AMOS 7 - Tupuri Bible

Naage nen maga Baa naa nen ɓe ne Amose, ma taŋgu no : Maapoɗ wo

¹ Waŋkluu, Manwur joŋ nen kaŋ nen ɓi ti naage nen ma kay no. Ko nà diŋ maga maapoɗ wo de godge taɗ taɗ, De wur maga hõõpãy de tĩĩ wer jawge mono Á diŋ hõõpãy maga tĩĩ blam maga waŋ hay saŋn go mono.

² Day wer maga á hay ɓoʼ ɗee go re fíi ma Ti tamsir ɓuy nono so mono, Ndi day ga : Waŋkluu, Manwuri, fug mbo ɓil go so! Hayga baywa no, Jakob gwaʼ ge nà kmay pala? Á nà no meʼ tuu so lay no.

³ Manwur kal ferge ɗiggi Day fen sen kãã ma joŋge gà Manwur wãã nono.

Naage nen ma de ɓog no : Wùu

⁴ Waŋkluu, Manwuri joŋ nen kaŋ nen ɓi ti Naage nen ma kay no : Ko nà diŋ maga Manwur kal ɗe wùu le ma caa kiida de ɓe. Day wùu sen hay roɗ tuu ma kuɗumn go, Day hay roɗ payn go lay.

⁵ Ndi day ga : Waŋkluu, Manwuri, menn sog la! Hayga baywa no, Jakob gwaʼge nà kmay pala? Á nà no meʼ tuu so lay no!

⁶ Manwur kal ferge ɗiggi Fen sen kãã ma joŋge gà pa. Waŋkluu, Manwuri, wãã nono.

Naage nen ma de swaʼ no : Saale maga le de sirgi

⁷ Á joŋ nen kaŋ nen ɓi ti naage nen ma kay no : Kona diŋ maga Waŋkluu de oole ciŋ ti glig maga go de Dlaʼ ti degaʼ degaʼa. Day mo maga à ngaɓ fẽẽre de ɓe ga mo ɓen mo Hay degaʼ degaʼ mono doo ɓe kay.

⁸ Manwur wii me ga : Ndo ko nà diŋ may ne Amose? Ndi kal fer wããre ne hẽn ga : Diŋ mo maga à ngaɓ Fẽẽre de ɓe ga mo ɓen mo hay degaʼ degaʼa. Ti ngel sen Waŋkluu day ga : Koɗa ndi ɓoʼ ndo ma ngaɓ fẽẽre go degaʼ degaʼa, Ti holaŋ Israyel jar ɓin wo. Day ndi men ge mopo ne hẽn gà so hase.

⁹ Ngel siɗ jag ma ti ɗiŋriŋ mani Isagn ɓlag ge wo go Ngel ma bay ɗag ma Israyeln ɓlag ge wo go Day ndi ur gi yaŋ ciŋ see tiŋ mani Jerobowamn de jaw.

À nii Amos le go see Betele

¹⁰ Doo kay nono, je siɗ jag Amatsiya ma Betel kal ɓoʼ jobo wo wii Jerobowam waŋ Israyel ga : Amos de maŋ ɓaale ɓo ti holaŋ Jar Israyel wo. Wããre sen wo mo deŋ bay wo ma joŋge doo naa ɓi sir la wa.

¹¹ Werga wããre maga Amos hay wããn mokay no : Ga Jerobowam huu gi go jag jaw, day à hoo ge Israyel wo go hãã see sir ɓe no.

¹² Amatsiya kal wii Amos ga : Je ko nene, see go, raw wo go ɓi sir Juda. Yaʼ wo go re hoole pẽẽ ɓo ni, day ni ndo ndar ge nen wããre ɓon wo go diŋ ni.

¹³ Joŋ nen baa wùu ndar nen wããre Betel la wa, werga á diŋ ngel ma bay ɗag ma waŋ, day á diŋ tiŋ waŋ.

¹⁴ Amos kal fer wããre ne Amatsiya ga : Ndi bay diŋ je ndar nen wããre wa, bay diŋ mbarga ma je ndar nen wããre wa lay, ama ndi diŋ je gẽɗ horoge, diŋ je jeɗ koore Sikomore.

¹⁵ Manwur hay baa me le wer horog wo, day Manwur hay wii me ga : See, wo ndar nen wããre ne Israyel jar ɓin wo.

¹⁶ Patala coʼ sug wããre maga Manwur wããn mo, ndo maga ndo wãã ga : Ndar nen wããre go ne Israyel ti wa, wãã wããre ma ngaɓa ne tiŋ mani Jakobn ti wa mono.

¹⁷ Diŋ wersen mokay so no, diŋ wããre maga Manwur wããn ne ndo mono ga : Wãy ɓo joŋ ge figliw yaŋ ɓi leege no, weere ɓo ma twerpiiri wo de tenaare taw ge wo yaŋ go jag jaw, day à ɓes ge ɓil sir ɓon yaŋ go de saale. Ndo ma ɓon ndo huu gi go ɓi sir ma de demge, day à raw ge yaŋ wo go de Israyel hãã see sir ɓe no.