ɓen ciŋ Day wo de coʼ ɓaale gesiŋ ti tamsiri Á ɗe bii maarog wo le, day raw dus rage go ciŋ ti siri Manwur diŋ ɗúu ɓe.

Caage kiida jar ma de re tin wo no

⁷ Nday bay koge nen ɓi doo weere jar Etiyopi wo no wa ge Jar ni Israyel wo? Kay diŋ wããre ma jag Manwuri. Ndi bay le go de hoo jar Israyel wo ɓi sir Ejipte wa, Bay le go de hoo jar Filistẽẽ wo Kamfor wa, Bay le go de hoo jar Syri wo Kir wa?

⁸ Koɗa, Waŋkluu Manwur de kaŋ nen ti Waŋ maga de joŋ re mono. Ndi tawn ge go ciŋ ti sir la.

⁹ Ama ane, ndi day ge doo go ɓlag tiŋ mani Jakobn fẽd ɓuy gà. Kay diŋ wããre ma jag Manwuri. Werga ndi wãã ge wããre yaŋ go, Day ndi joŋ ge yaŋ nen joŋ gijig ti tiŋ mani Israyeln de sir wo ɓuy, Doo maga á gas mbèere mopo go nono Hãã nen mopo leʼ ge go gesiŋ meʼ boŋ gà.

¹⁰ Jar joŋ ɓlagge ma yoo jar ɓin huɗ gi wo go jag jaw Á wo diŋ jar maga wãɗ wo ga : Ndo joŋ ge nen yaʼ gaalin le ne wùr see gà Day ndo joŋ ge nen yaʼge ɓe le hãã daʼ wùr gà.

Blam maga ngeln hay ɓlag go mono

¹¹ Ti wur sen mono, ndi fer ge yaŋ ur tiŋ ma de Hoyobge mani Dafidn ciŋ, Ndi fer ge yaŋ neɗ mungi ɓen wo no, Ndi fer ge yaŋ far ma de laggen wo go ciŋ Day ndi fer ge yaŋ booge ɓe doo ma ɓaan nono,

¹² Nen maga á mo fer yãã te Edom Maga gwaʼ mono, de sir ma lan wo ɓuy Maga à hay ɗe ɗúu ɓi ti ɓaara mono Kay diŋ jag Manwur maga ɓod jag fẽẽre sen wo go ɓuy mono.

¹³ Koɗa wurpo a ge wo yaŋ, Kay diŋ jag Manwuri, Ti ngel maga je jeegen see ge yaŋ maŋ wer je weege no Ti ngel maga je faʼgen see ge yaŋ maŋ wer je joʼge no, Ti ngel maga bii leʼge tlalum yuu gi wo yaŋ le ciŋ ti húulìn wo, Day ti ngel maga húulì ma lablab wo ɓuy joŋ ge wo go de ɓodge de bii.

¹⁴ Ndi fer ge jar Israyel wo, Jar ɓi ma ti daŋgayn wo yaŋ le, Á fer ge wo yaŋ bor ɓi leege maga wo go de ɓlagge mono, Day lag ge wo yaŋ de tiŋ ni, Á peɗ ge wo tlalum yaŋ Day jo ge wo yii yaŋ, Kaŋ ge wo pay sugnee yaŋ Day re ge leʼge ɓen wo yaŋ.

¹⁵ Ndi fer ge yaŋ lag jar ɓin wo ɓi sir maga diŋ ɓaara mono. Day à hoo ge ra wo go gà so hase, Ti sir ɓaara no, sir maga ndi hãn ne hara mono. Wããn diŋ Manwuri, Baa ɓo no.