AMOS 8 - Tupuri Bible

Naage nen ma de naa no : Kerge maga de leʼge koo ɓil mono

¹ Waŋkluu, Manwuri, joŋ nen kaŋ nen ɓi ti naage nen ma kay no : Kona diŋ maga kerge go de baage de leʼge koo ma de ruggi ɓili.

² Á day ga : Ndo ko nà diŋ may ne Amose? Ndi kal fer wããre ne hẽn ga : Diŋ kerge go de baage de leʼge koo ma de ruggi ɓili. Day Manwur kal wii mege ga : Wur ma blam tawn rug we go see Israyel jar ɓin wo no. Ndi men ge mopo go ne hara gà so hase.

³ Ti wursen mono, siŋ maga à ʼwad ra ɓi tiŋ waŋre wo mono, Kol ge wo yaŋ diŋ ndumgi wo, Kay diŋ jag Waŋkluu, Manwuri, À lag ge húulí wo yaŋ wo go ngaɓa bay jage.

Kaŋ wer sirn go diŋ haram jar trere wo

⁴ Coʼ we sug ɓay, nday jar maga nday lig Jar coo wo go mono, Day fer jar ma nen coocoon wo go blam ɓi sirn mono.

⁵ Nday day nà ga : Few ma defayn taw go nà hun la, Nen maga wùr yeɗ ble wùrn go mo la? Naw Saba taw go nà hunla? Nen maga wùr bul jag boole wùr wo go la? Wùr fer ge mundooren go klee, Wùr yaʼ ge yoon ciŋ lay, Wùr kol ge kelewn go de bay ngar ma bag bii jare.

⁶ Wùr yeɗ ge jar maga mo ɓaara bay wa has go de solay Yee je coon go nen taarag jag boŋ, Day wùr yeɗ ge hoole coore blen go.

⁷ Manwur go de hãʼ haʼge ma kay no ga : De sir maga ɓil Israyel go ti ɓe fehfeh mono, Joŋre ɓay maga nday joŋn mo hãʼ yõõ ge Ti ɓi go gà hase.

⁸ Diŋ wersen so ga sirn gijig gi yaŋ Day jar ma ɓil ɓen ɓuy laa ge wo yaŋ nen lawge Sirn maŋ ge yaŋ go ciŋ eŋ ɓuy. Á ur gi yaŋ go ciŋ ɓuy, day fer ge yaŋ hay ge gesiŋ Doo maarog ma Ejipten nono.

⁹ Á joŋ ge yaŋ ti wur seno, Kay diŋ jag Waŋkluu, Manwuri Ga ndi joŋ ge yaŋ ga wur mo leʼ go gesiŋ de maga se ti Naa ɗeger ɗa mono, Day ndi ɓoʼ suŋgu go ti tamsir de cege kãge,

¹⁰ Ndi kol ge few ɓayn wo yaŋ go diŋ lawge Day siŋ ɓayn wo ɓuy kol ge wo yaŋ diŋ roo. Ndi saɗ ge mblaaga yaŋ go ne jar yoo ɓuy Day ndi kol ge ti jar yaŋ go de hiriggi ɓuy, Ndi kaŋ ge sirn yaŋ nen lawge Doo maga à joŋ ti mbarga maga go ni no boŋ nono, Day ma pel ɓen ge wo mokay ɓoʼge wo mbe ti go diŋ De wur ma car jag Jiili mbe go koɗ so.

¹¹ Koɗa, wurpo a ge wo yaŋ, Kay diŋ jag Waŋkluu, Manwuri Ti ngel maga ndi ɓoʼ ge koŋne yaŋ go ɓi sir no, Bay diŋ koŋne coo rege wa, Bay diŋ jwaale bii wa, Ama diŋ koŋne wo de jwaale ma laa wããre Manwuri.

¹² Doo kay nono, á kol ge wo yaŋ go de welge Ti maarog ma la wo de ma la, Le nen goloŋhwede hãã go nen Were, Á car ge wo nen yaŋ ma kiɗ wããre Manwuri, Day á daʼn ge wo gà.

¹³ Ti wursen mono, mayre ma tigliiri ma de wooren Wo de weere jõõren kii wo ti yaŋ go doo jwaale.

¹⁴ Á wo diŋ jar maga had wo ti ɗúu baa ma de ɓlagge ma Sirin wo diŋ saara Day kal wo ga : baa mani ɓon mo hay mbe caw Dane! Daga wer tosge ma Beer-Seban mo hay mbe hãʼã! Ama á leɗ ge wo, day hoo ge wo go ciŋ gà so hase.