AMOS 6 - Tupuri Bible

Lagge go de yõõ ti maga de koɗkoɗ

¹ Gaali ti jar maga wo de lagge ɗeged lag ɓi leege ma Siyoŋn mono, Day mbaara go de lagge de yõõ ti ti húulì ma Samarin lag Koɗ mono, Ne jar se ma kluuri maga wo pel taw yoo sir wo mono, Nday maga jar ni Israyel wo wo diŋ see ɓay!...

² Wo we Kalne ni nday ko we fen maga joŋ wo ni mono Blam ɓe ti ngel ni, ni nday wo we Hamade, Ɓi leege ma kluu no. Blam ɓe ni nday see we wo go Gade, Ɓi leege mani jar Filistẽẽn wo. Ɓi leege sen wo mbaara nà de fẽẽre De daŋ sir ma ɓay ma ɓog maga waŋre wo ni mono, Day sir ɓaaran wo mbaara nà kluuri De daŋ sir ma ɓay no?...

³ Nday ɗig ga nday yaʼ wur ma de gaalin we wo go, Day nday kal yaʼ joŋre ma girgirn le yoo ɓay.

⁴ Á wo de súuli ti ɗeere ma de joŋge de saŋ fẽẽre wo, Wo de yõɓge de mbeɗge ti ngel ma lifiɗ lifiɗ wo, Á re wo weere sããre ma yoo horog wo go, Weere deere maga wo de lagge goɓge mono.

⁵ Nday ʼwaa siŋ go jag ciŋ kloŋ wer dilna ɓayn wo Nday kaŋ siŋ ma defay wo ma bir jag Dafidi

⁶ Á jo wo yii ɓayn wo go de bag kalis par pare Á ɓod wo noo maga go yeg yeg ti ɓaara, Ama gaali bon maga ɓlag ge sir mani Josefn go mono bay ɗig rage wa.

⁷ Diŋ wersen so ga à hoo ge ra Raw ge de ɓaara ti taw pel jar maga à hoo ge ra Mono, day few ma kluuri ɓaara maga á joŋ wo De yõɓge ti fẽẽre ma lifiɗ lifiɗ Wo tiɗ tiɗ mono leʼ ge jag yaŋ go.

À ɓlag Samari go

⁸ Waŋkluu, Manwuri go de haʼge ti ɗúu ɓe De see ɓe tuu. Kay diŋ jag Manwuri, Baa Pantway no. Maŋge ti ciŋ mani Jakobn horge see ne ndi, Day ndi hee de waŋre ɓen wo no Ndi hã ge ɓi leegen go de fẽẽre ma ɓil ɓen ɓuy.

⁹ Hayga jar po yaŋ wo de lagge tiŋma hwal laybla no, Á huu gi wo go.

¹⁰ De maga kaw je húulín maŋ húulín we ma woge go roɗge ɓe no, De maga á hoo hmn wo le go mokay no, Á wii gi je maga wo wer tiŋn taw wo ni ga : Jobo yaŋ de gwaʼge see ɓo ni pa? Day je ma sen fer ge wããre le ne hẽn ga : Bay wa... Day je lan kal ga : Hay go baʼa! Werga joŋ nen ɗe ɗúu Manwur wa!

¹¹ Werga Koɗa, Manwur wãã ge go ga : Tiŋ ma kluu mo hãʼ no, á joŋ ge ga á mo ɓlag go Day ma kleen mo geɗeb nen go lay.

À dog ndar blum de koɗkoɗ ɓoge

¹² Nday yaŋ mbay de laage ti boŋ ga à yaʼ piiri wo ti húulì yawla? Noga à jee nen maarog de bloore deere wo yawla? Ama ma ɓayn, nday coo joŋre ma de deelen go Diŋ mo joge ma id jare, Leʼ ge joŋre ma keɗedn mono, nday Koln go diŋ fúudur ma glag glagge.

¹³ Nday joŋ fruygi diŋ ti fen ma de koɗ no, Nday day so ga : Bay diŋ wer egre wùr ga, Wùr daʼ egre wùr mo wa ge?

¹⁴ Diŋ werseno, mokay diŋ fen maga ndi joŋ ge Nen urgi de ɓe ne nday ti mono jar Israyel wo, Kay diŋ jag Manwuri, Baa Pantway no. Sir po urgi yaŋ le joŋ coo ɓay, tĩĩ wer le Kaʼ jag Hamad, hãã nduu go jag bii yuuri ma Araba.